ސީޕީ އަލީ ޝުޖާއު ވިދާޅުވެފައިވަނީ ބުރާސްފަތި ދުވަހު ހިނގި އަލިފާނުގެ ބޮޑު ހާދިސާގެ ތަހުގީގަށް ރާއްޖެއިން ބޭރުގެ އެހީ ހޯދުމަށް ނިންމާފައިވާ ކަމަށެވެ. މިއަދު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި، ތިން މިނިސްޓްރީއާއި މާލެ ސިޓީ ކައުންސިލްގެ އިދާރާގެ ބައެއްގައި ރޯވި އަލިފާނުގެ ހާދިސާއާ ގުޅޭގޮތުން މައުލޫމާތު ދެއްވަމުން، ސީޕީ ވިދާޅުވީ އަލިފާން ނިއްވުމުގެ މަސައްކަތުގައި ސިފައިންނަށް އެހީތެރިވުމަށް ފުލުހުންގެ އެންމެހާ ވަސީލަތްތައް ބޭނުންކުރެވުނު ކަމަށެވެ.
މި ބޮޑު ހާދިސާގެ ތަހުގީގު ފުލުހުން ކުރިއަށް ގެންދާނެކަމުގެ ޔަގީންކަން ދެއްވަމުން، ކުރިއަށް އޮތް ދެތިން ދުވަހުގެ ތެރޭގައި ރާއްޖެއިން ބޭރުގެ ތަހުގީގު ޓީމެއް ފުލުހުންގެ އިންވެސްޓިގޭޝަން ޓީމާއެކު މަސައްކަތްކުރުމުގެ އިންތިޒާމުތައް ހަމަޖެއްސުމަށް ސަރުކާރުގެ ކަމާބެހޭ ފަރާތްތަކާއެކު މަޝްވަރާކުރެވޭނެ ކަމަށް ސީޕީ ވިދާޅުވިއެވެ.
އަލިފާނުގެ ހާދިސާ ހިނގި ސަރަހައްދު މިހާރުވަނީ ފުލުހުންނާ ހަވާލުކުރެވިފައެވެ. ފުލުހުންގެ ފޮރެންސިކް ޓީމުތަކުން އެ ސަރަހައްދުގައި މަސައްކަތްކުރަމުންދާއިރު، ސީސީޓީވީ ފުޓޭޖްތައް ހޯދައި އެނަލައިޒްކުރުމުގެ މަސައްކަތްވެސް ކުރިއަށްދާ ކަމަށް ސީޕީ ވިދާޅުވިއެވެ. މީގެއިތުރުން، އަލިފާނުގެ ހާދިސާ އެންމެ ފުރަތަމަ ފެނުނު މީހުންނާއި އެވަގުތު އެތަނުގައި ތިބި މީހުންގެ އިތުރުން، އެހެން ފަރާތްތަކުގެ ބަޔާންތައްވެސް ނެގުމުގެ މަސައްކަތް ކުރިއަށްދާކަމަށް އޭނާ ވިދާޅުވިއެވެ. އަދި މިކަމާ ގުޅޭ އެންމެ ފުރިހަމަ މައުލޫމާތު ރައްޔިތުންނާ ހިއްސާކުރާނެކަމުގެ ޔަގީންކަންވެސް ސީޕީ ދެއްވާފައިވެއެވެ.
ކޮމެންޓު ފޮނުވާ