ބްރިކްސް ސަމިޓަށް ބަންގްލަދޭޝްގެ ބޮޑުވަޒީރު ތާރިޤް ރަޙްމާނަށް އިންޑިއާއިން ދައުވަތު ދީފި

ބިމްސްޓެކްގެ މިހާރުގެ ޗެއަރގެ ހައިސިއްޔަތުން، ބަންގްލަދޭޝްގެ ބޮޑުވަޒީރު ތާރިޤް ރަޙްމާން، ކުރިއަށް އޮތް ބްރިކްސް ސަމިޓުގެ އައުޓްރީޗް ސެޝަނުގައި ބައިވެރިވެވަޑައިގަތުމަށް ދައުވަތު ދީފައިވާ ކަމަށް އިންޑިއާއިން އަންގާރަ ދުވަހު ބުނެފިއެވެ.

އިންޑިއާއިން ބްރިކްސްގެ އަހަރީ ސަމިޓް ބާއްވަނީ ސެޕްޓެމްބަރު 12 އަދި 13 ގައި ނިއު ދިއްލީގައެވެ. މި ސަމިޓުގައި ދުނިޔެއަށް ކުރިމަތިވެފައިވާ ބޮޑެތި ގޮންޖެހުންތަކާ ބެހޭ ގޮތުން، ޚާއްޞަކޮށް ހުޅަނގު އޭޝިއާގެ ކާރިސާގެ އިޤްތިޞާދީ އަސަރުތަކާ ބެހޭ ގޮތުން، ފުޅާ ދާއިރާއެއްގައި މަޝްވަރާ ކުރެވޭނެ ކަމަށް ބެލެވެއެވެ.

އިންޑިއާގެ ޚާރިޖީ ވުޒާރާގެ ތަރުޖަމާނު ރަންދީރު ޖައިސްވާލް ވިދާޅުވީ ފެބްރުއަރީ މަހު ތާރިޤް ރަޙްމާން ބޮޑުވަޒީރު ކަމުގެ މަޤާމާ ހަވާލުވެވަޑައިގަތުމަށްފަހު، އިންޑިއާއަށް ދެ ޤައުމުގެ ދެމެދު ދަތުރެއް ކުރެއްވުމަށް ދައުވަތު އެރުވިފައިވާ ކަމަށެވެ.

"ބްރިކްސް ސަމިޓަށް ބަލާއިރު، ބިމްސްޓެކްގެ މިހާރުގެ ޗެއަރގެ ހައިސިއްޔަތުން، 18 ވަނަ ބްރިކްސް ސަމިޓުގެ އައުޓްރީޗް ސެޝަނުގައި ބައިވެރިވެވަޑައިގަތުމަށް ބަންގްލަދޭޝްގެ ބޮޑުވަޒީރަށް އިންޑިއާއިން ވަކިން ދައުވަތު ދީފައިވޭ،" ޖައިސްވާލް ނޫސްވެރިންނަށް މަޢުލޫމާތު ދެއްވަމުން ވިދާޅުވިއެވެ.

"މި ދައުވަތު ދެވިފައިވަނީ ބްރިކްސްގެ އައުޓްރީޗް ސެޝަންތަކުގައި ޢާންމުކޮށް ޢަމަލުކުރެވޭ އުޞޫލުގެ މަތިންނެވެ. ސަރަޙައްދީ ޖަމާޢަތްތަކުގެ އެހެން ވެރިންނަށްވެސް މި ފަދައިން ދައުވަތު ފޮނުވިފައިވާނެ،" އޭނާ ވިދާޅުވިއެވެ.

ބްރިކްސް ސަމިޓް ބާއްވަނީ އިންޑިއާއިން މި ޖަމާޢަތުގެ މިހާރުގެ ޗެއަރގެ ހައިސިއްޔަތުންނެވެ.

މި ސަމިޓުގައި ބައިވެރިވެވަޑައިގަންނަވާނެ ބޮޑެތި ވެރިންގެ ތެރޭގައި ޗައިނާގެ ރައީސް ޝީ ޖިންޕިންގް، އީރާނުގެ ރައީސް މަސްޢޫދު ޕެޒެޝްކިއާން އަދި ރަޝިޔާގެ ރައީސް ވްލަޑިމިއަރ ޕޫޓިން ހިމެނިވަޑައިގަންނަވައެވެ.

ބްރިކްސް އަކީ ފުރަތަމަ ބްރެޒިލް، ރަޝިޔާ، އިންޑިއާ، ޗައިނާ އަދި ދެކުނު އެފްރިކާ ހިމެނުނު ޖަމާޢަތެއް ނަމަވެސް، 2024 ވަނަ އަހަރު މިޞްރު، އިތިއޯޕިއާ، އީރާން އަދި ޔޫއޭއީ މި ޖަމާޢަތާ ގުޅި، 2025 ވަނަ އަހަރު އިންޑޮނޭޝިއާ ވެސް ގުޅިފައިވެއެވެ.

ބްރިކްސް އަކީ ދުނިޔޭގައި އިޤްތިޞާދީ ގޮތުން ކުރިއަރަމުން އަންނަ 11 ޤައުމު ގުޅިގެން އުފައްދާފައިވާ ބާރުގަދަ ޖަމާޢަތެކެވެ. މި ޖަމާޢަތުގައި ދުނިޔޭގެ އާބާދީގެ ގާތްގަނޑަކަށް 49.5 އިންސައްތަ، ދުނިޔޭގެ ޖީޑީޕީގެ ގާތްގަނޑަކަށް 40 އިންސައްތަ އަދި ދުނިޔޭގެ ވިޔަފާރީގެ ގާތްގަނޑަކަށް 26 އިންސައްތަ ހިއްސާ ކުރެއެވެ.

ބްރިކްސްގައި ނުހިމެނޭ އެތައް ޤައުމެއްގެ ވެރިންނަށްވެސް އިންޑިއާއިން ވަނީ މި ސަމިޓުގެ އައުޓްރީޗް ސެޝަނުގައި ބައިވެރިވުމަށް ދައުވަތު ދީފައެވެ.

ބިމްސްޓެކް (ބޭ އޮފް ބެންގާލް އިނިޝިއޭޓިވް ފޯ މަލްޓި-ސެކްޓޯރަލް ޓެކްނިކަލް އެންޑް އިކޮނޮމިކް ކޯޕަރޭޝަން) އަކީ އިންޑިއާ، ސްރީލަންކާ، ތައިލެންޑް، ބަންގްލަދޭޝް، މިޔަންމާ، ނޭޕާލް އަދި ބޫޓާން ހިމެނޭ ސަރަޙައްދީ ޖަމާޢަތެކެވެ.