ކުރިއަށް އޮތް ރިޔާސީ އިންތިޚާބުގައި އެކުގައި މަސައްކަތްކުރުމާ ގުޅޭގޮތުން ޢުމަރު ނަޞީރާއި އިދިކޮޅު ޕީޕީއެމްއިން ޑީލްތަކަކާމެދު މަޝްވަރާކުރިކަމަށް ދެކެވޭ ވާހަކަތައް ޢުމަރު ދޮގުކުރައްވައިފިއެވެ.
ބައެއް އޮންލައިން ނޫސްތަކުގައި ވަނީ ޢުމަރުގެ ފަހަތަށް ޕީޕީއެމްއިން ރިޔާސީ އިންތިޚާބުގައި އަރަން ޢުމަރު ދައުވަތުދެއްވިކަމަށާ، އޭގެފަދަލުގައި ރައީސް ޔާމީން މިނިވަންކޮށްދެއްވާނެކަމަށް ޢުމަރު ވިދާޅުވެފައިވާކަމަށެވެ. އެއާ ގުޅުގެން ޕީޕީއެމްއިންވެސް ޢުމަރަށް ދައުވަތެއް ދިންކަމަށާ، ޕީޕީއެމްއިން ބުނެފައިވަނީ އެއްވެސް ބައެއްގެ ނުވަތަ މީހެއްގެ ފަހަތަށް ނާރާނެކަމުގައިކަމަށް ބައެއް ނޫސްތަކުގައި ރިޕޯޓުކޮށްފައިވެއެވެ.
މިއާ ގުޅިގެން ޢުމަތރު ނަޞީރު ވިދާޅުވެފައިވަނީ މިއީ ވަރަށް ދެރަ މައްސަލައެއްކަމަށެވެ. އޭނާ ޕީޕީއެމްއަށް ދަޢުވަދެއް ދީފައި ނުވާނެކަމަށާ، އަދި ޕީޕީއެމްއިންވެސް އޭނާއަށް ދަޢުވަތެއް ނުދޭކަމަށް ޢުމަރު ވިދާޅުވިއެވެ. ޢުމަރުކުރެއްވި ފޭސްބުކް ޕޯސްޓެއްގައި އޭނާ ލިޔުއްވާފައިވަނީ މިހެންނެވެ. "މިއީ ވަރަށް ދެރަ ކަމެއް. ޕީޕީއެމް އަށް އަޅުގަނޑު ދަޢުވަތެއް ނުދެން. އަދި ޕީޕީއެމް އިން އަޅުގަނޑަށް ވެސް ދައުވަތެއް ނުދޭ."
އަންނަ ސެޕްޓެމްބަރު މަހުގައި ބާއްވާން އިލެކްޝަންސް ކޮމިޝަނުން މިހާރު ޢިއުލާންކޮށްފައިވާ ރިޔާސީ އިންތިހާބުގައި ވާދަކުރައްވާނެކަމަށް ޢިއުލާންކުރައްވައި އުމަރު އަންނަނީ ކެމްޕެއިންވެސް ކުރައްވަމުންނެވެ. އަދި އިދިކޮޅު ޕީޕީއެމްއިން ވަނީ އެޕާޓީގެ ރިޔާސީ ކެންޑިޑޭޓަކީ ކުރީގެ ރައީސް ޔާމީންކަމަށް ކަނަޑައަޅައި ކެމްޕެއިން ފަށާފައެވެ. ރައީސް ޔާމީން މިވަގުތު ޖަލުގައި ހުންނެވި ނަމަވެސް ޕިޕީއެމްގެ ކެމްޕެއިނަކަށް އަދި ރިޔާސީ ކެންޑިޑޭޓަކަށް ބަދަލެއް ނާދެއެވެ. ޕީޕީއެމްއިން ޤަބޫލުކުރަނީ އިންތިޚާބަށް ނަން ހުށަހެޅުމުގެ މުއްދަތުގެ ކުރިން ރައީސް ޔާމީން މިނިވަންވާނެކަމަށެވެ.
