ރައްޔިތުންގެ މަޖިލީހުގެ އިދާރާ ހިންގުމަށް އަންނަ އަހަރަށް 187 މިލިއަން ރުފިޔާގެ ބަޖެޓެއް ހުށައަޅައި ކޮމިޓީގައި މަޝްވަރާކޮށްފިއެވެ.
މިއަދު ބޭއްވި ޢާންމު ކޮމިޓީއަށް ހުށައެޅި އަންނަ އަހަރަށް ލަފާކުރާ މަޖިލީހުގެ ބަޖެޓަކީ މި ހިނގަމުންދާ އަހަރުގެ ބަޖެޓަށްވުރެ ހަތަރު މިލިއަނެއްހާ ރުފިޔާގެ އިތުރު ބަޖެޓެކެވެ. މިއަހަރަށް މަޖިލީހުން ފާސްކޮށްފައިވަނީ 182 މިލިއަން ރުފިޔާގެ ބެޖެޓެކެވެ.
ކޮމިޓީގައި ވާހަކަފުޅު ދައްކަވަމުން މަޖިލީހުގެ ހެޑު އޮފް އެޑްމިނިސްޓްރޭޝަން އަޙްމަދު ފާއިޒް މުޙައްމަދު ވިދާޅުވީ، މިއަހަރަށްވުރެ އަންނަ އަހަރުގެ ބަޖެޓު ބޮޑުވާ މައިގަނޑު ސަބަބަކީ، އަންނަ 20 ވަނަ ރައްޔިތުންގެ މަޖިލީހުގައި ހިމެނިވަޑައިގަންނަވާނެ މެންބަރުންގެ ޢަދަދު އިތުވުމެވެ.
19 ވަނަ ރައްޔިތުންގެ މަޖިލީހުގައި ހިމެނިވަޑައިގަންނަވަނީ 87 މެންބަރުންނެވެ. ނަމަވެސް 20 ވަނަ މަޖިލީހުގައި 93 މެންބަރުން ހިމެނިވަޑައިގަންނަވާނެއެވެ.
ފާއިޒްވަނީ މަޖިލީހުގެ ކޮމިޓީ އެކުލަވާލުމުގައި ލަސްތަކެއް އައުމުން މަޖިލީހުގެ ބަޖެޓުއެކުލަވާލާ، އެ އިދާރާއިން ފިނޭންސް މިނިސްޓްރީއަށް މިހާރު ފޮނުއްވާފައިވާކަމަށް ވިދާޅުވެފައެވެ. ކޮމިޓީގައި ހުޅުދޫ ދާއިރާގެ މެންބަރު އިލްޔާސް ލަބީބު ވަނީ މަޖިލީހުގެ އިދާރާގެ މުވައްޒަފުންގެ މުސާރަ ބޮޑުކުރުމަށް ހުށައަޅުއްވާފައެވެ. އެހެން މެންބަރުންވެސް ވަނީ މަޖިލީހުގެ އިދާރާގެ މުވައްޒަފުންގެ މުސާރަ ބޮޑު ނުކުރާތާ 11 އަހަރުވެފައިވާކަން ފާހަގަކުރައްވާފައެވެ.
މިއާއެކު އެކަމަށް ރިޔާއަތްކޮށް ކޮމިޓީއަށް ރިޕޯޓެއް ހުށއަޅަން ކޮމިޓީން ފާސްކުރިއެވެ.
