އާޖެންޓީނާގެ ފުރަތަމަ މެޗުގައި އަލްޖީރިއާ އަތުން 3-0 އިން މޮޅުވި މެޗުގައި ލިއޮނަލް މެސީ ވަނީ އޭނާގެ ފުރަތަމަ ވޯލްޑް ކަޕް ހެޓްރިކް ހަދާފައެވެ.
މެޗުގެ 76 ވަނަ މިނެޓުގައި ހެޓްރިކް ފުރިހަމަކޮށް، މެސީ ވަނީ ވޯލްޑް ކަޕްގައި އެންމެ ގިނަ ލަނޑު ޖެހުމުގެ ރެކޯޑް އޮންނަ ޖަރުމަނުގެ މިރޮސްލާވް ކްލޯސާއާ އެއްވަރުކޮށްފައެވެ.
މި ލަނޑުތައް އޭނާ ކާމިޔާބުކޮށްފައިވަނީ، މީގެ 20 އަހަރު ކުރިން ސާބިއާ އެންޑް މޮންޓެނީގްރޯއާ ދެކޮޅަށް އާޖެންޓީނާގެ ޖާޒީގައި ވޯލްޑް ކަޕްގައި އޭނާ ކުޅުނު ފުރަތަމަ މެޗާ ދިމާކޮށެވެ. އެ މެޗުގައިވެސް އޭނާ ވަނީ ލަނޑު ޖަހާފައެވެ. މި ހެޓްރިކާއެކު ވޯލްޑް ކަޕްގައި މެސީ ޖެހި ލަނޑުގެ ޖުމްލަ އަދަދު ވަނީ 16 އަށް އަރާފައެވެ.
މިއާއެކު ފާއިތުވި ވޯލްޑް ކަޕަށްވުރެ ރަނގަޅު ފެށުމެއް އާޖެންޓީނާއަށް ވަނީ ލިބިފައެވެ. މީގެ ހަތަރު އަހަރު ކުރިން ގަތަރުގައި ކުޅުނު މުބާރާތުގެ ފުރަތަމަ މެޗުން ސައުދީ އަރަބިއާ އަތުން ބަލިވި ނަމަވެސް، ފަހުން އެޓީމުން ވަނީ މުބާރާތް ކާމިޔާބުކޮށްފައެވެ.
އަންނަ ހަފްތާގައި އުމުރުން 39 އަހަރު ފުރޭ މެސީއަށް އިތުރު ދެ ލަނޑު ޖަހާނެ ފުރުސަތު ލިބުނެވެ. މުބާރާތުގެ ކުރިން އޭނާއަށް އަނިޔާގެ މައްސަލައެއް އުޅޭކަމަށް ބެލެވުނު ނަމަވެސް، މެޗުގައި އެފަދަ އެއްވެސް ނިޝާނެއް ފެނިފައެއް ނުވެއެވެ. އޭނާ ފޮނުވާލި އެއް ބޯޅަ ގޯލަށް ވަން ނަމަވެސް، ކުޑަ ތަންކޮޅެއް އޮފްސައިޑް ވުމުގެ ސަބަބުން އެއީ ގޯލެއް ނޫންކަމަށް ވަނީ ނިންމާފައެވެ. އަދި ދެވަނަ ހާފުގައި ފޮނުވާލި ހަމަލާއެއް ދިޔައީ ގޯލުގެ ހުރަސް ދަނޑިމަތިންނެވެ. ޑިފެންސްކުރުމުގައިވެސް އޭނާ ވަނީ އަލްޖީރިއާގެ ކުޅުންތެރިންނަށް އުނދަގޫތަކަކާ ކުރިމަތިކުރުވާފައެވެ.
އަލްޖީރިއާއަށް ލިބުނު އެންމެ ރަނގަޅު ފުރުސަތުގައި މެޗުގެ ކުރީކޮޅު ފަރެސް ޗައިބީ ޖެހި ގޯލު ވަނީ ވީއޭއާރް ބެލުމަށްފަހު އޮފްސައިޑް ކަމަށް ނިންމާފައެވެ. އޭގެ ކުޑަވަގުތުކޮޅެއް ފަހުން މެސީ ލަނޑު ޖެހިއިރު، މުޅި މެޗު ކޮންޓްރޯލްކުރީ އާޖެންޓީނާއިންނެވެ.
ވިދިވިދިގެން ދެވަނަ ފަހަރަށް ވޯލްޑް ކަޕް ކާމިޔާބުކުރުމުގެ އުންމީދުގައި އޮތް އާޖެންޓީނާ ދެން ކުޅޭނީ ހޯމަ ދުވަހު އޮސްޓްރިއާއާ ދެކޮޅަށެވެ. އަދި ޖޫން 27 ގައި ނުކުންނާނީ ޖޯޑަންއާ ދެކޮޅަށެވެ.
އަލްޖީރިއާ ހޯމަ ދުވަހު ޖޯޑަންއާ ދެކޮޅަށް ކުޅުމަށްފަހު، ގްރޫޕް ޖޭ ގެ ފަހު މެޗުގައި ޖޫން 27 ގައި ނުކުންނާނީ އޮސްޓްރިއާއާ ދެކޮޅަށެވެ.
ކޮމެންޓު ފޮނުވާ