ގުނޫތު ނުވަތަ ގުނޫތުއްނާޒިލާއަކީ ދާއިމީކޮށް ފަރުޟު ފަސް ނަމާދުގައި ކިޔަން އޮންނަ ގުނޫތެއް ނޫން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ފަލަސްތީނުގެ ރައްޔިތުންނަށް ރައްކާތެރިކަން ދިނުމަށް އެދި ފަރުޟު ކޮންމެ ނަމާދެއްގައި ކިޔަން ފެށި ގުނޫތު ކިޔުން އިސްލާމިކް މިނިސްޓްރީން ވަގުތީ ވަނީ ހުއްޓާލައިފައެވެ. އެ ނިންމުން ނިންމުމަށް ހަމަޖެހިފައި ވަނީ މިއަދުގެ މަޣްރިބު ނަމާދުން ފެށިގެންނެވެ.
އެކަމާ ގުޅިގެން ސަރުކާރަށް އަމާޒުވަމުން އަންނަ ފާޑު ކިއުންތަކަށް ރައްދު ދެއްވައި ޝަހީމް ވިދާޅުވީ ގުނޫތު ދާއިމީކޮށް ފަރުޟު ފަސް ނަމާދުގައި ކިޔަން ނޯންނަ ކަމަށެވެ. ކީރިތި ރަސޫލާ ސައްލަ ﷲ އަލައިހި ވަސައްލަމަ މުސީބާތުގެ ވަގުތުގައި ގުނޫތު އެއް މަސް ދުވަސް ވަންދެން ކިއުއްވުމަށް ފަހު ދޫކޮށްލެއްވި ކަމަށް އޭނާ ވިދާޅުވިއެވެ.
"ގުނޫތު ނާޒިލާ ނޫނަސް އަބަދުވެސް ދުއާ ކުރެވޭނެ. ކޮންމެ ހުކުރު ހުތުބާއެއްގައި ވެސް ވާނީ ފަލަސްތީނަށްޓަކައި ދުއާ ހިމެނިފައި. އެކަން އެގޮތަށް ދެމިގެންދާނެ އިންޝާ ﷲ. އަދި އިތުރަށް ހާލަތު ގޯސްވެގެންދާ ނަމަ، ގުނޫތު އިއާދަވާނެ،" ޝަހީމް ވިދާޅުވިއެވެ.
ޝަހީމް ވިދާޅުވި ގޮތުގައި ސުންނަތް ގޮތަކީ މުސީބާތުގެ ވަގުތުގައި ގުނޫތު ކިއުމެވެ. އިއުލާންގައިވާ ގޮތަށް ގުނޫތު ކިއުން މެދުކަނޑާލާފައި ވަނީ ވަގުތީ ގޮތުން ކަމަށް ވެސް ޝަހީމް ފާހަގަ ކުރެއްވިއެވެ.
"ވީމާ މިފަދަ ދީނީ ކަމެއް ސިޔާސީ ކަމަކަށް ނުހެއްދެވުމަށް ނަސޭހަތްތެރިވަން،" ޝަހީމް ވިދާޅުވިއެވެ.
