އެމްޑީޕީގެ އެތެރޭގެ ދެ އަހަރެއްހާ ދުވަސްކުރިން އުފެދި ހުޅު ރޯވަމުން އައި ފިތުނަވެރިކަމުގެ އަލިފާން މުޅި ޕާޓީގެ އެތެރެއަށް ފެތުރި، ރައީސް އިބުރާހިމް މުހައްމަދު ސާލިހުގެ ވެރިކަމުގެ ދައުރު ނިމިގެންދާއިރު ފެންނާން އޮތް ހަގީގަތަކީ އެޕާޓީ ދެބަޔަކަށް ބެހި، ދެ ފެކްޝަނެއްގެ ގޮތުގައި މަސައްކަތްކުރާން ފަށާފައިވާ ތަނެވެ.
އެހެންނަމަވެސް، ޕާޓީގެ އެންމެ އިސް ދެލީޑަރުން ކަމުގައިވާ ޕާޓީގެ އިސް ލީޑަރު، ރައީސް އިބުރާހިމް މުހައްމަދު ސާލިހާއި، ޕާޓީގެ ރައީސް މުހައްމަދު ނަޝީދާ ދެމެދު އުފެދުނު ސިޔާސީ ކޯޅުންތަކުގެ ނަތީޖާއެއްގެ ގޮތުން ޕާޓީގެ އެތެރޭގައި އުފެދިފައިވާ ދެ ފެކްޝަން މައިގަޑު ގޮތެއްގައި ބެހިފައި އޮތީ ޕާޓީގެ ލީޑަރޝިޕްގައި ތިއްބެވި އިސް ބޭފުޅުންގެ މައްޗަށް ކަމުގައި ދެންނެވިދާނެއެވެ. އެއީ ޕާޓީގެ ޕާލަމެންޓްރީ ގުރޫޕާއި، ގައުމީ މަޖިލީހާއި އަދި އޭގެ އިތުރުން ސަރުކާރުގެ އިސް ބައެއް މަގާމްތަކުގައި ތިއްބެވި ބޭބެފުޅުންގެ މައްޗަށެވެ. ޕާޓީގެ އާންމު މެމްބަރުން އަދިވެސް ތިބިތަން ފެންނަނީ ޕާޓީގެ ލީޑަރޝިޕާއެކީއެވެ.
މިގޮތުން އުފެދިގެން ގޮސްފައިވާ އެމްޑީޕީގެ އެތެރޭގެ ކޯޅުމުގައި، ޕާޓީގެ ލީޑަރޝިޕްގައި ތިއްބެވި ބޭފުޅުންގެ ސިާސީ ފިކުރު އެންމެ ބޮޑަށް ސާފުވެގެން ދިޔައީ ފާއިތުވެދިޔަ، އެޕާޓީގެ ރިޔާސީ ޕްރައިމަރީގައެވެ. އެމްޑީޕީގެ އެތެރޭގައި އުފެދިފައިވާ ފިތުނަވެރިކަމާއެކުވެސް، ގިނަ ދުވަސްތަކެއް ވަންދެން ހަނު ތިއްބެވި ގިނަ ބަޔަކު، ރިޔާސީ ޕްރައިމަރީގައި ވަކި ފަޅިއެއް ނަންގަވާ، ސިޔާސީ ފިކުރު ހާމަކޮށް، ފާޅުގައި ކެމްޕޭނަށް ނިކުންވި މަންޒަރު ވަނީ ފެނިގެން ގޮސްފައެވެ.
