"ފަލަސްތީނާއެކު ކުޑަހުވަދޫ" މި ނަމުގައި ދ. ކުޑަހުވަދޫގައި އިއްޔެ ހާއްސަ ހިނގާލުމެއް ބާއްވައިފިއެވެ.
ކުޑަހުވަދޫގެ ގިނަ އަދަދެއްގެ ރައްޔިތުން ފަލަސްތީނުގެ ދިފާއުގައި ނުކުތީ އަޟްހާ އީދުގެ ހަރަކާތްތައް މެދުކަނޑާލުމަށް ފަހުގައެވެ.
މި އަހަރު ގައުމީ ފެންވަރުގައި އީދު ފާހަގަ ކުރާ ތިން ރަށްށުގެ ތެރެއިން އެއްރަށަކީ ކުޑަހުވަދޫއެވެ. އެ ރަށުގައި އީދު ފާހަގަ ކުރުމުގެ ގޮތުން ވަރަށް ގިނަ ހަރަކާތްތަކެއް ކުރިއަށް ގެންދިޔައެވެ. އަދި މި ހަރަކާތުގައި މި ހަރަކާތްތަކުގައި ދިވެހިބަހާއި ސަގާފަތާއި ތަރިކައާއި ބެހޭ ވަޒީރު އާދަމް ނަސީރު އިބްރާހީމް ވަނީ ބައިވެރިވެވަޑައިގެންފައެވެ.
ކުޑަހުވަދޫ ބޮޑެތި މަގުތަކުގައި ބޭއްވި ބޮޑު ހިނގާލުމުގައި ވެސް ވަޒީރު ބައިވެރިވެވަޑައިގެންނެވިއެވެ. މި ހިނގާލުމުގައި ވަނީ ފަލަސްތީނުގެ ދިދަ އާއި، ކުޑަހުވަދޫ ރައްޔިތުން ފަލަސްތީނާއެކު ތިބިކަން ހާމަކޮށްދޭ އެކިއެކި ޝުއޫރުތައް ދައްކުވައިދޭ ބެނާތައް ބޭނުންކޮށްފައެވެ.
ފަލަސްތީނުގެ ރައްޔިތުންނަށް އެހީވުމަށްޓަކައި ކުޑަހުވަދޫގައި ފަންޑު ފޮއްޓެއް ވެސް ހުޅުވިއެވެ.
ކުޑަހުވަދޫ ކައުންސިލުން ބުނީ ފަލަސްތީން ރައްޔިތުންގެ ހައްގުގައި ހިނގާލުމެއް ބޭއްވުމުގެ އެންމެ ބޮޑު މަގުސަދަކީ އަޟްހާ އީދުގެ މުނާސަބާ ފާހަގަކުރުމުގެ ތެރޭގައި ވެސް ފަލަސްތީނުގެ މުސްލިމު ރައްޔިތުންނާ އެކީ އެރަށުގެ ރައްޔިތުންނާއި ހުރިހާ ދިވެހި ރައްޔިތުން ތިބިކަން ދައްކުވައި ދިނުން ކަމަށެވެ.
ފަލަސްތީނަށް އެހީވުމުގެ ގޮތުން މިދިޔަ ބުދަ ދުވަހު މުޅި ރާއްޖޭގައި ޓެލެތޯނެއް ވެސް ބޭއްވިއެވެ. އެ ޓެލެތޯންގައި 13 މިލިއަނަށް ވުރެ ގިނަ ރުފިޔާ ލިބިފައިވެއެވެ.
