ތެހެރާން، 27 ސެޕްޓެމްބަރު – ހޮރްމުޒް ކަނޑުއޮޅީގައި ދުއްވަމުންދިޔަ އެމެރިކާގެ އަސްކަރިއްޔާގެ ސަބްމެރިން ޑްރޯނެއް ހިފަހައްޓައިފި ކަމަށް އީރާނުގެ ރިވޮލިއުޝަނަރީ ގާޑްސް (އައިއާރުޖީސީ) އިން ބުނެފި އެވެ.
އީރާނުގެ ސަރުކާރު ޓީވީ މެދުވެރިކޮށް ނެރުނު ބަޔާނުގައި އައިއާރުޖީސީން ބުނީ، ހިފަހައްޓާފައިވަނީ ޖާސޫސީ މަސައްކަތުގައި ބޭނުންކުރަމުންދިޔަ "ރީމަސް 600″ މަރުކާގެ އޮޓޯނޮމަސް އަންޑަރވޯޓަރ ވެހިކަލެއް ކަމަށާއި، އެ ޑްރޯން ހިފެހެއްޓީ އިންޓެލިޖެންސް މައުލޫމާތާއި އިލެކްޓްރޯނިކް ވަސީލަތްތައް ބޭނުންކޮށްގެން ހިންގި ދަތި އޮޕަރޭޝަނެއްގައި ކަމަށެވެ. ޑްރޯނުގައި ރައްކާކުރެވިފައިވާ މައުލޫމާތު މިހާރު ދިރާސާކުރަމުންދާ ކަމަށް ވެސް އީރާނުން ބުންޏެވެ.
މި މަހު ހޮރްމުޒް ކަނޑުއޮޅިން އެމެރިކާގެ ސަބްމެރިން ޑްރޯނެއް އީރާނުން ހިފަހައްޓާ ދެވަނަ ފަހަރެވެ.
ފެބްރުއަރީ މަހުގެ ފަހުކޮޅު މެދުއިރުމަތީގައި ހަނގުރާމަ ފެށުމާއެކު، ދުނިޔޭގެ ތެޔޮ ވިޔަފާރީގެ މުހިންމު މަގެއް ކަމުގައިވާ ހޮރްމުޒް ކަނޑުއޮޅި އީރާނުން ބަންދުކުރި އިރު، އޭގެ ޖަވާބުގައި އެމެރިކާއިން އީރާނުގެ ބަނދަރުތައް ބަންދުކޮށްފައިވެ އެވެ. — އޭއެފްޕީ
ކޮމެންޓު ފޮނުވާ