މިގޮތުން، އެމްޑީޕީގެ އެތެރޭގައިވެސް މެމްބަރުން ބޭނުންވާ ސިޔާސީ ފިކުރަކަށް ތާއީދު ކުރުމާއި ނުކުރުމަކީ އެމެމްބަރުންނަށް ލިބިފައި އޮތް މިނިވަންކަމަށް ވިނަމަވެސް، ގިނަ ބަޔަކަށް ހައިރާންކަން ގެނުވި އެއް ކަމަކަށް ވެގެން ދިޔައީ، ރައީސް އިބުރާހިމް މުހައްމަދު ސާލިހު ވަޒީފާ ދެއްވައިގެން، ސަރުކާރުގެ އިސް މަގާމްތަކުގައި ތިއްބެވި ބައެެއް ފަރާތްތަކުން، މަގާމުގައި ތިއްބަވައިގެން، ފާޅުގައި އެމަނިކްފާނާއި ދެކޮޅަށް ކެމްޕޭނަށް ނިކުންނެވުމެވެ.
އެމްޑީޕީގެ އެތެރެއިން ތަމްސީލުވެގެން ދިޔަ މިމަންޒަރުތަށް އޭރުވެސް އަދި ފަހުންވެސް ގިނަބަޔަކު ސިފަކުރަމުން ދަނީ، ރާއްޖޭގެ ޑިމޮކްރަސީގެ ހަޔާތުގައި ފެނިގެންދިޔަ، ޑިމޮކްރަސީއާއި އެންމެ ބޮޑަށް ބީރައްޓެހި، އަދި ދިވެހި މުޖުތަމައުގައި ވަކި ހިތްޕާލާފަ އޮތް ނުތާހިރު ސިޔާސީ ސަގާފަތުގެ މިސާލެއްގެ ގޮތުގައި ވެސްމެއެވެ.
އެސްޓީއޯގެ އެމްޑީ ހަމަ އެގޮތުގައި، މަގާމެއްވެސް ދުލެއް ނުކުރައްވާ!
އެމްޑީޕީގެ ނިމިދިޔަ ރިޔާސީ ޕްރައިމަރީގައި، ރައީސް ސާލިހު ވަޒީފާ ދެއްވައިގެން ސަރުކާރުގެ އިސް މަގާމްތަކުގަ ތިއްބެވި ބައެއް ބޭފުޅުން، ޕާޓީގެ ރިޔާސީ ޕްރައިމަރީގައި އެޕާޓީގެ ރައީސް މުހައްމަދު ނަޝީދަށް ތާއީދު ކުރައްވާ، އަދި ކެމްޕޭނަށްވެސް ނިކުންނަވާފައި ވެއެވެ.
އުސޫލެއްގެ ގޮތުން، ޕާޓީގެ އެތެރޭގައި ކުރިޔަށްދިޔަ ވާދަވެރި އިންތިޚާބެއްގައި ވަކިފަރާތަކަށް ތާއީދު ކުރުމާއި ނުކުރުމުގެ މިނިވަންކަން ޕާޓީގެ ހުރިހާ މެމްބަރުންނަށްވެސް އޮންނާޖެހޭ ކަމުގައި ގަބޫލުކުރާން ޖެހެއެވެ. ހަމައެއާއެކު، ރައީސުލްޖުމުހޫރިއްޔާ ވަޒީފާ ދެއްވައިގެން، އެމަނިކްފާނުގެ ކެބިނެޓާއި އަދި ސަރުކާރުގެ ސިޔާސަތު ތަންފީޒުކުރުމުގެ ޒިންމާ އަދާކުރާ، ސަރުކާރުގެ ބޮޑެތި ކުންފުނިތަކުގެ އިސްވެރީންނަކީ ސަރުކާރަށް "ލޯޔަލްޓީ" ދައްކަވާޖެހޭ ފަރާތްތައްވެސް މެއެވެ.
އެހެންނަމަވެސް، މި އުސޫލާ ޚިލާފަށް، އެބޭފުޅަކު ބޭނުންވާ ފަރާތަކަށް ތާއީދު ކުރުމުގެ މިނިވަންކަން އެމްޑީޕީގެ އެތެރޭގެ އިންތިޚާބުގައި "ތަތްމިނަށް" ހުޅުވާލެގިންދިޔަ މަންޒަރު ވަނީ ފެނިގެން ގޮސްފައެވެ.
