ރާއްޖޭގައި ޑްރަގް ވިއްކައިގެން ރައްޔިތުންނަށް ގެއްލުން ދެމުން ކުރާ ވިޔަފާރިއަށް ދެން ފުރުސަތެއް ނުލިބޭނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ރޭ ސުލްޠާން ޕާކުގައި ބޭއްވި "އަހާ" ފޯރަމްގައި ވާހަކަފުޅު ދައްކަވަމުން މިނިސްޓަރު ވިދާޅުވީ، މަސްތުވާތަކެތީގެ މައްސަލަ ހައްލުކުރުމަށް ސަރުކާރުން ދެ ގޮތެއް ހިފާފައިވާ ކަމަށެވެ. އެއީ ބޭނުންކުރާ ފަރާތްތަކަށް ފަރުވާ ދިނުމާއި، ސަޕްލައި މަދުކުރުމެވެ.
އިހުސާން ވިދާޅުވި ގޮތުގައި، ގާތްގަނޑަކަށް ދެ އަހަރާއި ބައިގެ ތެރޭގައި 1.3 ޓަނުގެ މަސްތުވާތަކެތި ރާއްޖޭގެ މަގުތަކުން ނަގާފައިވާއިރު، އޭގެ މަގުމަތީ އަގު 1.5 ބިލިއަން ރުފިޔާއަށް އަރައެވެ. މިއީ ކުރީގެ ސަރުކާރުތަކުގެ ފުރަތަމަ ތިން އަހަރާ އަޅާބަލާއިރު ރެކޯޑް އަދަދެއް ކަމަށް ވެސް މިނިސްޓަރު ވިދާޅުވިއެވެ.
މިހާރު މަސްތުވާތަކެއްޗާ ގުޅުންހުރި 24 ނެޓްވޯކެއްގެ މައްސަލަ ބަލަމުންދާއިރު، އޭގެ ތެރެއިން ތިން މައްސަލައެއް ނިންމައި ކޯޓުގައި ޝަރީއަތް ކުރިއަށްދަނީއެވެ. އެ މައްސަލަތަކުގައި 3.6 މިލިއަން ރުފިޔާއާއި 148،000 ޑޮލަރާއި، އިތުރު މުދާ ވެސް ނެގިފައިވެއެވެ.
ސަރުކާރުގެ އަމާޒަކީ ޑްރަގް އެތެރެކޮށް ވިޔަފާރި ކުރާ ނެޓްވޯކްތައް ނައްތާލައި، އެ ވިޔަފާރިން ހޯދާ ފައިދާއާއި މުދާ ދައުލަތަށް ނެގުން ކަމަށް އިހުސާން ވިދާޅުވިއެވެ. އަދި މިހާރު ހެދިފައިވާ ގާނޫނުގެ ދަށުން ނަތީޖާ ނެރެވޭއިރު، މި ފަރާތްތައް ޖަލަށް ލެވި، އެމީހުންގެ މުދާ ދައުލަތަށް ނެގިފައި ހުންނާނެ ކަމަށް ވެސް މިނިސްޓަރު ވިދާޅުވިއެވެ.
ކޮމެންޓު ފޮނުވާ