އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އިއްޔެ އަބޫދާބީއަށް ވަޑައިގެން، ޔޫއޭއީގެ ރައީސް ޝައިހް މުހައްމަދު ބިން ޒައިދު އާލް ނަހްޔާނާ ބައްދަލުކުރެއްވި ކަމަށް އިޒްރޭލުގެ އިސް އޮފިޝަލަކު ހާމަކޮށްފި އެވެ. ނަމަވެސް، މި ބައްދަލުވުމާ ބެހޭ ގޮތުން ދެ ގައުމުގެ ސަރުކާރުން މިހާތަނަށް ރަސްމީ ބަޔާނެއް ނެރެފައެއް ނުވެ އެވެ.
މި ދަތުރު ކުރެއްވީ، 2023 އޮކްޓޯބަރު 7 ގެ ހަމާސް ހަމަލާގެ ދެ ހަފުތާ ހާއިރު ކުރިން ޝައިހް މުހައްމަދު ނަތަންޔާހޫއަށް އިންޒާރެއް ދެއްވި ނަމަވެސް، އެ މަޢުލޫމާތު ނަތަންޔާހޫ ސަލާމަތީ އިދާރާތަކާ ހިއްސާ ނުކުރައްވާ ކަމަށް 'ހާއާރެޓްޒް' ނޫހުން ރިޕޯޓުކުރުމާ ގުޅިގެން ފާޑުކިއުން ގިނަވެފައިވާ ވަގުތެއްގަ އެވެ. ނަތަންޔާހޫ ވަނީ އެ ރިޕޯޓު ދޮގުކުރައްވައި، ނޫހާ ދެކޮޅަށް ގާނޫނީ ފިޔަވަޅު އަޅުއްވާނެ ކަމަށް ވިދާޅުވެފަ އެވެ. އިންތިހާބު ކައިރިވަމުން އަންނަ މި ދަނޑިވަޅުގައި، ސަލާމަތީ ނާކާމިޔާބީގެ ތުހުމަތު އިދިކޮޅު ފަރާތްތަކުން ދަނީ އޭނާގެ މައްޗަށް އަޅުވަމުންނެވެ.
ރިޕޯޓާ ބެހޭ ގޮތުން ޔޫއޭއީން ސީދާ އެއްޗެއް ނުބުނި ނަމަވެސް، ސަލާމަތީ މަޝްވަރާތައް ކުރެވެނީ ވެރިންގެ ފެންވަރުގައި ނޫން ކަމަށާއި، ގުޅުންހުރި މުއައްސަސާތަކުގެ ތެރޭގައި ކަމަށް ޔޫއޭއީގެ މަސްދަރަކުން ކުރިން ބުނެފައިވެ އެވެ.
މާޗު 26 ގައި އަލް-އައިންގައި ދެ ލީޑަރުން ބައްދަލުކުރި ކަމަށް ނަތަންޔާހޫގެ އޮފީހުން ބުނި ނަމަވެސް، ޔޫއޭއީން ވަނީ އެ ހަބަރު ދޮގުކޮށްފަ އެވެ.
2020 ވަނަ އަހަރު އެމެރިކާގެ މެދުވެރިކަމާ އެކު ސޮއިކުރި 'އަބްރަހަމް އެކޯޑްސް’ގެ ދަށުން ސިޔާސީ ގުޅުން ގާއިމުކުރި ދެ ގައުމުގެ ސަލާމަތީ ގުޅުން، އީރާނާ ދެކޮޅަށް ކުރިއަށްދާ ހަނގުރާމައާ އެކު އިތުރަށް ވަރުގަދަވެފައިވެ އެވެ.
ކޮމެންޓު ފޮނުވާ