އީރާނަށް ހަމަލާދިނުމަށް އިސްރާއީލުން ބޭނުންކުރަމުންދާ ބޮން އަޅާ 10 ޖެޓް އިރާނުގެ އެކި ސަރަހައްދުތަކަށް ވައްޓާލާފައިވާކަަމަށް އެގައުމުން ބުނެފިއެވެ. އެހެންނަމަވެސް ބައިނަލް އަގުވާމީ މީޑިއާތަކުން މި ވާހަކަތައް ކަށަވަރު ކޮށްދީފައެއް ނުވެއެވެ. އަދި އިސްރާއީލުން ވަނީ މިއީ "ފޭކް" ޚަބަރުތަކެއް ކަމަށް ބުނެފައެވެ.
އިރާނުގެ އެކި ނޫސްތަކުން ރިޕޯޓު ކޮށްފައިވާ ގޮތުގައި އިރާނުން އިސްރާއީލުގެ އެފް-35 ޖެޓެއް – ދުނިޔޭގެ އެންމެ ކުރިއަރާފައިވާ ޖެޓުތަކުގެ ތެރެއިން ޖެޓެއް – ވަނީ ވައްޓާލާފައެވެ. ނަމަވެސް މި ޚަބަރު އިރާނުގެ ސިފައިން ރަސްމީކޮށް ޔަގީން ކޮށްދީފައެއް ނުވެއެވެ.
ރަސްމީ ނޫސް އެޖެންސީ އައި.އާރް.އެން.އޭ އާއި ތަސްނީމް އަދި ޓައިމްސް އޮފް ޓެހެރާން ފަދަ އެހެން މަސްދަރުތަކުން މި ޚަބަރު ރިޕޯޓު ކޮށްފައިވަނީ އިރާނުގެ ސިފައިން އިރާނުގެ ޕަބްލިކް ޓީވީއަށް ދިން ބަޔާނަކަށް ހަވާލާ ދީގެންނެވެ.
ވައްޓާލި ކަމަށް ބުނާ ޖެޓުގެ ޕައިލެޓުންގެ ހާލު ބެހޭ ގޮތުން ޚިލާފު ރިޕޯޓުތައް ވެސް ވެއެވެ. ބައެއް މީޑިއާތަކުން ބުނާ ގޮތުގައި ޕައިލެޓުން އީޖެކްޓް ވުމަށްފަހު ހައްޔަރު ކުރެވިފައިވާ އިރު، އެހެން ބައެއް މީޑިއާތަކުން ބުނަނީ އޭނާ ގެއްލިފައިވާ ކަމަށެވެ.
ވައްޓާލި ކަމަށް ބުނާ ޖެޓުގެ އެއްވެސް ފޮޓޯއެއް ނުވަތަ ވީޑިއޯއެއް އަދި ހާމަކޮށްފައެއް ނުވެއެވެ. އިރާނުގެ ޕަބްލިކް ޓީވީން މި ހާދިސާ ބެހޭ ގޮތުން ދެއްކި ރިޕޯޓުގައި ބޭނުން ކޮށްފައިވަނީ އެފް-35 ޖެޓުތަކުގެ އާންމު ވީޑިއޯތަކެވެ.
މި ދެ ގައުމުގެ ދެމެދު ހަނގުރާމަ ފެށުނު ފަހުން، ސޯޝަލް މީޑިއާ ބޭނުން ކުރާ މީހުން އިސްރާއީލުގެ ވައްޓާލާފައިވާ ޖެޓުތައް ކަމަށް ބުނެ ސައްހަނޫން ފޮޓޯތައް ޝެއާ ކުރަމުން ދެއެވެ.
އިރާނުން ހަގީގަތުގައި ވެސް އެފް-35 އެއް ވައްޓާލާފައިވާ ނަމަ، އެއީ އިސްރާއީލަށް ވަރަށް ބޮޑު ގެއްލުމަކަށް ވާނެއެވެ. އިސްރާއީލުން ބުނާ ގޮތުގައި އިރާނުގެ އެއާ ޑިފެންސް ސިސްޓަމް ނައްތާލުމަށްފަހު އިރާނުގެ ވައިގެ ސަރަހައްދު މުޅިން ކޮންޓްރޯލް ކުރަނީ އިސްރާއީލުންނެވެ.
