މަސްތުވާތަކެތި ބޭނުންކުރުމުގެ ހިދުމަތްދޭ ކަމުގެ ތުހުމަތުގައި ރާއްޖޭގެ އެކި ސަރަހައްދުތަކުން 17 ތަނެއް މިހާތަނަށް ބަންދުކޮށްފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ. މީގެ ތެރޭގައި މާލޭގެ 12 ތަނާއި އައްޑޫގެ ހަތަރު ތަނާއި ފުވައްމުލަކުގެ އެއް ތަން ހިމެނެ އެވެ.
ރައީސް އޮފީހާއި ޕީއެސްއެމް ގުޅިގެން ބާއްވާ 'އަހާ' ފޯރަމުގައި ރޭ ކުރެވުނު ސުވާލަކަށް ޖަވާބުދެއްވަމުން އިހުސާން ވިދާޅުވީ، އަންނަ ނޮވެމްބަރު މަހާ ހަމައަށް މާލޭގައި ޑްރަގު ވިއްކުމަށް ބޭނުންކުރާ ކެފޭތަކާއި ގެތައް ހުރިހާ ތަނެއް ބަންދުކުރުމަށް މަސައްކަތްކުރާ ކަމަށެވެ.
މީގެ ކުރިން ބައެއް ތަންތަނަށް 140 ފަހަރަށް ވުރެ ގިނައިން ފުލުހުން ވަދެ ބަލައި ފާސްކުރަން ޖެހުނު ނަމަވެސް، ދޫކޮށްލާތާ ދުވަސްކޮޅެއް ނުވަނީސް އަލުން އެ ހިދުމަތް ދޭން ފަށާ ކަމަށް އިހުސާން ވިދާޅުވި އެވެ. ނަމަވެސް ކޯޓު އަމުރާއެކު ތަންތަން ބަންދުކުރެވޭ ގޮތަށް ގާނޫނަށް ގެނައި ބަދަލާއެކު ބޮޑު ކުރިއެރުމެއް ލިބިފައިވާ ކަމަށާއި، އަމުރަށް ފަހުވެސް ޑްރަގު ވިއްކުން ނުހުއްޓޭ ތަންތަން ދައުލަތަށް ނެގޭނެ ކަމަށް އެމަނިކުފާނު ވިދާޅުވި އެވެ.
މިދިޔަ މާޗު 7 ގައި އަމަލުކުރަން ފެށި ގާނޫނީ އިސްލާހާއެކު، ކޯޓު އަމުރަކާ ނުލައި 24 ގަޑިއިރަށް އެފަދަ ތަންތަން ބަންދުކުރުމުގެ ބާރު ފުލުހުންނަށް ލިބިފައިވާއިރު، ތިން މަސްދުވަހާ ހަމައަށް ބަންދުކުރުމުގެ އަމުރު ނެރުމުގެ ބާރު ކޯޓުތަކަށް ލިބިގެންވެ އެވެ. މި ހިދުމަތް ފޯރުކޮށްދިނުމަކީ ފަސް އަހަރުގެ ޖަލު ހުކުމާއި 100،000 ރުފިޔާއާ ހަމައަށް ޖޫރިމަނާ ކުރެވޭ ކުށެއް ކަމުގައިވާއިރު، އެކަން އެނގިހުރެ ހިނގަން ދޫކޮށްލާ ތަނުގެ ވެރިފަރާތާއި ކުއްޔަށް ހިފާފައިވާ ފަރާތަށް ވެސް އަދަބު ލިބޭނެ އެވެ.
ކޮމެންޓު ފޮނުވާ