މެލޭޝިއާގެ ކުރީގެ ބޮޑުވަޒީރު ޑރ. މަހާތިރު މުޙައްމަދުގެ އަނބިކަނބަލުން ޑރ. ސިތީ ޙަސްމާ މުޙައްމަދު ޢަލީ އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
ޑރ. މަހާތިރަށް ފޮނުއްވި މެސެޖުގައި ރައީސް ފާހަގަކުރެއްވީ، ޑރ. ސިތީ ޙަސްމާއަކީ މެލޭޝިއާގެ އެންމެ ފުރަތަމަ އަންހެން ޑޮކްޓަރުންގެ ތެރޭގައި ހިމެނިވަޑައިގެންނެވި، މައިންގެ ޞިއްޙަތާއި އާއިލާ ރޭވުމަށް ވަކާލާތުކުރެއްވި ބޭފުޅެއްކަމެވެ. މިންތީގެ ހަމަހަމަކަމާއި އާއިލާތަކުގެ ފުދުންތެރިކަން ކުރިއެރުވުމަށް އެކަމަނާ ކުރެއްވި މަސައްކަތްތަކުގެ ސަބަބުން، އެކަމަނާގެ ޒިކުރާ ޝުކުރުވެރިކަމާއި ޤަދަރުވެރިކަމާއެކު ހަނދާންކުރެވޭނެ ކަމަށްވެސް ރައީސް ވިދާޅުވިއެވެ.
ދިވެހި ސަރުކާރާއި ރައްޔިތުންގެ ނަމުގައި ޑރ. މަހާތިރާއި އާއިލާއަށް ތަޢުޒިޔާ އަރިސްކުރައްވައި، އާއިލާއާއި މެލޭޝިއާގެ ރައްޔިތުންނަށް ކެތްތެރިކަން ލިބި، މަރުޙޫމާއަށް ސުވަރުގެ މިންވަރުކުރެއްވުމަށް ރައީސް ދުޢާ ކުރެއްވިއެވެ.
އުމުރުފުޅުން 100 އަހަރުގައި އަވަހާރަވި ޑރ. ސިތީ ޙަސްމާއާއި ޑރ. މަހާތިރުގެ ކައިވެނިފުޅަށް މިދިޔަ އޮގަސްޓު މަހު 70 އަހަރު ފުރިފައިވާއިރު، ހަތް ދަރިކަލުން ތިއްބަވައެވެ. އެކަމަނާ ފަސްދާނުވަޑައިގަންނަވާނީ ޕުތުރަޖާޔާގެ ޤަބުރުސްތާނެއްގައި ކަމަށް ޑރ. މަހާތިރުގެ އޮފީހުން ބުނެފައިވެއެވެ.
ކޮމެންޓު ފޮނުވާ