ރިޔާސީ އިންތިހާބުގައި، ވޯޓުލުމަށް ފަހު ބާކީ ހުންނަ ވޯޓް ކަރުދާހާ މެދު އަމަލުކުރާނެ ގޮތަކާ މެދު ހިޔާލު ތަފާތުވުމުން އެކަމާ ބެހޭ ގޮތުން ސިޔާސީ ޕާޓީތަކާ މަޝްވަރާކުރުމަށް ފަހު ނިންމީ ބާކީ ކަރުދާސްތައް ޕަންޗުކޮށް ލޯވަޅެއް އަޅަން ކަމަށް އިލެކްޝަންސް ކޮމިޝަން (އީސީ) ގެ ނައިބު ރައީސް އިސްމާއިލް ހަބީބް ވިދާޅުވެއްޖެއެވެ.
ގާނޫނުގައި ބުނާ ގޮތުން، ބާކީވާ ވޯޓު ކަރުދާސް ވަގުތުން ނައްތައެއް ނުލެވޭނެއެވެ. އިދިކޮޅު ޕީޕީއެމަށް 2018 ގައި ނާކާމިޔާބުވި އިންތިހާބުގައި ބާކީ ވޯޓު ކަރުދާސްތައް ބޭނުންކޮށްގެން އޮޅުވާލާފައިވާ ކަމަށް ބުނެ އެ ޕާޓީން ތަކުރާރުކޮށް އައީ ވަގުތުން އެ ކަރުދާސްތައް ނައްތާލަން އެދެމުންނެވެ.
ހަބީބް ކުރެއްވި ޓުވީޓެއްގައި ވިދާޅުވީ ރިޔާސީ އިންތިޚާބު 2023ގެ ޤައުމީ ލަފާދޭ ކޮމިޓީގެ ދެ ވަނަ ބައްދަލުވުމުގައި ކޮމިޓީގެ މެންބަރުން ކޮމިޝަނަށް ދެއްވާފައިވާ ލަފާފުޅަށް ރިޢާޔަތްކުރައްވައި، ސެޕްޓެންބަރު 9 ގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ ވޯޓުނަގާ ނިމުމަށްފަހު، ބާކީ ހުންނަ ވޯޓުކަރުދާސްތައް ސެކިއުރިޓީ އުރައިގައި ބަންދު ކުރުމުގެ ކުރީން، އެ ކަރުދާސްތަކަކީ އިންވެލިޑް ވޯޓުކަރުދާސް ކަމުގައި ކަނޑައެޅުމުގެ ބޭނުމަށް ކެންޑިޑޭޓުންގެ ނަންބަރު ޖަހާފައިހުންނަ ފަރާތުން، ބާކީ ހުންނަ ވޯޓު ކަރުދާސްތައް ޕަންޗު ކުރައްވަން، އިންތިޚާބާ ގުޅިގެން ބޭއްވި 438 ވަނަ ޚާއްޞަ ޖަލްސާގައި ވަނީ ނިންމަވާފައި ވާކަމަށެވެ.
ރިޔާސީ އިންތިޚާބު 2023 ގެ ޤައުމީ ލަފާދޭ ކޮމިޓީގެ ދެ ވަނަ ބައްދަލުވުމުގައި ކޮމިޓީގެ މެންބަރުން ކޮމިޝަނަށް ދެއްވާފައިވާ ލަފާފުޅަށް ރިޢާޔަތްކުރައްވައި، 2023 ސެޕްޓެންބަރު 9 ގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ ވޯޓުނަގާ ނިމުމަށްފަހު، ބާކީ ހުންނަ ވޯޓުކަރުދާސްތައް…
— Ismail Habeeb (@IsmailHabeeb) July 6, 2023
ޥ
އިންތިޚާބުތަކާއި ބެހޭ ޤާނޫނު ބުނާގޮތުން ވޯޓު ކަރުދާސްތައް ނައްތާލެވޭނީ ވޯޓުލާ ނިމި އިންތިޚާބުގެ ރަސްމީ ނަތީޖާ އިޢުލާނު ކުރުމަށްފަހު އަދި ކޯޓުތަކުގައި އިންތިޚާބާއި ގުޅިގެން ހިންގާ މައްސަލަތައް ނިމުމުން އޭގެ 14 ދުވަސް ފަހުންނެވެ.
މިއަހަރު ބާއްވާ ރިޔާސީ އިންތިޚާބު އޮންނާނީ ސެޕްޓެމްބަރު މަހުގެ 9 ވަނަ ދުވަހުއެވެ. އަދި ދެވަނަ ބުރެއް ބާއްވަން ޖެހިއްޖެނަމަ ސެޕްޓެމްބަރު 30ގައި ބޭއްވުމަށް އިލެކްޗަންސް ކޮމިޝަނުން ވަނީ ނިންމަވާފައެވެ.
