ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)އާއި އެ ކުންފުނީގެ ސަބްސިޑިއަރީ ކުންފުނިތަކުން، ރާއްޖޭގައި ކުރިޔަށް ގެންދާ "ފަލަސްތީން އެއިޑް ކެމްޕޭން" އަށް 1 މިލިއަން ރުފިޔާގެ ބޮޑު އެހީއެއް ވެދީފިއެވެ.
މި ފައިސާގެ ރަމްޒީ ޗެކް "ފަލަސްތީން އެއިޑް ކެމްޕޭން" އާއި ހަވާލު ކޮށްފައިވަނީ ރާއްޖޭގެ މީޑިއާތަކުން ގުޅިގެން ކުރިޔަށް ގެންދާ "އަހަރެމެން ފަލަސްތީނާއެކު" ޓެލެތޯންގައެވެ.
މިފައިސާގެ އެހީ ހަވާލުކުރުމަށް ޓެލެތޯންގައި ބޭއްވި ކުޑަ ރަސްމިއްޔާތެއްގައި ވާހަކަ ދައްކަވަމުން އެސްޓީއޯގެ މެނޭޖިން ޑިރެކްޓަރ ސައީދު ވިދާޅުވީ އެސްޓީއޯގެ 9 ސަބްސިޑިއަރީ ކުންފުނި ހިމެނޭ ކަމަށާއި، މިހުރިހާ ކުންފުންޏަކީ އެހާ އެކްޓިވް ކުންފުނިތައް ނޫންނަމަވެސް އޭގެ ތެރޭގައި ވަރަށް ހަރަކާތްތެރި ކުންފުނިތައްވެސް ހިމެނޭ ކަމަށެވެ. އެގޮތުން އޭނާ ފާހަގަ ކުރެއްވި ކުންފުނިތަކަކީ އެފްއެސްއެމް، މޯލްޑިވް ގޭސް، އެމްއެސްއެސް، އެލައިޑް އިންޝިއުރަންސް އަދި މިފްކޯއެވެ. އަދި އޭނާ ވިދާޅުވީ އެސްޓީއޯއަކީ ރަންތިންގެ ހިއްސާ އޮންނަ ޕަބްލިކް ކުންފުންޏެއް ކަމުގައެވެ.
އެސްޓީއޯގެ ފަރާތުން އެހީ ދެވިގެންދަނީ އެސްޓީއޯގެ މުޅި ގްރޫޕްގެ ހުރިހާ ސްޓާފުންނާއި ހިއްސާދަރުންނާ އަދި އެސްޓީއޯގެ ހެޑް އޮފް ޑިޕާޓްމަންޓްސް އެގްޒެކެޓިވްސް އާއި އެންމެހާ ބޭފުޅުންގެ ފަރާތުން. މި އެހީއަކީ ދިވެހިންގެ ތެރޭގައި ފަލަސްތީނަށް އޮންނަ ލޯބި ހާމަކުރުމަށް އަދި އެސްޓީއޯގެ ގްރޫޕްގައި މިކަމަށް ހާއްސަ ސަމާލުކަމެއް ދެވި، މިކަމަށް ކަންބޮޑުވުން އޮތްކަން ހާމަކުރުމަށް ދިން އެހީއެއް.
ސައީދު ވިދާޅުވިއެވެ.
ސައީދު އިތުރަށް ވިދާޅުވު މި އެހީގެ ސަބަބުން ޣައްޒާގައި ހާލުގައި ޖެހިފައިތިބި ރައްޔިތުންގެ ހާލަތު ރަގަޅު ކުރުމަށް އެސްޓީއޯގެ ހިއްސާދާރުން އެދިގެންތިބި މިންވަރު ވަރަށްވެސް ރަގަޅަށް ހާމަވެގެން ދާކަމުގައެވެ.
މިއަދުގެ ރަސްމިއްޔާތުގައި ވާހަކަ ދައްކަވަމުން އެސްޓީއޯގެ ސަބްސިޑިއަރީ ކުންފުންޏެއް ކަމުގައިވާ އެފްއެސްއެމްގެ މެނޭޖިން ޑިރެކްޓަރު މުހައްމަދު ގަސަމް ވިދާޅުވީ ޣައްޒާގެ ހާލުގައި ޖެހިފައިވާ ރައްޔިތުންނަށް އެހީވުމަށް އެސްޓީއޯގެ މެނޭޖިން ޑިރެކްޓަރ އިސްނަންގަވައިގެން ކުރެއްވި މަސައްކަތްތަކަށް އެފްއެސްގެ ޓީމުން ވަރަށްބޮޑު ޝުކުރެއް ދަންނަވާ ކަމުގައެވެ.
އިސްރާއީލުން ފަލަސްތީނުގެ ޣައްޒާއަށް ދެމުންދާ އުދުވާނީ ހަމަލާތަކުގައި ހާލުގައި ޖެހިފައިވާ ފަލަސްތީނު ރައްޔިތުންނަށް އެހީވުމަށް ރާއްޖޭގެ އެކި ކަންކޮޅުތަކުގައި ފުޅާ ދާއިރާއެއްގައި ދަނީ ޚާއްސަ ކެމްޕޭނެއް ހިންގަމުންނެވެ. މިކެމްޕޭނަށް ގިނަ ބައެއްގެ އެހީތެރިކަން ލިބެމުންދާކަން ފާހަގަ ކޮށްލެވެއެވެ.
