އެމެރިކާގެ ރައީސް ޑޮނަލްޑް ޓްރަމްޕް އީރާނަށް ހަމަލާ ދިނުމުގެ ޕްލޭންތައް ފާސްކޮށްފައިވީ ނަމަވެސް، އެ ޤައުމަށް ހަމަލާ ދޭން އެންމެ ފަހުގެ ނިންމުމެއް އަދި ނުނިންމާކަމަށް ބައިނަލްއަގުވާމީ މީޑިއަތަކުން ރިޕޯޓު ކޮށްފިއެވެ.
ސީނިއަރ އިންޓެލިޖެންސް މަސްދަރިތަކުން ސީބީއަށް މައުލޫމާތު ދީފައިވާ ގޮތުގައި، އެމެރިކާއިން އީރާނަށް ހަމަލާ ދިނުން ފަސްކޮށްފައި ވަނީ، އީރާން އެ ޤައުމުގެ ނިއުކްލިއަރ ޕްރޮގްރާމް ދޫކޮށްލަން އެއްބަސްވުމަށް ފުރުސަތު ދިނުމުގެ ގޮތުންނެވެ. ޓްރަމްޕް ވިސްނަމުން ދާކަމަށް ރިޕޯޓު ކުރެވެނީ އީރާނުގެ ފޯޑޯ ނިއުކުލިއަރ މަރުކަޒަށް އެމެރިކާއިން ހަމަލާ ދިނުމަށެވެ. މިއީ އީރާނުގައި ބިމު އަޑިގައި ހުންނަ ޔުރޭނިއަމް އެންރިޗްމަންޓް ފެސިލިޓީއެކެވެ.
އީރާނުގެ ސުޕްރީމް ލީޑަރު އާޔަތުﷲ ޢަލީ ޚާމެނެއީ ބުދަ ދުވަހު ބުނެފައިވަނީ އަމާން ދިނުމަށް އެމެރިކާއިން ދިން އިންޒާރަށް ބޯ ނުލަބާނެ ކަމަށެވެ. އެ ދުވަހު އެމެރިކާ ރައީސް ޓްރަމްޕް ވިދާޅުވެފައި ވަނީ އޭނާގެ ކެތްތެރިކަން ކޮޅުން ލާފައިވާ ކަމުގައެވެ.
އީރާނު ހަނގުރާމާގައި ބައިވެރިވުމާ ބެހޭ ސުވާލަކަށް ޖަވާބު ދެއްވަމުން ބުދަ ދުވަހު ޓްރަމްޕް ވިދާޅުވެފައިވަނީ، "އަހަރެން ކުރާނެ، ނުކުރާނެވެސް" ނޭގޭ ކަމުގައެވެ. އަދި ޚާމެނެއީ ވަނީ ބުދަ ދުވަހު ރެކޯޑު ކުރި ތަޤްރީރެއްގައި ޓްރަމްޕަށް ފާޑު ކިޔައި، "އެމެރިކާގެ ކޮންމެ އަސްކަރީ ހަމަލާއަކުންވެސް" ދައްކަންޖެހޭ އަގު ބޮޑު ވާނެ ކަމުގައެވެ. "އީރާނު ޤައުމު ގުރުބާން ކޮށް ނުލެވޭނެ" ކަމަށް ވެސް ޚާމެނެއީ ވިދާޅުވެފައި ވެއެވެ.
ކޮމެންޓު ފޮނުވާ