ރަސްމާލެ މަޝްރޫޢުގެ ދަށުން ޔޫއޭއީގެ އީގަލް ހިލްސް ކުންފުންޏަށް ބިން ދޫކުރުމަށް ސަރުކާރުން ވެފައިވާ އެއްބަސްވުން ބާތިލުކޮށްދިނުމަށް އެދި، ގާނޫނީ ވަކީލް އަލީ ހުސައިން ސުޕްރީމް ކޯޓަށް ދުސްތޫރީ މައްސަލައެއް ހުށަހަޅުއްވައިފިއެވެ. މި ކަން އޭނާ ހާމަކުރެއްވީ އެކްސްގައި ލިޔުއްވި ލިޔުމަކުންނެވެ.
މައްސަލަ ހުށަހަޅާފައިވަނީ ހައުސިންގ މިނިސްޓްރީއާއި އީގަލް ހިލްސް ދެމެދު 21 ސެޕްޓެމްބަރުގައި ސޮއިކުރި އެއްބަސްވުމާ ގުޅިގެންނެވެ. އެއްބަސްވުމުގެ ތަފްސީލު ސަރުކާރުން ހާމަނުކޮށްފި ނަމަވެސް، ރަސްމާލެއިން ހިއްކާ 500 ހެކްޓަރަށް ވުރެ ގިނަ ބިން، އަގަކާއި ކުއްޔަކާ ނުލައި 99 އަހަރަށް ކުންފުންޏަށް ދީފައިވާ ކަމަށާއި، ތަރައްގީކުރާ ތަންތަން ތިންވަނަ ފަރާތްތަކަށް ކުއްޔަށް ދިނުމުގެ ހައްގުވެސް ލިބިފައިވާ ކަމަށް މައްސަލައިގައި ބުނެފައިވެއެވެ.
ދައުލަތުގެ މުދާ ދޫކުރަންވާނީ ގާނޫނާ އެއްގޮތަށް ކަމަށް ގާނޫނުއަސާސީގެ 250 ވަނަ މާއްދާގައި ބުނާއިރު، މިފަދަ ގޮތަކަށް ބޭރުގެ ފަރާތަކަށް ބިން ދޫކުރެވޭނެ ގާނޫނީ އޮނިގަނޑެއް ނެތް ކަމަށް މައްސަލައިގައި ފާހަގަކޮށްފައިވެއެވެ. އަދި 251 ވަނަ މާއްދާގައި ކުލީގެ މުއްދަތަށް 99 އަހަރުގެ ހައްދެއް ކަނޑައަޅާފައިވީ ނަމަވެސް، ތިންވަނަ ފަރާތްތަކަށް ބިން ދޫކުރުމުގެ ހައްގު ދީފައިވުމުން ބިމުގެ މިލްކުވެރިކަން ދާއިމީކޮށް ބޭރުގެ ފަރާތްތަކަށް ލިބިދާނެ ކަމަށް ވެސް ބުނެފައިވެއެވެ.
މައްސަލަ ނިމެންދެން އެއްބަސްވުމަށް ޢަމަލުކުރުން ހުއްޓުވުމުގެ ވަގުތީ އަމުރަކަށް ވެސް އެދިފައިވާއިރު، އެއީ ދައުލަތަށް އިތުރު މާލީ އަދި ގާނޫނީ ބުރަތައް އުފެދުން ހުއްޓުވުމަށްޓަކައި ކަމަށް ބުނެފައިވެއެވެ.
ކޮމެންޓު ފޮނުވާ