ޔުއެފާ ނޭޝަންސް ލީގުގައި އިސްރާއީލާ ދެކޮޅަށް ކުޅޭ ދެވަނަ މެޗުގައި ޓީމުން އަމަލުކުރާނެ ގޮތެއް އަދި ފުރިހަމައަށް ނިންމާފައި ނުވާ ކަމަށް އަޔަލެންޑްގެ ގައުމީ ޓީމުގެ ކޯޗު ހެއިމިރް ހާލްގްރިމްސަން ބުނެފިއެވެ. އައިރިޝް މީޑިއާއަށް ދިން އިންޓަވިއުއެއްގައި އޭނާ ބުނީ، ޣައްޒާގެ ހާލަތާ ގުޅިގެން ޓީމުގެ ކުޅުންތެރިން މި މެޗު ކުޅެން ތިބީ ނުރުހުމުގައި ކަމަށެވެ.
ހަންގޭރީގެ ދެބްރެސެންގައި ކުޅުނު ފުރަތަމަ މެޗު 3-0 އިން އަޔަލެންޑުން ކާމިޔާބުކުރީ، ކުޅުމަށް ޓީމުގެ ތެރެއިން ވޯޓުން ނިންމުމަށްފަހުއެވެ. އެ މެޗުގައި ކުޅުންތެރިން ކަޅު އަތުބޭންޑު އަޅައި، އިސްރާއީލުގެ ގައުމީ ސަލާމް ކުޅުނު ވަގުތު އިސްޖަހައިގެން ތިބިއިރު، ދެ ޓީމުން އަތުލައި ސަލާމްކުރުމާއި ދިދަ ބަދަލުކުރުން ވެސް ކޮށްފައެއް ނުވެއެވެ. ކޯޗު ބުނީ މި ކަންކަމުން ދުނިޔޭގެ ސަމާލުކަން މި މައްސަލައަށް އިތުރަށް ލިބުނު ކަމަށެވެ. ބުރާސްފަތި ދުވަހު ޑަބްލިންގައި އޮސްޓްރިއާއާ ކުޅޭ މެޗަށްފަހު، އިސްރާއީލު މެޗާ މެދު އިތުރަށް މަޝްވަރާކުރާނެ ކަމަށް ވެސް އޭނާ ބުންޏެވެ.
މި މެޗުތަކުގައި ބައިވެރިނުވުމަށް ނިންމައި، ގޯލްކީޕަރު ގޭވިން ބަޒޫނޫ ވަނީ ޓީމުން ނަން ނަގާފައެވެ. ކުޅުންތެރިންގެ މެދުގައި ތަފާތު ހިޔާލުތައް ހުރި ނަމަވެސް، ކޮންމެ މީހެއްގެ ހިޔާލަކަށް ވެސް އިހުތިރާމްކުރަން ޖެހޭ ކަމަށް ކޯޗު ބުންޏެވެ.
އިސްރާއީލު ސަސްޕެންޑްކުރުމަށް އަޔަލެންޑްގެ ފުޓްބޯޅަ އެސޯސިއޭޝަނުން ޔުއެފާއަށް ހުށަހެޅި ނަމަވެސް، ކާމިޔާބުވާވަރަށް ތާއީދު ލިބިފައެއް ނުވެއެވެ. އޮކްޓޯބަރު 4 ގައި އޮތް އަޔަލެންޑްގެ ހޯމް މެޗު ކުޅޭނީ ސާބިއާގެ ބެޗްކާ ތޮޕޯލާގައި، ސަޕޯޓަރުން ނުވައްދައެވެ. ޣައްޒާގައި ނަސްލުނައްތާލުމެއް ހިންގަމުންދާ ކަމުގެ ތުހުމަތު އިސްރާއީލުން ދޮގުކުރާ ނަމަވެސް، އދ. ގެ އިންކުއަރީ ކޮމިޝަނުން ވަނީ އެއީ ނަސްލުނައްތާލުމުގެ އަމަލުތައް ކަމަށް ނިންމާފައެވެ.
ކޮމެންޓު ފޮނުވާ