ޔަމަނުގެ އާސަރުކާރު ހުވާ ކުރުމަށްފަހު އެބުރި ގައުމަށް ވަޑައިގަތް މަތިންދާ ބޯޓު ޔަމަނުގެ އަދަނުގެ އެއަރޕޯޓުގައި ޖެއްސުމުގެ ކުޑަ ވަގުތުކޮޅެއް ފަހުން، އެއަރޕޯޓުގައި ގޮއްވާލި ބޮމުގެ ހަމަލާގައި 22 މީހުން މަރުވެ، 50 މީހުންނަށް އަނިޔާ ވެފައިވާ ކަމުގައި، އެގައުމުގެ އިންޓީރިއަރ މިނިސްޓަރު ވިދާޅު ވެއްޖެއެވެ.
މި ހަމަލާ ދީފައިވަނީ، ކޮން ކަހަލަ ވަސީލަތެއް ބޭނުން ކޮށްގެން އަދި ޔަގީން ވެފައި ނުވާއިރު، މި ހަމަލާގެ ޒިންމާ އަދި އެއްވެސް ބަޔަކު އުފުލާފައެއް ނުވެއެވެ. އަދި މިހަމަލާގައި، ސަރުކާރުގެ އިސް އޮފިޝަލުން ގޮވައިގެން ދަތުރުކުރި މަތިންދާ ބޯޓަށްވެސް ގެއްލުމެއް ވެފައި ނުވާކަމަށް ޔަމަނުގެ އޮފިޝަލުން މައުލޫމާތު ދެއެވެ.
މިހަމަލާ ދިންތާ މަދު ވަގުތު ކޮޅެއްގެ ތެރޭގައި، މިފަދަ އިތުރު ހަމަލާތަކެއްވަނީ އަދަންގެ މާޝިގު ރިޔާސީ ގަޑުވަރު ހުންނަ ސަރަހައްދަށްވެސް އަމާޒު ކޮށްފައެވެ. އެއަރޕޯޓަށް ދެވުނު ހަމަލާތަކަށްފަހު، ބޮޑުވަޒީރު މައީން އަބުދުލް މާކިލާ، ޔަމަނަށް ކަޑައަޅާފައި ހުންނަވާ ސައުދީ ސަފީރުގެ އިތުރުން ކެބިނެޓް މެމްބަރުންގެވެސް ސަލާމަތަށް އެޅި ފިޔަވަޅެއްގެ ގޮތުން މިއެންމެންވެސް ގެންދެވިފައިވަނީ ޔަމުނުގެ ރިޔާސީ ގަޑުވަރަށެވެ.
ދެވަނައަށް މިދިން ހަމަލާގެ ޒިންމާވެސް މިހާތަނަށް އައިއިރު އެއްވެސް ބަޔަކު އުފުލާފައެއް ނުވެއެވެ.
އަދަންގެ އެއަރޕޯޓަށް ދިން ހަމަލާ ކުއްވެރި ކުރައްވަމުން، ޔަމަންގެ ބޮޑުވަޒީރު އަބުދުލް މާލިކް ވިދާޅުވެފައިވަނީ މިއީ ފިޑި އަމަލެއް ކަމުގައެވެ.
"މި ފިޑި، އަދި އަނިޔާވެރި އަމަލުގެ ސަބަބުން، ޔަމަނުގެ ސަރުކާރަށް އެމީހުންގެ ޒިންމާ ފުރިހަމަޔަށް އުފުލަށް އިތުރަށް މަޖުބޫރު ވެގެން ހިގައްޖެ، އެއީ، މި ބާޢާވާތް ނިމުމަކަށް ގެނެސް، ޔަމަގުގައި ގާނޫނީ ވެރިކަމެއް ގާއިމްކޮށް، ސުލްހަ މަސަލަސްކަން އިއާދަކޮށް، އަދި ޔަމުނުގެ އިގްތިސާދު ނަގާ ކޮޅަށް ޖެހުމުގެ މަސައްކަތް،" އޭނާ ވިދާޅު ވިއެވެ.
ޔަމަނުގެ އިންފޮމޭޝަން މިނިސްޓަރ މުއައްމާރު އަލް-އެރްޔާނީ ވިދާޅުވެފައި ވަނީ، މިގޮވުންތަކުގެ ޒިންމާ އުފުލަންޖެހޭނީ، އިރާނުން އެހީތެރި ވެދީގެން އެގައުމުގައި ވަކިވެގަތުމަށް ހަގުރާމަ ކުރަމުންދާ ހޫތީން ކަމުގައެވެ. އޭނާ އިތުރަށް ވިދާޅުވި ގޮތުގައި، މިހަމަލާގައި، ބޮންތައް ގޮއްވާލުމުގެ ކުޑަވަގުތު ކޮޅެއްކުރިން އެއަރޕޯޓުގައި ޖެއްސި މަތިންދާ ބޯޓުން ދަތުރު ކުރި، ސަރުކާރުގެ އެއްވެސް އޮފިޝަލަކަށް އަނިޔާއެއް ވެފައެއް ނުވެއެވެ.
ހޫތީން ވަނީ، މިހަމަލާގައި އެމީހުންގެ އެއްވެސް ބައިވެރިވުމެއް ނެތްކަމަށް ބުނެފައެވެ.
ބޮން ގޮއްވާލި ސަރަހައްދުގައި ތިބި އޮފިޝަލުން ބުނެފައިވާ ގޮތުގައި، މިހަމަލާގެ ސަބަބުން، މަރުވި މީހުންގެ ހަށިގަޑުގެ ބައިތައް އެކި ހިސާބުތަކަށް ބުރައިގެން ގޮސްފައި ވަނިކޮށް އެމީހުންނަށް ވަނީ ފެނިފައެވެ.
ޔަމަނުގައި އަލަށް އެކުލަވާލެވުނު ކެބިނެޓަށް އަމާޒުކޮށް މިދެވުނު ހަމަލާ ތުރުކީން ވަނީ ހަރުކަށި އިބާރާތުން ކުއްވެރި ކޮށްފައެވެ.
މިހަމަލާގެ އަމާޒުކަމަށް ބެލެވުނު މަތިންދާބޯޓުން ދަތުރި ބޭފުޅެއްކަމުގައިވާ އެގައުމުގެ ކޮމިއުނިކޭޝަން މިނިސްޓަރ ނަގުއިބް އަލް-އަވްގު ވިދާޅުވި ގޮތުގައި، މި ގޮވުންތަކުގެ އަޑު އިވުމާއެކު، އޭނާއަށް އެންމެ ފުރަތަމަ ހީކުރެވުނީ އެއީ ޑްރޯން ހަމަލާއެއް ކަމުގައި ކަމަށެވެ.
