އަލިފާންރޯވެ، އަޑިއަށްދިޔަ "އާގަލާ" ބޯޓުން ގެއްލުނު މީހާ ހޯދުމުގެ މަސައްކަތް އެމްއެންޑީއެފް ކޯސްޓްގާޑުން ހުއްޓާލައިފިއެވެ.
އާގަލާ ބޯޓުން ގެއްލިފައިވާ ފަޅުވެރިޔާ ހޯދުމަށް އެމްއެންޑީއެފް ކޯސްޓްގާޑުން ވަނީ 72 ގަޑިއިރުގެ ސަރޗް އޮޕަރޭޝަނެއް ކުރިއަށް ގެންގޮސްފައެވެ. މި އޮޕަރޭޝަނުގައި ކަނޑާއި ވައިގެ މަގުން ޖުމްލަ 2،164 ސްކެއާ މީޓަރުގެ ސަރަޙައްދެއް ވަނީ ބަލާފައެވެ.
މ.ތުވަރުގެ ހުޅަނގުން ދަތުރުކުރަމުންދަނިކޮށް އާގަލާ ބޯޓުގައި އަލިފާން ރޯވެ އަޑިއަށް ގޮސްފައިވަނީ މިދިޔަ ހޯމަ ދުވަހުގެރޭ ދަންވަރުގެ ވަގުތެއްގައެވެ. މި ބޯޓްގައި އަލިފާން ރޯވުމާއި އެކު އޭގައި ތިބި އެންމެން ވަނީ ކަނޑަށް ފުންމާލާފައެވެ.
އެ ބޯޓްގައި އެވަގުތު 15 މީހުން ތިބިކަމަށާއި އެގެތެރޭގައި ހިމެނެނީ 5 ދިވެހިންނާއި އިންޑިއާ 5 މީހަކާއި ބަންގްލަދޭޝްގެ 5 މީހުންކަމަށްވެސް އެމްއެންޑީއެފުން ވިދާޅުވެއެވެ. އަދި އެކަކު ގެއްލިގެން ހޯދަން ފެށިއެވެ. ގެއްލިގެން ހޯދަމުން ދަނީ އިންޑިއާ މީހެކެވެ.
