އިރާގުގައި އެމެރިކާގެ ސިފައިން ބާކީ ހުރި އެންމެ ފަހު އަސްކަރީ މަރުކަޒުތަކުން ބުދަ ދުވަހު ފައުޖުތައް ބޭލުމާއެކު، ވިހި އަހަރަށް ވުރެ ދިގު މުއްދަތެއްގައި އެ ގައުމުގައި އޮތް އެމެރިކާގެ އަސްކަރީ ހާޒިރީ ނިމުމަކަށް އަންނަނީ އެވެ. މި ހަނގުރާމައިގައި އެމެރިކާގެ 4,500 ސިފައިން ވަނީ ފުރާނަ ގެއްލިފަ އެވެ.
2024 ވަނަ އަހަރު ބައިޑަން ސަރުކާރުގެ ދައުރުގައި ވި އެއްބަސްވުމެއް މިހާރު ޓްރަމްޕް ސަރުކާރުން ތަންފީޒުކުރުމުން ކުރިއަށްދާ މި ފިޔަވަޅަކީ، އީރާނާއި އެ ގައުމުގެ ތާއީދު ލިބޭ ފަރާތްތަކަށް އިރާގުގައި ހުރަހެއް ނެތި ހަރަކާތްތެރިވެވޭނެ މަގު ފަހިވާ ކަމެއް ކަމަށް ސަލާމަތީ މާހިރުން ބުނެއެވެ. އައިއެސް ފަދަ ޖަމާއަތްތައް އަލުން ބާރުވެރިވެދާނެ ކަމުގެ ބިރު ވެސް އެބައޮތެވެ.
ސަލާމަތީ މާހިރު ޖާސިމް އަލް ބަހާދްލީ ވިދާޅުވީ، އީރާނުގެ ނުފޫޒަށް ހުރަސްއެޅުމަށް އޮތް އަސްކަރީ ބާރު ނެތިގެންދާތީ މިއީ ތެހެރާނަށް ލިބޭ ސްޓްރެޓީޖިކް ފައިދާއެއް ކަމަށެވެ. މީގެ ބޭނުން ހިފައިގެން އިރާގުގެ ސިޔާސީ އަދި ސަލާމަތީ ނިންމުންތަކުގައި އެ ޖަމާއަތްތަކުގެ ނުފޫޒު އިތުރަށް ވަރުގަދަކުރާނެ ކަމަށް ވެސް އޭނާ ލަފާކުރެއްވިއެވެ.
އީރާނުގެ ތާއީދު ލިބޭ "އިސްލާމިކް ރެސިސްޓެންސް އިން އިރާގު" ގެ ކޮމާންޑަރު އަބޫ މުޖްތަބާ އަލް ޔާސިރީ ރޮއިޓާސްއަށް ބުނީ، ސެޕްޓެމްބަރު 30 އަކީ އިރާގުގެ ތާރީޚުގެ ނުބައި ބާބެއް ނިމުނު ދުވަސް ކަމަށާއި، މިއީ އެމެރިކާގެ މަޝްރޫއު ނާކާމިޔާބުވި ދުވަސް ކަމަށެވެ.
ކޮމެންޓު ފޮނުވާ