އިޒްރޭލާއި އިރާނުން ދަނީ ހުއްޓުމެއް ނެތި ހަމަލާ ބަދަލު ކުރަމުން

އިޒްރޭލުން އިރާނުގެ ވެރިރަށް ތެހެރާނަށް ހަމަލާދިން ފަހުން، އިރާނުން އަނެއްކާވެސް އެ ގައުމަށް ބަދަލު ހިފުމުގެ ގޮތުން ބެލިސްޓިކް މިސައިލުތަކެއް ފޮނުވާލައިފައެވެ. މި ދެ ގައުމުގެ ދެމެދުގައި ހިނގަމުންދާ ހަނގުރާމަ މިހާރު ވަނީ ވަރަށް ބޮޑަށް ހޫނުވެފައެވެ.

ލިބިފައިވާ މައުލޫމާތުތައް ދައްކާގޮތުން މިއަދު އިޒްރޭލުން ތެހެރާނުގެ އުތުރު ސަރަހައްދަށް ހަމަލާދިން ކަމަށާއި، އެ ސަރަހައްދުގައި ބޮޑެތި ގޮވުންތަކެއް އިވުނު ކަމަށް ރިޕޯޓުކުރެވެއެވެ. މި ހަމަލާތަކަށް ފަހު ވަރަށް ކުޑަ ވަގުތުކޮޅެއްގެ ތެރޭގައި އިރާނުން ވަނީ އިޒްރޭލަށް އަމާޒުކޮށް ބެލިސްޓިކް މިސައިލުތަކެއް ފޮނުވާލައިފައެވެ.

އިރާނުގެ މިސައިލު ހަމަލާތަކާ ގުޅިގެން އިޒްރޭލުގެ ސިފައިން ވަނީ އެ ގައުމުގެ ރައްޔިތުން އަވަހަށް ރައްކާތެރި ތަންތަނަށް ދިއުމަށް އިންޒާރުދީފައެވެ. މި ހަމަލާތައް ކުރިކަން އިރާނުގެ ސަރުކާރުގެ މީޑިއާތަކުން ވެސް ވަނީ ކަށަވަރު ކޮށްދީފައެވެ. އެހެންނަމަވެސް، މިސައިލުތައް އަމާޒުކުރީ އިޒްރޭލުގެ ކޮން ސަރަހައްދުތަކަކަށްކަން ސާފެއް ނުވެއެވެ.

މި ދެ ގައުމުގެ ދެމެދުގައި ފާއިތުވި ދެ ދުވަހުގެ ތެރޭގައި ހިނގި ހަމަލާތަކުގައި އިރާނުގެ 20 ކުޑަކުދިން ހިމެނޭގޮތަށް 80 މީހަކު ޝަހީދުވެ، 800 އަށް ވުރެ ގިނަ މީހުންނަށް އަނިޔާވެފައިވާ ކަމަށް ރިޕޯޓުތަކުން ދައްކައެވެ.

އިޒްރޭލު ސަރުކާރުން ހާމަކުރި މައުލޫމާތުގައި، އިރާނުގެ ހަމަލާތަކުގައި އެ ގައުމުގެ 13 މީހަކު މަރުވެ، 380 މީހުންނަށް އަނިޔާވެފައިވާ ކަމަށް ބުނެފައިވެއެވެ. މީގެ ތެރެއިން 9 މީހެއްގެ ހާލަތު ނުހަނު ސީރިއަސް ކަމަށް ވެސް އިޒްރޭލުގެ އޮފިޝަލުން ބުނެފައިވެއެވެ.

މި ދެ ގައުމުގެ ދެމެދުގައި ދިގުލައިގެން ހިނގަމުންދާ ހަނގުރާމައިގެ ސަބަބުން މުޅި މެދުއިރުމަތީ ސަރަހައްދުގެ ހާލަތު މިހާރު ވަނީ ވަރަށް ބޮޑަށް ގޯސްވެފައެވެ.