އިންޑިއާ އާއި ކެނެޑާއާ ދެމެދުގައިވާ ގުޅުން ވަރުގަދަކުރުމަށް ދެ ޤައުމު މަސައްކަތްކުރަމުންދާ ކަމަށް އިންޑިއާގެ އެކްސްޓާރނަލް އެފެއާރޒް މިނިސްޓަރ އެސް. ޖައިޝަންކަރު ވިދާޅުވެއްޖެއެވެ. ވަޒީރު މިހެން ވިދާޅުވީ ޔޫއެން ޖެނެރަލް އެސެމްބްލީގެ 81 ވަނަ ސެޝަންގެ ސައިޑްލައިންގައި ކެނެޑާގެ ފޮރިން މިނިސްޓަރު އަނީތާ އަނަންދާ ބައްދަލުކުރެއްވުމަށް ފަހުގައެވެ.
ދެ ވަޒީރުން ވާހަކަދައްކަވަމުން ގެންދަވާ ކުޑަ ވީޑިއޯއަކާއެކު ހޮނިހިރު ދުވަހު އެކްސްގައި ލިޔުއްވި ޕޯސްޓެއްގައި ޖައިޝަންކަރު ވިދާޅުވީ، މި ބައްދަލުވުމަކީ މުހިންމު ބައްދަލުވުމެއް ކަމަށާއި، ދެ ޤައުމުގެ ގުޅުން އިތުރު މަތީ ފެންވަރަކަށް ގެންދިއުމަށް ދެ ފަރާތުން ތައްޔާރުވަމުންދާ ކަމަށެވެ.
މި ބައްދަލުވުން ބޭއްވީ، ކެނެޑާގެ ޕްރައިމް މިނިސްޓަރު މާކް ކާނީ މި ހަފްތާގެ ކުރީކޮޅު ޔޫއެންގައި ވާހަކަ ދައްކަވަމުން، އިންޑިއާގެ ޕްރައިމް މިނިސްޓަރު ނަރެންދްރަ މޯދީ ޑިސެމްބަރު މަހު ކެނެޑާއަށް ޒިޔާރަތްކުރައްވަން އުންމީދުކުރެވޭ ކަމަށް ވިދާޅުވުމަށް ފަހުގައެވެ. އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި ކާނީ ވިދާޅުވީ، އިންޑިއާއާއެކު ކުރިއަށްދާ ވިޔަފާރީގެ މަޝްވަރާތަކުގައި ރަނގަޅު ކުރިއެރުމެއް ލިބެމުންދާ ކަމަށެވެ. މީހުންނާ މީހުންނާ ދެމެދު ގުޅުމާއި، ސަލާމަތާއި، ވިޔަފާރި ފަދަ ގިނަ ދާއިރާތަކުން މި ގުޅުމަކީ ވަރަށް މުހިންމު ގުޅުމެއް ކަމަށް ވެސް އެމަނިކުފާނު ވިދާޅުވިއެވެ.
މޯދީގެ ޒިޔާރަތާއި ހިލޭ ވިޔަފާރީގެ އެއްބަސްވުމުގެ ހާލަތާ ބެހޭގޮތުން ކުރެވުނު ސުވާލުތަކަށް ޖަވާބު ދެއްވަމުން ކާނީ ފާހަގަކުރެއްވީ، މި އަހަރުގެ ޖީ20 ސަމިޓާ ހަމައަށް މަޝްވަރާތައް ނިންމުމަށް މަސައްކަތްކުރުމަށް ދެ ޤައުމު ވަނީ ވޭތުވެދިޔަ އަހަރުގެ ޖީ20ގައި ވައުދުވެފަ ކަމަށެވެ. މި އެއްބަސްވުމުގެ ލަނޑުދަނޑިއަކީ 2030 ވަނަ އަހަރު ވާއިރަށް ދެ ޤައުމުގެ ވިޔަފާރި ދެގުނައަށް ވުރެ ގިނައިން އިތުރުކޮށް، އަހަރަކު 70 ބިލިއަން ކެނެޑިއަން ޑޮލަރަށް އެރުވުމެވެ. މި އަހަރުގެ ޖީ20 ސަމިޓު ޑިސެމްބަރު 14 އާއި 15 ގައި ފްލޮރިޑާގެ ޓްރަމްޕް ނޭޝަނަލް ޑޮރަލް މަޔާމީ ރިސޯޓުގައި ބާއްވަނީ އެމެރިކާގެ ރައީސް ޑޮނަލްޑް ޓްރަމްޕްގެ މެހެމާންދާރީގައެވެ.
