އިސްރާއީލުން އީރާނަށް ދެމުންދާ އުދުވާނީ ހަމަލާތަކުގެ ރައްދުގައި އިރާނުން އިސްރާއީލަށް ދެމުންދާ ހަމަލާތަކުގައި އަންހެނަކު މަރުވެ 60 އަށްވުރެ ގިނަ މީހުންނަށް އަނިޔާވެފައިވާ ކަމަށް އިސްރާއީލުގެ އޮފިޝަލުން ބުނެފިއެވެ. އަނިޔާވި މީހުންގެ ތެރެއިން ބައެއް މީހުންގެ ހާލު ނާޒުކު ކަމަށްވެސް ރިޕޯޓުތަކުން ހާމަވެއެވެ.
އިސްރާއީލުން އިއްޔެ އިރާނަށް ދިން ހަމަލާތަކަށް ރައްދުދިނުމުގެ ގޮތުން އިރާނުން ވަނީ ތިން ބުރަކަށް ބަހާލައިގެން މިސައިލު ހަމަލާތައް ދީފައެވެ. ފުރަތަމަ ބުރުގެ ހަމަލާތައް އިއްޔެ ހަވީރު ދިން ނަމަވެސް އިސްރާއީލާއި އުރުދުންގެ އެހީތެރިކަމާއެކު ވައިގެ ތެރޭގައި ގޮއްވާލެވުނު ކަމަށް ސަލާމަތީ ޚިދުމަތްތަކުން ބުނެއެވެ.
ރޭގެ ވަގުތުތަކުގައި އިރާނުން ދިން ދެވަނަ ބުރުގެ ހަމަލާތައް ހުއްޓުވުމަށް އިސްރާއީލަށް ދަތިވި ކަމާއި، ބައެއް މިސައިލުތައް އިސްރާއީލުގެ ބިމަށް ވެއްޓުނު ކަމަށް ރިޕޯޓުކުރެވެއެވެ. މި ހަމަލާތައް އަމާޒުވެފައިވަނީ އިސްރާއީލުގެ މިލިޓަރީ މަރުކަޒުތަކަށް ކަމަށާއި، އެ ސަރަހައްދުތަކުގެ އިމާރާތްތަކަށް ބޮޑެތި ގެއްލުންތައް ލިބުނު ކަމަށް އިސްރާއީލުގެ މީޑިއާތަކުން ހާމަކުރެއެވެ.
ތިންވަނަ ބުރުގެ ހަމަލާތައް ރޭ ފަތިހު ފެށިފައިވާއިރު، 1800 މިސައިލު ފޮނުވާލާފައިވާ ކަމަށް ބައެއް ރިޕޯޓުތަކުން ބުނެއެވެ. މި ހަމަލާތަކާ ގުޅިގެން އިސްރާއީލުގެ އެންމެހައި ސަރަހައްދުތަކުގައި ނުރައްކަލުގެ އެލާޓް ނެރެ، ރައްޔިތުން ރައްކާތެރި ތަންތަނަށް ގެންދިއުމަށް އެންގިފައިވެއެވެ. މިއަދު ހެނދުނުގެ ވަގުތުތަކުގައިވެސް މިސައިލުގެ ނުރައްކަލުގެ ސައިރަން އެކި ސަރަހައްދުތަކުން އަޑުއިވެމުންދިޔަ ކަމަށް ރިޕޯޓުކުރެވެއެވެ.
އިސްރާއީލުން އިއްޔެ އިރާނަށް ކުރި ހަމަލާތަކުގައި 78 މީހުން މަރުވެ، 320 މީހުންނަށް އަނިޔާވެފައިވާ ކަމަށް އިރާނުގެ އޮފިޝަލުން ބުނެފައިވެއެވެ. މި ހަމަލާތަކާއެކު މެދުއިރުމަތީގެ ސިޔާސީ ހާލަތު އިތުރަށް ގޯސްވެ، ދެ ގައުމުގެ ދެމެދުގައި ފުޅާ ދާއިރާއެއްގައި ހަނގުރާމައެއް ފެށިދާނެ ކަމުގެ ބިރު އުފެދިފައިވާކަމަށް ބައިނަލްއަގުވާމީ ޖަމާއަތްތަކުން ފާހަގަކުރެއެވެ.
ކޮމެންޓު ފޮނުވާ