ދާދިފަހުން ހުޅުވި ފަރެސްމާތޮޑާ އެއަރ ޕޯޓަށް ފަތުރުވެރިން ގޮވައިގެން ޖެއްސި ފުރަތަމަ ޗާޓަރ ފްލައިޓަށް އެ އެެއަރޕޯޓުން ހޫނު މަރުހަބާއެއް ކިޔައިފިއެވެ.
އިއްޔެ އެ އެއަރޕޯޓަށް ދަތުރުކުރި މޯލްޑިވިއަންގެ މި ފްލައިޓުން އެއރަޕޯޓަށް ގޮސްފައިވަނީ ގދ. ގައި އޮންނަ އަޔާރޑާ ރިސޯޓަށް ދިޔ ފަތުރުވެރިންގެ ގުރޫޕެކެވެ.
ފަރެސްމާތޮޑާ އެއަރޕޯޓު ހުޅުވުމުން އެ ސަރަހައްދުގެ ފަތުރުވެރިކަމަށް ބޮޑު ކުރިއެރުމެެއް އަންނާނެ ކަމަށް ވަނީ ބެލެވިފައެވެ.
މިއެއަރޕޯޓު ހުޅުވުމާއެކު އެއަރޕޯޓް ސަރަހައްދުގައި ގެސްޓް ހައުސް ހެދުމަށްޓަކައި އެ ސަރަޙައްދުން 18 ބިމެއް ދޫކުރުމަށް ރީނަޖަނަލް އެއަރޕޯޓްސް ކޮމްޕެނީ ލިމިޓެޑުން ފާއިތުވި އެޕްރިލްމަހު ވަނީ ހުޅުވާލައިފައެވެ.
ފަރެސްމާތޮޑާ އެއަރޕޯޓް ހަދާފައިވަނީ އެރަށު ފަޅުން ކުދި ރަށްތަކެއް ހިއްކުމަށްފަހުގައެވެ. އެހެންކަމުން އެއަރޕޯޓް އޮންނަނީ މީހުން އުޅޭ ސަރަޙައްދާ ކޮންމެވެސް ވަރަކަށް ދުރުގައެވެ.
އެއަރޕޯޓް ހިމެނޭ ސަރަޙައްދުގައި ގެސްޓްހައުސްތައް އަޅައިިފިނަމަ ރިސޯޓްތަކުން އަންނަ ފަތުރުވެރިން މަޑުކޮށްލުމަށާއި އެހެނިހެން ބޭނުންތަކުގައި އަންނަ މީހުންނަށްވެސް ތިބުމުގެ ފުރުޞަތު ލިބޭނެއެވެ. އަދި މިއާއެކު އެރަށުގެ އިޤްތިޞާދުވެސް ފުޅާވެގެންދާނެއެވެ.
ފަރެސްމާތޮޑާ އެއަރޕޯޓް ހުޅުވައި ރަސްމީކޮށް ދަތުރުތައް ފެށީ ފާއިތުވި މާރޗު މަހުއެވެ. މިއީ ހުވަދު އަތޮޅުގައި ތަރައްގީކޮށް ހުޅުވި ހަތަރު ވަނަ އެއަރޕޯޓެވެ.
