ޖީއެމްއާރު އަތުން އެއާޕޯޓު އަތުލި ގޮތަށް، ދިވެހި ފަސްގަނޑުން ގެއްލިގެން ދިޔަ ބައި ރައީސް ޔާމީން އަނބުރާ ހޯދައިދެއްވާނެ ކަމަށް އިދިކޮޅު ޕްރޮގްރެސިވް ކޯލިޝަން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.

ރާއްޖެއާއި މޮރިޝަސްގެ ކަނޑުގެ ސަރަޙަދުން ފުށުއަރާ ސަރަޙައްދުގެ އިން ވަކި ކުރުމުގެ މައްސަލާގައި، އިންޓަރނޭޝަނަލް ޓްރައިބިއުނަލް ފޮރ ދަ ލޯ އިފް ދަ ސީ (ޓްރައިބިއުލަން) ކުރި ހުކުމުގައި، ދެގައުމުގެ މެރިޓައިމް ބައުންޑަރީގައި ފުށުއަރާ 92،563 އަކަ ކިލޯ މީޓަރުގެ ސަރަހައްދުން ރާއްޖެއަށް ލިބިފައިވަނީ 47،232 އަކަ ކިލޯ މީޓަރުގެ ސަރަހައްދެކެވެ. އަދި މޮރިޝަސްއަށް ދޭން ކޯޓުން ހުކުމް ކޮށްފައިވަނީ 45،331 ގެ ސަރަހައްދެކެވެ.

"ޗަގޯސް"ގެ ނަމުގައި އިދިކޮޅުން އާޓިފިޝަލް ބީޗުގައި ބޭއްވި ޖަލްސާގައި އަދުރޭ ވިދާޅުވީ، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް)ގެ ނިންމުމާއެކު، "ޗާގޯސް ގެއްލުމަކީ" މި ސަރުކާރުން ދިވެހިންނަށް ދިން ވަރަށް ބޮޑު އަނިޔާއެއް ކަމަށެވެ. އަދި އެއީ ދިވެހިންގެ ތަނެއް ކަމަށް ވެސް އޭނާ ވިދާޅުވިއެވެ.

މިއަދު އަޅުގަނޑު ހިތާމަކުރަނީ ގައުމު މި ހާލަތަށް އައިރު، މި އަނދަވަޅަށް ދިވެހި ގައުމު ވެއްޓުނުއިރު، މި ކަންބޮޑުވުން ފާޅުކުރަން އަޅުގަނޑުމެން ނުކުމެ ތިބިއިރު، އަޅުގަނޑުމެންގެ ރައީސް ޔާމީން މި އަނިޔާވެރި ނުލަފާ ނުބައި، ޖައްބާރު ސަރުކާރުގެ އަނިޔާވެރިކަމުގެ ޝިކާރައަކަށްވެ، ފުރަ ގޭގައި ހުންނެވުން.

– ވިދާޅުވިއެވެ.

ރައްޔިތުން މާޔޫސް ނުވުމަށް އެދި، އަބްދުއްރަހީމް ވިދާޅުވީ އިދިކޮޅުން ތައްޔާރުވަނީ ވެރިކަމަށް އައުމަށް ކަމަށާއި އެ ހިތްވަރާއި ކެރުންތެރިކަމާއި ވަފާތެރިކަން ޔާމީންގެ ހުންނާނެ ކަމަށެވެ. ދިވެހި ގައުމުގެ ސަލާމަތާއި ރައްކާތެރިކަން ބަލަހައްޓަން ހުވާކޮށްގެން ބަޔަކު ތިބި ކަމަށާއި އެ މީހުންގެ ޒިންމާ އަދާކުރަމުންދޭތޯ އާއި އެ ހުވަޔަށް ތެދުވެރިވާނީ ކޮން އިރަކުންތޯ އަބްދުއްރަހީމް ވަނީ ސުވާލު އުފައްދަވައިފައެވެ.

ގައުމުގެ ސިޔާދަތާއި އިސްތިގުލާލުން ބަޔަކު ގެއްލުވާލައި، ބަޔަކު ގައުމަށް ގައްްދާރުވެފައިވާ ކަމަށާއި ދިވެހި ސިފައިން އެކަމާ ދެކޮޅަށް ނިކުތުމަށް އޭނާ ވަނީ ގޮވައިލައްވައިފައެވެ.

ހަތިޔާރާއެކީގައި މާލެއަށް އެރީމާ އެކަންޏެއް ނޫނޭ ނިކުންނަން ޖެހެނީ، ގައުމުގެ ވެރިން ގައުމަށް ގައްދާރުވީމާ ސިފައިން ނިކުންނަން ޖެހޭނީ ހަތިޔާރާއެކީ މަގުމައްޗަށް، ޖެހޭނީ ވެރިމީހާ ހިފައި ހައްޔަރުކުރަން، ޖެހޭނީ މި ގައުމު ކަލޭމެންގެ ބާރުގެ ދަށަށް ގެންނަން، ރައްޔިތުންގެ ވެރިކަމެއް ގާއިމް ކުރުމަށް ފުރުސަތު ދެއްވަން.

– އަބްދުއްރަހީމް ވިދާޅުވިއެވެ.

އަދުރޭ ތުހުމަތުކުރެއްވި ގޮތުގައި، ޗާގޯސް "އަތުލީ" ދިވެހި ސަރުކާރުން މޮރިޝަސްއާ އެކު ސިއްރު ޑީލެއް ހަދައިގެންނެވެ. އެކަން ސަރުކާރު ހިންގާ ކޯލިޝަންގެ މައި ޕާޓީ، އެމްޑީޕީގެ މަޖިލިސް މެމްބަރުންނަށް ވެސް ވަރަށް ރަނގަޅަށް އެގިވަޑައިގަންނަވާ ކަމަށް އަދުރޭ ވިދާޅުވިއެވެ. އޭނާ ވިދާޅުވީ ގެއްލިގެން ދިޔަ ދިވެހި ކަނޑުގެ ބައި އަނބުރާ ހޯދަނީ ދެން އުފެދޭ ރައީސް ޔާމީންގެ ވެރިކަމުގައިކަމަށެވެ.