ރާއްޖޭގައި ޑިވެލޮޕްމަންޓަލް ޕީޑިއެޓްރިކްސްގެ ދާއިރާއިން ޚިދުމަތްކުރެއްވި ފުރަތަމަ ދިވެހި ޑޮކްޓަރު، ޑރ. އާމިނަތު ފަޒްނާ އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފުން ހިތާމަ ފާޅުކުރައްވައި ތަޢުޒިޔާ ވިދާޅުވެއްޖެއެވެ.
ކެންސަރު ބައްޔަށް އައިޖީއެމްއެޗުގައި ފަރުވާ ހޯއްދަވަމުން ގެންދަވަނިކޮށް، އުމުރުފުޅުން އެންމެ 47 އަހަރުގައި ޑރ. ފަޒްނާ ދުނިޔެ ދޫކުރެއްވުމުގެ ޚަބަރު ލިބިވަޑައިގަތުމާ އެކު، ރައީސް މުޢިއްޒު މީސްމީޑިއާ މެދުވެރިކުރައްވައި ޙިއްޞާކުރެއްވި މެސެޖުގައި ވަނީ، ޑރ. ފަޒްނާގެ ޢާއިލާއަށާއި، ދަރުމަވަންތަ ހޮސްޕިޓަލާއި އައިޖީއެމްއެޗުގެ ހުރިހާ މުވައްޒަފުންނަށް، އަދި ރާއްޖޭގެ ޞިއްޙީ ޚިދުމަތްތެރިންނަށް ތަޢުޒިޔާ ދަންނަވާފައެވެ. މީގެ އިތުރުން، މަރްޙޫމާއަށް ސުވަރުގޭގެ ދާއިމީ ނިޢުމަތް މިންވަރުކުރައްވައި، މާތްﷲގެ ތަނަވަސް ރަޙްމަތްފުޅުގައި ލެއްވުމަށް އެދިވަޑައިގެން ރައީސް ވަނީ ދުޢާ ކުރައްވާފައެވެ.
ޑރ. ފަޒްނާއަކީ ކުޑަކުދިންގެ ހެދިބޮޑުވުމާ ބެހޭ ސުޕަޝެލިސްޓް ޑޮކްޓަރެއްގެ ގޮތުގައި ޤައުމަށް ޚިދުމަތްކުރެއްވި ފުރަތަމަ ދިވެއްސެވެ. މެލޭޝިއާ އަދި އެމެރިކާގެ ޔުނިވަރސިޓީތަކުން ޑިވެލޮޕްމަންޓަލް ޕީޑިއެޓްރީޝަން ދާއިރާއިން މަތީ ތަޢުލީމު ފުރިހަމަކުރެއްވުމަށްފަހު، 2024 ވަނަ އަހަރުގެ އޮކްޓޫބަރު މަހުގެ ތެރޭގައި އެ ކަމަނާ ވަނީ އައިޖީއެމްއެޗުގައި ބަލިމީހުން ބައްލަވަން ފައްޓަވާފައެވެ. އޯޓިޒަމް، އޭޑީއެޗްޑީ އަދި އުނގެނުމުގައި އުނދަގޫތައް ކުރިމަތިވާ ކުދިން ދެނެގަނެ، ފަރުވާ ފޯރުކޮށްދިނުމުގައި އެ ކަމަނާ ކޮށްދެއްވި މަސައްކަތްޕުޅު ފާހަގަކޮށްލެވެއެވެ. ބަލިމީހުންނާއި އެ މީހުންގެ ޢާއިލާތަކާ ދެމެދު ބަދަހި ގުޅުމެއް ބާއްވަވައި، އޯގާތެރިކަމާއެކު ޚިދުމަތް ދެއްވި ނަމޫނާ ޑޮކްޓަރެއްގެ ގޮތުގައި، ޑރ. ފަޒްނާގެ ނަންފުޅު ދިވެހި ޞިއްޙީ ދާއިރާގައި ފާހަގަކުރެވިގެންދާނެއެވެ.
ކޮމެންޓު ފޮނުވާ