ފީފާ ވޯލްޑް ކަޕްގައި އޮސްޓްރޭލިއާގެ މައްޗަށް 2-0 އިން ކުރިހޯދައި، މުބާރާތް ބާއްވާ އެމެރިކާއިން ނޮކްއައުޓް ބުރުގެ ޖާގައެއް ކަށަވަރުކޮށްފިއެވެ.
ގްރޫޕް ޑީގައި ކުޅުނު މި މެޗުން ލިބުނު މޮޅާއެކު އެމެރިކާ ވަނީ ޖުމްލަ ހަ ޕޮއިންޓާއެކު ގްރޫޕްގެ އެއްވަނައަށް އަރާފައެވެ. ސިއެޓްލްގައި ކުޅުނު މި މެޗުގައި އެމެރިކާއިން މޮޅު ކުޅުމެއް ދައްކާފައިވާއިރު، މިއީ މެކްސިކޯއަށްފަހު މުބާރާތުގެ ދެވަނަ ބުރަށް ދަތުރުކުރި ދެވަނަ ޓީމެވެ. މައުރީސިއޯ ޕޮޗެޓީނޯގެ އިރުޝާދުގެ ދަށުން ކުޅެމުން އަންނަ އެމެރިކާ ޓީމުން ވަނީ ފުރަތަމަ މެޗުގައި ޕެރަގުއޭ އަތުން 4-1 އިން މޮޅުވެ، އެ ޓީމުގެ ފޯމު ހިފަހައްޓާފައެވެ.
މެޗުގެ ފުރަތަމަ ލަނޑަކީ 11 ވަނަ މިނެޓުގައި އޮސްޓްރޭލިއާގެ ކެމަރަން ބާޖެސް އަތުން ބައިކޮޅަށް ވަން ލަނޑެކެވެ. މި ލަނޑު ވަދެފައިވަނީ އެމެރިކާގެ ފޯވާޑް ފޮލަރިން ބަލޯގަން ގޯލު ކުރިމައްޗަށް ނަގައިދިން ހުރަހެއް ދިފާއުކުރަން އުޅުމުގެ ތެރޭގައެވެ. އެމެރިކާގެ ދެވަނަ ލަނޑު ކާމިޔާބުކޮށްދިނީ ޑިފެންޑަރު އެލެކްސް ފްރީމަންއެވެ. ފުރަތަމަ އޮފްސައިޑް ކަމަށް ނިންމި ނަމަވެސް، ވީއޭއާރްގެ އެހީގައި ރެފްރީ ގަބޫލުކުރި މި ލަނޑާއެކު އެމެރިކާއިން ވަނީ މެޗުގެ ނަތީޖާ އެއްކޮށް ކަށަވަރުކޮށްފައެވެ.
ނަތީޖާ ބަދަލުކުރުމުގެ އުއްމީދުގައި އޮސްޓްރޭލިއާގެ ކޯޗު ޓޯނީ ޕޮޕޮވިޗް ދެވަނަ ހާފު ފެށުމުގެ ކުރިން ތިން ބަދަލެއް ގެނައި ނަމަވެސް، އެމެރިކާގެ ގޯލްކީޕަރު މެޓް ފްރީޒްއަށް ނުރައްކާކުރެވޭ ފަދަ ހަމަލާއެއް އުފެއްދިފައެއް ނުވެއެވެ. ގްރޫޕް ސްޓޭޖުގެ ފަހު މެޗުގައި ޖޫން 26 ވަނަ ދުވަހު ލޮސް އެންޖެލިސްގައި އެމެރިކާ ނުކުންނާނީ ތުރުކީއާ ދެކޮޅަށެވެ. އަދި ހަމަ އެދުވަހު އޮސްޓްރޭލިއާ ބައްދަލުކުރާނީ ޕެރަގުއޭއާއެވެ.
ކޮމެންޓު ފޮނުވާ