އިއްޔެ، އިސްރާއީލުގެ ސިފައިންގެ ތަރުޖަމާނަކު އިސްރާއީލުގެ ޖެޓުތައް ވައްޓާލި ކަމުގެ ކުރިން ގެނެސްދީފައިވާ ރިޕޯޓުތައް ދޮގު ކޮށް، ބުނެފައިވަނީ އެއީ "ދޮގު ހަދާ އިރާނުގެ މީޑިއާ" ގެ ވާހަކަތައް ކަމުގައެވެ.
އިސްރާއީލުން މިރޭ ވަނީ އިރާނުގެ ބުޝެހްރު ޕްރޮވިންސްގައި ހުންނަ ގޭސް ކާރުހާނާއަކަށް ޑްރޯން ބޭނުންކޮށްގެން ހަމަލާދީފައެވެ.
މި ހަމަލާގައި ޓާގެޓްކޮށްފައިވަނީ ބުޝެހްރު ޕްރޮވިންސްގެ ދެކުނުގައި ޤާއިމުކޮށްފައިވާ ސައުތު ޕާސް ގޭސް ކާރުހާނާގެ ފޭސް 14 ކަމަށް ރިޕޯޓްތަކުން ހާމަވެއެވެ. މިއީ ދުނިޔޭގެ އެންމެ ބޮޑު ގޭސް ފީލްޑުގައި ހިމެނޭ ކާރުހާނާއެކެވެ.
ހަމަލާގެ ސަބަބުން އެ ސަރަހައްދުގައި ބޮޑު އަލިފާންގަނޑެއް ރޯވި ކަން ވީޑިއޯތަކުން ފެނެއެވެ. މިވަގުތު ފަޔާ ފައިޓަރުން އަލިފާން ނިއްވާލުމުގެ މަސައްކަތް ކުރަމުން ގެންދާ ކަމަށް ރިޕޯޓުތަކުން ބުނެއެވެ.
އިރާނުގެ އޮފިޝަލަކު އަލްޖަޒީރާއަށް މަޢުލޫމާތު ދެމުން ބުނީ، ފޭސް 14 ގޭސް ރިފައިނަރީގެ އެއް ބަޔަށް ގެއްލުން ލިބުނު ނަމަވެސް، އެހާ ބޮޑު ގެއްލުމެއް ނޫން ކަމަށެވެ. ހަމަލާގައި ފަޖްރު ޖޭމް ރިފައިނަރީއަށް ވެސް ކޮންމެވެސް ވަރެއްގެ ގެއްލުން ލިބިފައިވާ ކަމަށް އޭނާ ވަނީ ބުނެފައެވެ.
ނަމަވެސް މި ހަމަލާގެ ސަބަބުން ގޭސް ސަޕްލައިއަށް އަސަރެއް ނުކުރާ ކަމަށާއި، ގޭސް ފޮނުވުމުގެ މަސައްކަތް އާދައިގެ މަތިން ކުރިއަށްދާ ކަމަށް އިރާނުގެ އޮފިޝަލް ވަނީ ޔަޤީންކަން ދީފައެވެ.
ސައުތު ޕާސް ގޭސް ފީލްޑަކީ އިރާނާއި ގަތަރު ގުޅިގެން މިލްކުވެރިވާ ނެޗުރަލް ގޭސް އުފެއްދުމުގެ ޚާއްޞަ ސަރަހައްދެކެވެ. މި ސަރަހައްދުގައި ޤާއިމުކޮށްފައިވާ ކާރުހާނާތަކަކީ އިރާނުގެ އިޤްތިޞާދަށް ނުހަނު މުހިންމު ތަންތަން ކަމުގައި ބެލެވެއެވެ.
ކޮމެންޓު ފޮނުވާ