ހުޅުމާލެ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ވަނީ ގެދޮރުވެރިޔާ/ބިންވެރިޔާ ސްކީމާ ގުޅޭ ޖިނާއީ ތަހުގީގަށް މަގުފަހިކުރުމަށް 15 މުވައްޒަފުން ވަޒީފާއިން ވަކިކޮށްފައެވެ. މި ފިޔަވަޅަކީ ޕްރޮސެކިއުޓަރ ޖެނެރަލް އައްބާސް ޝަރީފްގެ އަމުރަކަށް، ފުލުހުންނާއި އެންޓި-ކޮރަޕްޝަން ކޮމިޝަން (އޭސީސީ) ގުޅިގެން ކުރިއަށްގެންދާ ތަހުގީގާ ގުޅިގެން އެޅުނު ފިޔަވަޅެކެވެ.
ވަކިކުރެވުނު މުވައްޒަފުންގެ ތެރޭގައި ކުންފުނީގެ ޗީފް ފައިނޭންޝަލް އޮފިސަރު އަބްދުﷲ ފާއިދު އަދި ޗީފް ބިޒްނަސް އޮފިސަރާއި މީޑިއާ ޑިޕާޓްމަންޓްގެ ހެޑް އަހުމަދު ޔާމީން ހިމެނެއެވެ. މި ދެ އިސް މުވައްޒަފުން ވަނީ މީގެ ކުރިން، މިދިޔަ ބުރާސްފަތި ދުވަހު ވަޒީފާއިން ސަސްޕެންޑް ކުރެވިފައެވެ. ވަކިކުރެވުނު 15 މުވައްޒަފުންގެ ތެރެއިން އެއް މުވައްޒަފަކު ފިޔަވައި އެހެން ހުރިހާ މުވައްޒަފުންނަކީ ކުރީގެ މެނޭޖިންގ ޑިރެކްޓަރު އިބްރާހިމް ފަޒުލް ރަޝީދާ ގާތް ގުޅުން އޮންނަ ފަރާތްތަކެވެ.
މި މައްސަލަ ފެންމަތިވީ މިދިޔަ ބުދަ ދުވަހު، ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިންގ ޑިރެކްޓަރު މުހައްމަދު ފަޒީލް ރަޝީދަށް، ބިންވެރިޔާ ސްކީމްގެ ޝަރުތު ހަމަނުވާ ފަރާތްތަކުގެ ލިސްޓުގައި އޭނާގެ ނަން އޮތް ނަމަވެސް، ގޯތީގެ ރަޖިސްޓްރީއެއް ހަދައިދީފައިވާކަން ހާމަވުމާ ގުޅިގެންނެވެ. މި މައްސަލައިގައި ފަޒުލްގެ މައްޗަށް ތުހުމަތު ކުރެވުމާ ގުޅިގެން، އެޗްޑީސީގެ ބޯޑުގެ ޗެއާމަން އަހުމަދު ނާސިފް (ޑީޑީ) ފިޔަވައި އެހެން ހުރިހާ ބޯޑު މެންބަރުން ވަނީ ސަސްޕެންޑް ކުރެވި، އެ ފަރާތްތަކުގެ ޕާސްޕޯޓްތައް ހިފެހެއްޓިފައެވެ.
މި މައްސަލައާ ގުޅިގެން، އެޗްޑީސީގެ އާ މެނޭޖިންގ ޑިރެކްޓަރުގެ މަޤާމަށް ކުރީގެ ކޮންސްޓްރަކްޝަން މިނިސްޓަރު މައުރޫފް ޖަމީލް ވަނީ އައްޔަންކުރެވިފައެވެ. މައުރޫފަކީ ހުޅުމާލެ ހިއްކުމާއި ތަރައްޤީކުރުމުގައި އެންމެ އިސްކޮށް އުޅުއްވި އެއް ބޭފުޅާއެވެ. އޭނާ ވަނީ ކޮންސްޓްރަކްޝަން މިނިސްޓްރީގައި ހުންނަވައި ހުޅުމާލެ ޕްރޮޖެކްޓް ވިލަރެސްކުރައްވައި، ފަހުން ރައީސް އޮފީހުގެ ދަށުން އުފެއްދި ހުޅުމާލެ ޑިވެލޮޕްމަންޓް ޔުނިޓްގެ ޑިރެކްޓަރ ޖެނެރަލްގެ މަޤާމުވެސް ފުރުއްވާފައެވެ.
އެޗްޑީސީގެ ޗެއާމަން ނާސިފް ވިދާޅުވި ގޮތުގައި، ތަހުގީގަށް ފަހިވާގޮތަށް ކުންފުނީގެ ފަރާތުން އަޅަންޖެހޭ ފިޔަވަޅުތައް އަޅަމުންދާ ކަމަށާއި، ކުންފުނީގެ ޕަބްލިކް އިމޭޖް ރަނގަޅުކޮށް، ނަޒާހަތްތެރިކަން ދެމެހެއްޓުމަށް މަސައްކަތްކުރާނެ ކަމަށެވެ. އަދި ރައްޔިތުންގެ މަސްލަހަތު ހިމާޔަތްކުރެވޭ ގޮތަށް، ތަހުގީގަށް ފުރިހަމަ އެއްބާރުލުން ދޭނެކަމަށް އޭނާ ވިދާޅުވިއެވެ.
