ކުރިއަށް އޮތް ވިހިވަނަ ރައްޔިތުންގެ މަޖިލީހު ގައި ކުރެންދޫ ދާއިރާއަށް ވާދަ ކުރައްވަން، ހުޅުމާލޭ ދާއިރާގެ މެންބަރު އަލީ ނިޔާޒް ނިންމަވައިފި އެވެ.
ކުރެންދޫ ދާއިރާއަކީ ޕްރައިމަރީ ބާއްވަން ހަމަޖެހިފައިވާ ދާއިރާއެކެވެ. އެއީ އިތުރު ބޭފުޅަކު ވެސް އެމްޑީޕީގެ ޓިކެޓަށް އެދި އެދާއިރާއަށް ކުރިމަތިލައްވާފައި ވާތީއެވެ.
ނިޔާޒް މިއަދި ވިދާޅުވީ 18 ވަނަ މަޖިލީހާއި 19 ވަނަ މަޖިލީހަށް ފާދިއްޕޮޅު ކުރެންދޫ ދާއިރާގެ ރައްޔިތުންގެ އަގުލަބިއްޔަތު ދިނީ އެމްޑީޕީ އަށް ކަމަށެވެ. އަދި 20 ވަނަ މަޖިލީސް އަށް ވެސް އެ ދާއިރާ އިން ހޮވާނީ އެމްޑީޕީގެ ކެންޑިޑޭޓެއް ކަމަށެވެ.
ކުރެެންދޫ ދާއިރާގެ މިހާރުގެ މެންބަރަކީ އަބްދުލްޣަނީ އެވެ. އޭނާ އިންތިހާބުވީ އެމްޑީޕީގެ ޓިކެޓް ގައި ނަމަވެސް ދާދި ފަހުން އޭނާ ވަނީ ސަރުކާރު ހިންގާ ކޮންގްރެސް ޕާޓީއާ ގުޅިފައެވެ.
އެމްޑީޕީގެ މަޖިލީހަށް ޓިކެޓަށް ހުޅުވާލުމުން ގިނަ ބޭފުޅުންތަކެއް ކުރިމަތި ލާފައިވެ އެވެ. މަޖިލީހުގެ 93 ގޮނޑީގެ ތެރެއިން 35 ގޮނޑިއަކަށް ޕްރައިމަރީ އެއް ނެތި ޓިކެޓް ވަނީ ދީފައެވެ. އެއީ އެންމެ ބޭފުޅަކު ކުރިމަތިލައްވާފައިވާތީ އެވެ. އޭގެ ތެރޭގައި މަޖިލީހުގައި މިހާރު ހިމެނޭ 16 މެންބަރަކު ވެސް ހިމެނެ އެވެ.