މިގޮތުން، ސަރުކާރުގެ އެންމެ ބޮޑު އެއް ކުންފުނި ކަމުގައިވާ އެސްޓީއޯގެ އެމްޑީ އަދި ސީއީއޯގެ މަގާމުގައިވެސް ހުންނެވި ހުސެއިން އަމްރުގެ އިތުރުން، ސަރުކާރުގެ އެގްރޯ ކުންފުނީގެ އެމްޑީގެ ގޮތުގައި ހުންނެވި ހާރޫން ރަޝީދުއާއި އަދި ބައެއް ކުންފުނިތަކުގެ ޑީއެމްޑީންގެ މަގާމްގައި ތިއްބެވި އެމްޑީޕީގެ ބައެއް އެކްޓިވިސްޓުންވެސް ވަނީ ރައީސް ސާލިހާއި ދެކޮޅަށް ކެމްޕޭން ކުރައްވާފައެވެ. މިއަދާއި ހަމައަށް އައިއިރު މިއިން އެއްވެސް ބޭފުޅަކު މަގާމުން ދުރުކޮށްފައެއް ނުވެއެވެ.
ހަމައެއާއެކު ގިނަބަޔަކަށް ގަބޫލު ކުރެވުނީ، ޕާޓީގެ ރިޔާސީ ޕްރައިމަރީ ނިމިގެން ދިއުމަށްފަހު، ބޮޑު މެޖޯރިޓީއަކުން ރައީސް ސާލިހު ކުރި ހޯއްދެވުމުން، ސަރުކާރުގެ އިސް މަގާމްތަކުގައި ތިއްބަވައިގެން ރައީސްއާއި ދެކޮޅަށް ފާޅުގައި ކެމްޕޭނަށް ނިކުންނެވި ފަރާތްތަކުންވެސް ޑިމޮކްރަސީގެ އުސޫލު ގަބޫލުކޮށް، މެޖޯރިޓީގެ ނިންމުމާއެކީ ކުރިޔަށް ހިގައިގަންނާނޭ ކަމުގައެވެ.
ނުވަތަ ޕްރައިމަރީއަށްފަހުވެސް އެމަނިކުފަނާ ޚިޔާލު އެއްގޮތް ނުކުރެއްވޭ، ރައީސުލްޖުމުހޫރިއްޔާ ވަޒީފާ ދެއްވައިގެން ސަރުކާރުގެ އިސް މަގާމްތަކުގައި ތިއްބެވި ބޭފުޅުން، ތަފާތު ސިޔާސީ ފިކުރެއްގައި ކުރިޔަށް ވަޑައިގަންނަވާނަމަ، އެންމެ ކުޑަމިނުން އަޚްލާގީ ގޮތުންވެސް ރިވެރިގޮތް އިޚްތިޔާރު ކުރައްވާނޭކަމަށް ގިނަބަޔަކު ދިޔައީ ގަބޫލު ކުރަމުންނެވެ. އެއީ ޑިމޮކްރަސީގެ އަސްލު އުސޫލުކަމުގައި ވާތީވެސްމެއެވެ. އެއީ ސިޔާސީ ވަޒީފާ ދޫކޮށްލެއްވުމަށްފަހު، އެމީހެއްގެ ސިޔާސީ ފިކުރަކާއެކު ކުރިޔަށް ވަޑައިގަތުމެވެ.
މިއުސޫލުން، އެމްޑީޕީގެ ރިޔާސީ ޕްރައިމަރީއަށްފަހު، ޕާޓީގެ ރައީސް މުހައްމަދު ނަޝީދަށް ތާއީދު ކުރެއްވި، ސަރުކާރުގެ އިސް ބައެއް މަގާމްތަކުގައި ތިއްބެވި ޕާޓީގެ ބައެއް އިސް އެކްޓިވިސްޓުން ފެންނަމުން ދަނީ ހަނު ތިއްބަވަމުން ގެންދަވާ ތަނެވެ.
