އެމްޑީޕީގެ ރައީސް މުހައްމަދު ނަޝީދަށް ތާއީދު ކުރާ "ފިކުރެއްގެ ދިރުން" މެމްބަރުން ސަރުކާރަށް ފާޑުވިދާޅުވެ، ސިޔާސަތުތަކަށް ފާޑުކިޔައިގެން ފިޔަވަޅު އަޅަން އެދުނަސް، އެމްޑީޕީގެ ޗެއާޕާސަން ފައްޔާޒު އިސްމާއިލް އެކަން ނުކުރައްވާނެކަމުގެ ޔަގީންކަން އެބައޮތް ކަމުގައި މެދު ހެންވޭރު ދާއިރާގެ މެންބަރު އަލީ އާޒިމް މިއަދު ވިދާޅުވެއްޖެއެވެ.

އާޒިމް މިހެން ވިދާޅުވީ ރައްޔިތުން މަޖިލީހުގެ ރައީސް މުހައްމަދު ނަޝީދު އިސްވެ ހުންނަވައިގެން ހިންގަވާ "ފިކުރެއްގެ ދިރުން" ހަރަކާތުގައި ބައިވެރިވާ ރައްޔިތުން މަޖިލީހުގެ މެންބަރުން އެބޭފުޅުން މިހާރު މުގައްރިރުކަން ކުރައްވާ ކޮމެޓީތަކުގެ މުގައްރިރުކަމުން ވަކިކުރަން އެމްޑީޕީގެ ޕާލަމެންޓްރީ ގްރޫޕުން ނިންމާފައިވާ ދަނޑިވަޅެއްގައެވެ.

ރާއްޖޭގެ މުދަލާއި ހިދުމަތުގެ އަގު ބޮޑުވަމުންދާތީ އެކަން ކޮންޓްރޯލް ކުރަން ގޮވާލައި މަޑުއްވަރީ ދާއިރާގެ ޕީއެންސީ މެންބަރު އާދަމް ޝަރީފް ހުށަހެޅުއްވި ގަރާރަށް ވާހަކަ ދައްކަވަމުން އާޒިމް ވިދާޅުވީ ސަރުކާރުން ކުރާ އިސްރާފުތަކާއި ކޮރަޕްޝަންތައް އިތުރުވަމުންދާ ވާހަކަ މަޖިލީހުގައި ދައްކަވާ ކޮންމެ ފަހަރަކު، އެއީ ސަރުކާރަށް ޖެއްސުން ކުރަން ދައްކާ ވާހަކައެއް ކަމަށް ތުހުމަތު ކުރާ ކަމަށެވެ.

އާޒިމް ވިދަޅުވީ މިފަދަ މައްސަލަ ތަކުގައި ސަރުކާރާއި ދެކޮޅަށް ވާހަކަ ދައްކާތީ އެމެމްބަރުންނާއިމެދު ފިޔަވަޅު އަޅަން އެމްޑީޕީގެ ޕީޖީ ގްރޫޕުން އެދިފައިވަކަމަށެވެ. ނަމަވެސް އެމްޑީޕީގެ ޗެއާޕާސަންއަކީ ދުރުވިސްނޭ މީހެއް ކަމަށާއި، ރައީސް ނަޝީދާއި ނަޝީދަށް ތާއީދު ކުރާ މެމްބަރުންނާއި ނުލައި ރިޔާސީ އިންތިޚާބު ކާމިޔާބު ނުކުރެވޭނެކަން ފައްޔާޒު ގަބޫލު ކުރައްވާކަމަށެވެ. މިސަބަބަށްޓަކައި މެމްބަރުންނާއިމެދު ފިޔަވަޅު ނާޅާނެކަމުގެ ޔަގީންކަން އޮތްކަމަށް އާޒިމް ވިދާޅުވިއެވެ.

މިވަގުތު ވެސް ޝުކުރު އަދާކުރަން، ޗެއާޕާސަން ހިކުމަތްތެރިކަމުން އަޅުގަނޑުމެންނާ ދޭތެރޭގައި ފިޔަވަޅެއް ނާޅަނީ. ޗެއާޕާސަން ފަޔާޒް އެބަ ގަބޫލު ކުރައްވާ އަޅުގަނޑުމެން އެއްކޮށް ތިބެގެން ނޫނީ ދެން އޮންނަ އިންތިހާބެއް މޮޅު ނުވާނެ ކަން.

– އާޒިމް ވިދާޅުވިއެވެ.

އެމްޑީޕީއަށް ދެވަނަ ދައުރެއް ހޯދަން ބޭނުންވާ ވާހަކަ ރައީސް އިބްރާހިމް މުހައްމަދު ސޯލިހު ވިދާޅުވާ އިރު އެމަނިކުފާނު ވެވަޑައިގެންފައިވާ ވައުދުތައް ފުއްދަވަން ޖެހިވަޑައިގަންނަވާ ކަމަށް އާޒިމް ވިދާޅުވިއެވެ. މުޅި ޕާޓީ އެކުގައި ކުރިޔަށް ދެވެން އޮތީ އެ މައްސަލާގައި މެންބަރުން ދައްކަވާ ވާހަކަތައް އަޑު އަހައި ގަބޫލު ކުރައްވައިގެން ކަމަށް ވެސް އާޒިމް ވިދާޅުވިއެވެ.

ސަރުކާރުގެ ސިޔާސަތުތަކާއި ކަނޑައެޅިގެން ދެކޮޅަށް މަސައްކަތް ކުރާތީއާއި، އެމްޑީޕީ ޕީޖީ ގްރޫޕުގެ ޤަވާއިދުތަކާ ތަކުރާރުކޮށް ޚިލާފުވެފައިވާތީ މުގައްރިރު ކަމުން ވަކިކުރަންް ނިންމާފައި ވަނީ ހެންވޭރު ހުޅަނގު ދާއިރާގެ މެންބަރު ޙަސަން ލަތީފް، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ، ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފް އަދި ހުޅުދޫ ދާއިރާގެ މެންބަރު އިލްޔާސް ލަބީބެވެ.

ހަސަން ލަތީފަކީ އާންމު ކޮމެޓީގެ މުގައްރިރެވެ. އިމްތިޔާޒު ފަހުމީ އަކީ ޖުޑީޝަލް ކޮމެޓީގެ މުގައްރިރެވެ. ޔާސިރު އަބްދުއްލަތީފް އަކީ އިމްތިޔާޒް އަދި ސުލޫކް ކޮމިޓީގެ މުގައްރިރެވެ. އިލްޔާސް ލަބީބް އަކީ ސްޓޭޓް އޯންޑް އެންޓަރޕްރައިސަސް ކޮމިޓީގެ މުގައްރިރެވެ.

އެމެންބަރުން މުގައްރިރު ކަމުން ވަކިކުރުމުގެ އިތުރުން އެ މެންބަރުންނާމެދު ފިޔަވަޅު އެޅުމަށް ޕާޓީގެ ފިޔަވަޅު އަޅާ ކޮމިޓީއަށް ފޮނުވުމަށްވެސް ޕީޖީ ގްރޫޕުން ވަނީ ފާސްކޮށްފައެވެ.