ދުންފަތު ބޯ މީހުންނަށް ހާއްސަ ކިއޮސްކުތަކެއް މާލޭގެ ބައެއް މަގުތަކުގައި ގާއިމުކުރުމާ ބެހޭގޮތުން ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއި މާލެ ސިޓީ ކައުންސިލް މިއަދު މަޝްވަރާކޮށްފިއެވެ.
ކައުންސިލުން އެކްސްގައި ޝާއިޢުކުރި ޕޯސްޓެއްގައި ބުނީ، ދުންފަތުގެ ބޭނުމާ ދުރުހެލި މުޖުތަމަޢުއެއް ބިނާކުރުމަށް ކުރިއަށް ގެންދާ މަސައްކަތުގެ ބައެއްގެ ގޮތުގައި މި ބައްދަލުވުން ބޭއްވި ކަމަށެވެ.
މައްޗަންގޮޅި އުތުރު ދާއިރާގެ ކައުންސިލަރު ވިދާޅުވީ، މި ކިއޮސްކުތައް ބެހެއްޓުމަށް އެޗްޕީއޭއިން އެދިވަޑައިގެންނެވި ކަމަށާއި، މި މަސައްކަތް 2005 ވަނަ އަހަރުން ފެށިގެން ކުރަން އުޅުނު ނަމަވެސް މިހާތަނަށް އެކަން ނުކުރެވި އޮތް ކަމަށެވެ.
ދުންފަތާ ބެހޭ ގާނޫނުގެ ދަށުން، އެހެން މީހުން ބޯ ދުންފަތުގެ ދުމުން ރައްކާތެރިވުމުގެ ހައްޤު ކޮންމެ މީހަކަށް ލިބިދީފައިވެއެވެ. މި ހައްޤު ކަށަވަރުކުރުމަށް ބައެއް ތަންތާނގައި ދުންފަތު ބޭނުންކުރުން މަނާކޮށްފައި ވިޔަސް، ގަވާއިދާ އެއްގޮތަށް އެކަން ތަންފީޒުކުރެވެމުން ނުދެއެވެ.
ކޮމެންޓު ފޮނުވާ