އެހެންނަމަވެސް އޭގެ ތެރޭގައި ފާހަގަ ކޮށްލެވޭ އެއް ފަރާތްކަމުގައިވާ، އެސްޓީއޯގެ އެމްޑީގެ މަގާމްގައި ހުންނެވި ހުސެން އަމްރު ފެނިގެން ދަނީ، ނަޝީދަށް ކުރެއްވި ތާއީދު ދަމަހައްޓަވާ، އަދި ޕްރައިމަރީގެ ފަހުންވެސް، މިހާރުވެސް ފާޅުގައި، ސަރުކާރާ ދެކޮޅަށް މަސައްކަތް ކުރައްވަމުން ގެންދަވާ މަންޒަރެވެ.
މިގޮތުން، އެންމެ ފަހުން އަމްރު ފެނިގެން ދިޔައީ، ރައީސް ސާލިހާއި ދެކޮޅު ކޯލިޝަނެއް ޖުމުހޫރީ ޕާޓީއާއި ގުޅިގެން އެކުލަވާލުމަށް، ނަޝީދުގެ ފަރާތުން މަޝްވަރާއަށް ވަޑައިގެންނެވި މަންދޫބެއްގެ ގޮތުގައެވެ. އަދި، އެއީ ސަރުކާރުގެ ސިޔާސަތު ތަންފީޒުކުރާ، ސަރުކާރުގެ އެންމެ ބޮޑު އެއް ކުންފުނި ކަމުގައިވާ އެސްޓީއޯގެ އެމްޑީގެ މަގާމްގައި ހުންނަވައިގެން ވެސްމެއެވެ.
އަމްރު ދައްކަވަމުން ގެންދަވަނީ ރިވެތި މިސާލެއްތަ؟
ރޭ، ކުނޫޒުގައި ބޭއްވުނު އެމްޑީޕީގެ ނަޝީދު ފެކްޝަނާއި ޖޭޕީގެ ބައްދަލުވުމުގައި، ނަޝީދުގެ މަންދޫބެއްގެ ގޮތުގައި އަމްރު ބައިވެރިވެ ވަޑައިގެންފައިވާއިރު، ފާއިތުވި އެމްޑީޕީގެ ރިޔާސީ ޕްރައިމަރީގައި، ސަރުކާރުގެ އިސް މަގާމެއްގައި ހުންނަވައިގެން، އޭނާ ރައީސް ސާލިހާއި ދެކޮޅަށް ނިކުންނެވުމުވެސް އޭނާއަށް ގިނަބައެއްގެ ފާޑު ކިޔުން އަމާޒު ވެގެން ދިޔައެވެ.
އެހެންނަމަވެސް، އެއަށްފަހުވެސް، ރައީސް ސާލިހު އަމްރު މަގާމުން ވަކި ކުރައްވާފައެއް ނުވެއެވެ. އެއާއެެކު ގިނަ ބަޔަކު ހީކޮށްފައިވަނީ، ޑިކޮމްރަސީގެ އެންމެ ރިވެތި އުސޫލު އަދި ނުދެއްކެވުނެއްކަމަކު، އަޚްލާގީ ގޮތުން ކުޑަނަމަވެސް މިންގަޑެއްގައި އޭނާ ދެމި ހުންނަވާނޭ ކަމުގައެވެ.
އޭގެ އެންމެ ބޮޑު އެއްސަބަބަކީ، ސަރުކާރަށް އިޚްލާސްތެރިކަން ދައްކަވާންޖެހޭ، ރައީސުލްޖުމުހޫރިއްޔާ އައްޔަން ކުރެއްވި އިސް މަގާމެއްގައި އޭނާ ހުންނެވުމެވެ. އަދި އެއީ ސަރުކާރުގެ ސިޔާސަތު ތަންފީޒު ކުރާ، ދައުލަތުގެ އެންމެ ބޮޑު އެއް ކުންފުނީގެ އިސްވެރިޔާގެ މަގާމުގައި ވާތީވެސްމެއެވެ.