ދެ ޤައުމުގެ ގުޅުން އަލުން ރަނގަޅުވަމުން މި އަންނަނީ ފާއިތުވި އަހަރުތަކުގައި ގުޅުން ވަރަށް ދަށް ހާލަތަކަށް ދިއުމަށް ފަހުގައެވެ. ކުރީގެ ޕްރައިމް މިނިސްޓަރު ޖަސްޓިން ޓްރޫޑޯގެ ދައުރުގައި ދެ ޤައުމުގެ ގުޅުން ވަރަށް ގޯސްވިއެވެ. ޚާއްޞަކޮށް، ބްރިޓިޝް ކޮލަމްބިއާގައި ކެނެޑާގެ ރައްޔިތެއް ކަމަށްވާ ހަރްދީޕް ސިންގް ނިއްޖަރު މަރާލި ހާދިސާއާއި އިންޑިއާގެ ސަރުކާރުގެ އެޖެންޓުންނާ ގުޅުމެއް ހުރިތޯ ކެނެޑާގެ ސެކިއުރިޓީ އިދާރާތަކުން ތަހުޤީޤުކުރަމުންދާ ކަމަށް 2023 ވަނަ އަހަރުގެ ސެޕްޓެމްބަރު މަހު ޓްރޫޑޯ ވިދާޅުވުމަށް ފަހުގައެވެ. އިންޑިއާއިން މި ތުހުމަތު ވަނީ ރައްދުކޮށްފައެވެ. މި ޚިލާފުގެ ސަބަބުން ދެ ޤައުމުން ވެސް ޑިޕްލޮމެޓުން ބޭރުކޮށް، ދެ ޤައުމުގެ މިޝަންތަކުގެ މުވައްޒަފުން ކުޑަކުރިއެވެ.
މި އަހަރުގެ ޖުލައި މަހު ރޯޔަލް ކެނެޑިއަން މައުންޓެޑް ޕޮލިހުން ވަނީ ނިއްޖަރު މަރާލި ހާދިސާއާ އިންޑިއާގެ ސަރުކާރުގެ މަސްއޫލުވެރިން ގުޅުވޭނެ އެއްވެސް ހެއްކެއް ނުފެންނަ ކަމަށް ބުނެފައެވެ.
2025 ވަނަ އަހަރުގެ މާރިޗު މަހު ކާނީ ޕްރައިމް މިނިސްޓަރުކަމަށް އިސްކުރެއްވުމާއެކު ދެ ޤައުމުގެ ގުޅުން މަޑުމަޑުން ރަނގަޅުވަމުން އަންނަނީއެވެ. ވޭތުވެދިޔަ އަހަރުގެ ޖޫން މަހު ކާނީ އާއި މޯދީ ވަނީ ސްޓެބިލިޓީ އަނބުރާ ގެނައުމަށް މަރުޙަލާވާރުކޮށް ފިޔަވަޅު އެޅުމަށް އެއްބަސްވެފައެވެ. އޭގެ ފަހުން ދެ ޤައުމުގެ ހައި ކޮމިޝަނަރުން އަނބުރާ މަޤާމުތަކަށް ގެނެސް، އިސް ފެންވަރުގެ ބައްދަލުވުންތަކެއް ބާއްވައިފިއެވެ. މި އަހަރުގެ މާރިޗު މަހު ދެ ސަރުކާރުން ވަނީ ގުޅުން ނޯމަލްކުރުމުގައި ފާހަގަކޮށްލެވޭ ކުރިއެރުމެއް ލިބިފައިވާ ކަމަށް ބުނެފައެވެ.
އިންޑިއާ ނިސްބަތްވާ، މައިންބަފައިން ތަމިލް ނާޑޫ އާއި ޕަންޖާބުން އައިސްފައިވާ އަނަންދު، 2025 ވަނަ އަހަރު ކެނެޑާގެ ފޮރިން މިނިސްޓަރުކަމަށް އައުމަށް ފަހު ޖައިޝަންކަރާ ގިނަ ފަހަރަށް ބައްދަލުކުރައްވާފައި ވެއެވެ.
ޔޫއެން ޖެނެރަލް އެސެމްބްލީގެ ސައިޑްލައިންގައި ޖައިޝަންކަރު ވަނީ ވެނެޒުއޭލާގެ ފޮރިން މިނިސްޓަރު ފެލިކްސް ޕްލަސެންސިއާ ގޮންޒާލެޒްއާ ވެސް ބައްދަލުކުރައްވާފައެވެ. މި ބައްދަލުވުން ބޭއްވީ އެނަރޖީ ލިބޭ މަސްދަރުތައް ގިނަކުރުމަށް އިންޑިއާއިން މަސައްކަތްކުރަމުންދާ ދުވަސްވަރެއްގައެވެ. ބައްދަލުވުމަށް ފަހު ޖައިޝަންކަރު ވިދާޅުވީ ދެ ޤައުމުގެ އެނަރޖީ ދާއިރާގެ އެއްބާރުލުން ފުޅާވަމުންދާ ކަމަށާއި، ސަރަހައްދީ މައްސަލަތަކާއި އެހެން ދާއިރާތަކުގެ އެއްބާރުލުމާ ބެހޭގޮތުން ވެސް މަޝްވަރާކުރެއްވި ކަމަށެވެ. އަދި ބެލަރޫސްގެ ފޮރިން މިނިސްޓަރު މެކްސިމް ރިޒެންކޮވް އާއި މެކްސިކޯގެ ފޮރިން މިނިސްޓަރު ރޮބާޓޯ ވެލަސްކޯ އަލްވަރޭޒްއާ ވެސް ޖައިޝަންކަރު ބައްދަލުކުރެއްވިއެވެ.
ކޮމެންޓު ފޮނުވާ