ކޮންފްލިކްޓް ހަތްވަނަ ދުވަހަށް ވަދެއިރު އީރާނުގެ އެކި ސަރަހައްދުތަކަށް އިސްރާއީލުން ދެމުންދާ ހަމަލާތަކުގައި މަދުވެގެން 639 މީހުން މަރުވެފައިވާ ކަމަށް ވޮޝިންގޓަން ބޭސްޑް ހިއުމަން ރައިޓްސް އެކްޓިވިސްޓްސް ޖަމާޢަތުން ބުނެފިއެވެ.
2022 ވަނަ އަހަރު މަހްސާ އަމީނީގެ މަރާ ގުޅިގެން އީރާނުގައި ހިނގި ސަރުކާރު ދެކޮޅު މުޒާހަރާތަކުގެ ވަގުތުވެސް ތަފްސީލީ މަރުގެ ޢަދަދުތައް ދިން މި ޖަމާޢަތުން ބުނެފައިވަނީ، މިހާތަނަށް އިސްރާއީލުގެ ހަމަލާތަކުގައި މަރުވި ޖުމްލަ ޢަދަދުގެ ތެރޭގައި 263 އާންމުންނާއި ސެކިއުރިޓީ ފޯސްގެ 154 މެމްބަރުން ހިމެނޭކަން ދެނެގަނެފައިވާ ކަމަށެވެ.
މި ޖަމާޢަތުން ބުނީ، މަރުވި މީހުންގެ ޢަދަދުތައް އީރާނުގެ ލޯކަލް ރިޕޯޓްތަކާ އެއްގޮތްތޯ ބަލައި، އެ ޤައުމުގައި ތަރައްޤީކޮށްފައިވާ ސޯސް ނެޓްވޯކަކާ އަޅާކިޔައިފައިވާ ކަމަށެވެ.
އިސްރާއީލުން އީރާނަށް ދެމުންދާ ވަރުގަދަ ހަމަލާތަކުގެ ތެރޭގައި އީރާނުން ގަވާއިދުން މަރުގެ ޢަދަދުތައް ދީފައެއް ނުވެއެވެ. އެންމެ ފަހުގެ އަޕްޑޭޓްގައި އިސްރާއީލުގެ ހަމަލާތަކުގައި 224 މީހުން މަރުވެ، 1,277 މީހުން ޒަޚަމްވެފައިވާކަމަށް އީރާނުން ބުނެފައިވެއެވެ.
ކޮމެންޓު ފޮނުވާ