އެހެންނަމަވެސް އެއާ ޚިލާފަށް، ނަޝީދުގެ ފިކުރެއްގެ ދިރުމުގެ ފަރާތުން ޚާއްސަ މަންދޫބެއްގެ ގޮތުގައި، މަޝްވަރާތަކުގެ އިސް ސަފުން އޭނާ ފެންނަމުން މިދަނީ އަދިވެސް މަގާމުގައި "ބަގުޑި" ބައްދަވައިގެން ހުންނަވައިގެންނެވެ. ކުރިޔަށް އޮތް ރިޔާސީ އިންތިޚާބުގައި ރައީސް ސާލިހު ބަލިކުރައްވަން އޭނާ ނިކުންނެވީ، ރައީސް ސާލިހު ދެއްވި މަގާމެއްގައި ހުންނަވައިގެންނެވެ.
މިހާސާބުން، ގިނަ ބައެއްގެ ހިތުގައި އުފެދިގެންދާ ސުވާލަކީ، މިއީ އޭނާ ރައީސް ސާލިހަށް ކުރައްވާ ޖެއްސުމެއްތޯއެވެ. ނުވަތަ ޖައްސަވާ ގޮނެއްތޯއެވެ. ނުވަތަ އޭނާ އޭނާގެ "ގަޓު"ކަން ދައްކަވާލައްވަނީ ތޯއެވެ.
އެހެންނަމަވެސް ސާފުވާން އޮތް ހަގީގަތަކީ، އަމްރު ހުންނެވީ އޭނާގެ އަމިއްލަ ކުންފުންޏެއްގެ އެމްޑީގެ މަގާމުގައި ނޫންކަމެވެ. އޭނާ ހުންނެވީ ސަރުކާރުގެ ސިޔާސަތު ތަންފީޒުކުރާ، ސަރުކާރުގެ އެންމެ ބޮޑު އެއްކުންފުނީގެ އެންމެ އިސްވެރިޔާގެ މަގާމުގައެވެ. އެސިޔާސަތުތައް އޭނާއަށް ގަބޫލު ނުކުރެވި، ސަރުކާރާއެކީ ކުރިޔަށް ވަޑައި ނުގެންނެވޭ ހިސާބަށް ޖަޒުބާތު އުތުރި އެރުމުން، މަގާމު ދޭކޮށްލެވުމަށް އޭނާގެ ޒަމީރު ތަން ނުދޭނަމަ، އެ ތަމްސީލު ކޮށްދެވެނީ ވަރަށްވެސް ހުތުރު މިސާލެއް ކަމުގައި މެނުވީ ނުވާނެއެވެ. އެއީ ހަމަ ޔަގީނުންވެސް އޭނާގެ "ގަޓު"ކަން ކަމުގައި މޭރުންކުރެވޭނެ ގޮތެއް ނޯންނާނެއެވެ.
އޭގެ ބަދަލުގައި އެ ސާބިތުކޮށް ދެވެނީ، ތިމާގެ ކިބައިގައި "އިންޓަގްރިޓީއެއް" ނެތްތާގައި، އަޚްލާގީ ރިވެތި ސިފައެއްގެ މަތީގައިވެސް ތިމާއަށް ސާބިތުވެވިފައި ނެތްކަމެވެ. އަދި އެ ދައްކުވައިދެނީ، ރާއްޖޭގެ ސިޔާސީ މަސްރަހު ފަސާދަވެފައި އޮތް މިންވަރުވެސް މެއެވެ. ފެންނަމުން ދަނީ ރައްޔިތުންގެ ހައްގުތަކަށް ވަކާލާތު ކުރަން ނިކުމެވަޑައިގެން ތިއްބެވި، ސިޔާސީ އިސް ފަރާތްތަކުގެ ހަގީގީ ސިފައެވެ.
ކޮމެންޓު ފޮނުވާ