އަމީނީ މަގު ޒަމާނީ ފެންވަރަށް ތަރައްޤީކުރުމުގެ މަސައްކަތުގެ ދަށުން 8 ވަނަ ސެގްމަންޓްގެ މަސައްކަތް ރޯޑް ޑިވެލޮޕްމަންޓް ކޯރޕަރޭޝަން، އާރް.ޑީ.ސީއިން ފަށައިފިއެވެ.
އަމީނީ މަގު ތަރައްޤީކުރުމުގެ މަސައްކަތުގެ ދަށުން ކުރިން ބިލަބޮންްގ ސްކޫލްއިން ފެށިގެން މާފަންނު ސްޓޭޑިއަމްއާ ހަމައަށް މަގު ބަންދުކޮށް، މަސައްކަތް ފަށާގޮތަށް ނިންމިނަމަވެސް ފުރަތަމަަ މަގު ބަންދުކޮށް މަސައްކަތް ކުރިއަށްގެންދާނީ ގަލޮޅު ޕޮލިސް ޕޯސްޓާ ހަމައަށްކަމަށް އާރުޑީސީން ބުނެއެވެ. އަދި އެގޮތަށް ނިންމާފައިވަނީ އެ ސަރަޙައްދަކީ ގިނަ ސްކޫލްތަކާއި އޮފީސްތައް ހުންނަ ސަރަހައްދަކަށްވުމުން ލުއިފަސޭހަ ކުރުމުގެ ގޮތުންކަމަށްވެސް އެ ކޯރޕަރޭޝަނުން ބުނެއެވެ.
އަމީނީމަގުގައި އެންމެ ފަހުން ތާރު އަޅާފައި ވަނީ ސްޓެލްކޯ އާއި ހަމައިން ބިލަބޮންގ ސްކޫލާއި ހަމައަށެވެ. އެސަރަހަށްދު މިހާރު ވަނީ އާންމުންނަށް ހުޅުވާލާފައެވެ. އަމީނީމަގު ތަރައްގީކުރުމުގެ މަސައްކަތް ކުރިއަށްގެންދިއުމަށް ހަމަޖެހިފައި ވަނީ ޖުމްލަ 13 ސެގްމަންޓަކަށް ބަހާލައިގެންނެވެ. އާރްޑީސީން ވަނީ މިހާރު ހަތް ސެގްމެންޓެއްގެ މަސައްކަތް ނިންމާ އާންމުންނަށް ހުޅުވާލާފައެވެ.
އަމީނީމަގު ހެދުމުގެ މަސައްކަތުގެ ތެރެއިން މަގު ފެހިކުރުމަށްޓަކާ ގަސް އިންދުމުގެ މަސައްކަތްވެސް އާރްޑީސީން ކުރަމުންދާއިރު، މި ގަސްތަކަކީ އަމީނީމަގުގައި އިންދުމަށް އެންމެ އެކަށީގެންވާ ގަސްތަކެއްކަމަށާއި، ފުރަތަމަ 3 ސެގްމަންޓުގައި ޖަހާފައި ހުރި ގަސްތައް މިހާރު ރަނގަޅަށް ހެދެން ފަށާފައިވާކަމަށް އެކުންފުނިން ބުނެއެވެ.
އަމީނީމަގު ޒަމާނީ ފެންވަރަށް ހެދުމުގެ މަޝްރޫޢުގައި 1.79 ކިލޯމީޓަރުގެ މަގުގެ ސަރަޙައްދު ތަރައްޤީކުރުން ހިމެނެއެވެ. މި މަސައްކަތް ސަރުކާރުން ރޯޑް ޑިވެލޮޕްމަންޓް ކުންފުންޏާ ޙަވާލުކުރެއްވީ 84.4 މިލިޔަން ރުފިޔާއަށެވެ.
