ޕްލާސްޓިކް ކޮތަޅަކުން 2 ރުފިޔާގެ ފީއެއް ނަގަން ފެށުމާއެކު ރާއްޖޭގައި ކޮތަޅުގެ އަގު ވަރަށް ބޮޑަށް އުފުލިގެން ގޮސް، އަދި މިމައްސަލާގައި ގިނަބައެއްގެ ފާޑު ކިއުން އަމާޒުވެގެން ދިއުމާއެކު، ސަރުކާރުން މިމައްސަލަ ހައްލުކުރުމަށް، ކުނި މެނޭޖްކުރުމުގެ ގާނޫނަށް އިސްލާހު ގެނައުމަށް މިއަދުގެ ޖަލްސާއަށް އެޖެންޑާ ކޮށްފިއެވެ.
މިގޮތުން މިއަދުޖެ މަޖިލިސް ޖަލްސާއަށް އެޖެންޑާ ކޮށްފައިވަނީ ސަރުކާރުގެ ފަރާތުން، ކޮމަންޑޫ ދާއިރާގެ މެންބަރު މުޙައްމަދު ރާޝިދު ހުށަހަޅުއްވާފައިވާ، ޤާ ނޫނު ނަންބަރު 2022/24 (ކުނި މެނޭޖުކުރުމުގެ ޤާނޫނު) އަށް އިޞްލާޙު ގެނައުމުގެ ބިލުގެ އިބުތިދާއީ ބަހުސް ފެށުމަށެވެ.
ސަރުކާރުން ރައްޔިތުންގެ މަޖިލިހަށް ހުށަހަޅާފައިވަނީ ކޮތަޅުން ފީނެގުމުން އިސްތިސްނާވާ އެއްޗެހީގެ ތެރޭގައި ކޮތަޅު ބޮނޑި ހިމެނުމަށެވެ. އިސްލާހުގައި ވާގޮތުން އިސްތިސްނާވަނީ 50 ނުވަތަ އެއަށްވުރެ ގިނައިން ކޮތަޅު ހިމެނޭ ޕްލާސްޓިކް ކޮތަޅު ހިމެނޭ ކޮތަޅު ބޮނޑިތަކެވެ. އަދި އޭގެ އިތުރުން މިގާނޫނު ފާސްކުރާއިރު ރާއްޖެއަށް ކުނި އިމްޕޯޓު ކުރުން ހުއްދަ ކޮށްފައި އޮތް އޮތުން މަނާކުރުމަށްވެސް މިއިސްލާހުގައިވަނީ ހިމަނާފައެވެ.
ކުނީގެ ގާނޫނަށް އިސްލާހު ގެނައުމަށް ސަރުކާރުން ހުށަހަޅާފައިވާއިރު، ރައްޔިތުންގެ މަޖިލިހުގެ ރައީސް މުހައްމަދު ނަޝީދުވަނީ ކޮތަޅުން ނަގާ ފީ ކުޑަކުރުމަށް ދެކޮޅު ހައްދަވާފައެވެ.
ކޮތަޅުން ނަގާ ފީ ކުޑަކުރުމަށް ދެކޮޅުކަން ނަޝީދު ހާމަކުރައްވާފައިވަނީ ރައްޔިތުންގެ މަޖިލިހުގެ ވަޓްސްއަޕް ގުރޫޕަށް ފޮނުއްވި މެސެޖެއްގައެވެ. މި މެސެޖުގައި ނަޝީދު ވިދާޅުވެފައިވަނީ، ސިންގަލް ޔޫސް ޕްލާސްޓިކް މަދުކުރުމަކީ ސަރުކާރުގެ ސިޔާސަތެއް ކަމަށާއި، ޕްލާސްޓިކް ކޮތަޅު އެތެރެކުރުން މަދު ކުރެވޭނީ އުގޫބާތެއް ކަނޑައެޅުމުގެ ގޮތުން ޕްލާސްޓިކް ކޮތަޅުން ނަގާ ޓެކްސް ބޮޑު ކޮށްގެން ކަމަށެވެ.
ނަޝީދު ވިދާޅުވީ ޕްލާސްޓިކް ކޮތަޅުން ނަގާ ފީ ބޮޑުކުރަން ނިންމާފައިވަނީ އެކަން އެނގި ތިބެގެން ކަމުގައެވެ.
ޕްލާސްޓިކު ކޮތަޅުގެ އަގު ބޮޑުކުރީ އެނގި ތިބެ. އަދިވެސް އަޅުގަނޑު ގަބޫލުކުރާ ގޮތުގައި ކޮތަޅު ބޭނުން ކުރުން މަދު ކުރުމަށް ކުރާ މަސައްކަތް ހުއްޓާލައިގެން ނުވާނެ.
ނަޝީދު އިތުރަށް ވިދާޅުވީ ސަރުކާރުން ގެންގުޅެނީ ލާހޫރޭ ސިޔާސަތެއް ކަމަށާއި އެއީ އެމްޑީޕީއަށް ލިބޭ ބޮޑު ދެރައެއް ކަމުގައެވެ.
އަޒުމެއް، މީޒާނެއް ނެތް. ލީޑަޝިޕަކީ ކުރިއަށް ނުކުމެ، ކަންކަމާ ކުރިމަތިލުން. ބަދަލު ގެނެވޭނެ ހިތްވަރު ހުރީމަ.
ނަޝީދު ވިދާޅުވިއެވެ.
