މިހާރު ފޯރިއާއެކު ކުރިއަށްދާ އެމްޑީޕީގެ ރިޔާސީ ޕްރައިމެރީގެ ކެމްޕެއިންގައި ވާދަކުރައްވާ ދެ ކެނޑިޑޭޓުން އަނެއްކާވެސް އަތޮޅުތަކުގެ ބައެއް ސަރަޙައްދުތަކަށް ދަތުރުކުރަން ފަށައިފިއެވެ.
އެގޮތުން ރައީސް އިބްރާހިމް މުހައްމަދު ޞާލިޙް ވަނީ އުތުރުގެ ރަށްތަކަށް ކުރައްވާ ދަތުރުފުޅު ފައްޓަވާފައެވެ. މަޢުލޫމާތު ލިބިފައިވާގޮތުގައި މިއަދު ހއ.ހޯރަފުއްޓަށް އެމަނިކުފާނު ވަޑައިގަންނަވާނެއެވެ. އަދި މި ދަތުރުފުޅުގައި ހއ، ހދ، ށ. އަތޮޅުގެ ރަށްތަކަކަށް ރައީސް ޞާލިޙް ވަޑައިގަންނަވާނެއެވެ.
މިއީ ރިޔާސީ ޕްރައިމެރީގައި އެމްޑީޕީގެ ޢާންމު މެމްބަރުންގެ ތާޢީދު އިތުރުކުރެއްވުމަށް ކުރައްވާ ދަތުރުފުޅެކެވެ. އެހެންކަމުން މައިގަނޑުގޮތެއްގައި ރައީސް ބައްދަލުކުރައްވާނީ އެމްޑީޕީގެ ޢާންމު މެމްބަރުންނާއެވެ. އަދި ރަށްރަށުގައި ޢާންމު ޖަލްސާތައް ބާއްވައި އެމަނިކުފާނުގެ ސިޔާސަތުތައް ހާމަކުރައްވައި ކެމްޕެއިން ކުރައްވާނެއެވެ.
މީގެ އިތުރުން ވާދަވެރި އަނެއް ކެންޑިޑޭޓު ރައީސް މުޙައްމަދު ނަޝީދު ވަނީ މިއަދު އިތުރު ދެ އަތޮޅަކަށް ފުރާވަޑައިގެންފައެވެ.
ނަޝީދު ވަޑައިގަތީ ކ.އަތޮޅަށާއި ޅ.އަތޮޅަށެވެ. އެމަނިކުފާނުވެސް އެއަތޮޅުގެ އެމްޑީޕީގެ ޢާންމު މެމްބަރުންނާ ބައްދަލުކުރައްވައި ދޮރުންދޮރަށް ހިންގަވާނެއެވެ. އަދި ޢާންމު ޖަލްސާތައް ބާއްވައި އެމަނިކުފާނުގެ ސިޔާސަތުތައް ހާމަކުރައްވާނެއެވެ.
އެމްޑީޕީގެ ރިޔާސީ ޕްރައިމެރީ އޮންނާނީ މިމަހުގެ 28ވަނަ ދުވަހުއެވެ.
