ރައީސް މުޙައްމަދު ނަޝީދަކީ ދީނީ ގޮތުންނާއި ދުނިޔަވީ ގޮތުންވެސް ރާއްޖެއަށް ވަރަށްބޮޑަށް ގެއްލުން ދީފައިވާ މީހެއްކަމަށާ، ނަޝީދު ރާއްޖޭގެ ވެރިކަމަށް އަޔަނުދޭން ދުޢާކޮށް ގަދަ އަޅައި މަސައްކަތްކުރަންޖެހޭކަމަށް ދީނީ ޢިލްމުވެރިޔާ ޑރ.މުޙައްމަދު އިޔާޒް ވިދާޅުވެއްޖެއެވެ.
ޑރ.އިޔާޒް މިހެން ވިދާޅުވީ ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔައުޤޫބު ޢަބްދުﷲ ވިދާޅުވީ ވާހަކަފުޅަކާ ގުޅޭގޮތުން އޮންލައިން ނޫހެއްގައިވާ ޚަބަރެއް ޝެއަރ ކުރައްވައި ކުރެއްވި ޓްވީޓެއްގައެވެ.
ޑރ.އިޔާޒް ވިދާޅުވީ ޔަޢުޤޫބު ވިދާޅުވީ ވަރަށްބޮޑު ތެދެއްކަމަށާ، ނަޝީދު ރާއްޖޭގެ ވެރިކަމަށް އަޔަ ނުދޭން ދުޢާކޮށް އެކަމަށްތަކައި ގަދައަޅައި މަސައްކަތްކުރަން ޖެހޭކަމަށެވެ.
ރޭ ސަންގު ޓީވީގައި ވާހަކަފުޅުދައްކަވަމުން ޔައުޤޫބު ޢަބްދުﷲ ވިދާޅުވީ ރާއްޖޭގެ ވެރިކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ގެންނަން ހެޔޮ ނުވާނެ ކަމަށެވެ. ނަޝީދުގެ ވެރިކަމުގައި ރާއްޖޭގެ ޙާލަތު ބަޔާންކުރައްވަމުން ޔަޢުޤޫބު ވިދާޅުވެފައިވަނީ، ނަޝީދުގެ ވެރިކަމުގައި މުޅި ގައުމު އަނދަވަޅަކަށް ވެއްޓުނުކަމަށެވެ. ގައުމުގެ ވިޔަފާރިތައް ބަނގުރޫޓުވިކަމަށާ، ގައުމުގެ އިގްތިސާދު ހަލާކުވިކަމަށެވެ. ގައުމު ފުން އަނދަވަޅަކަށް ވެއްޓުމުން އޭގެ މާނައަކީ ރައްޔިތުން ނިކަމެތިވެ ހާލުގައި ޖެހުނީކަމަށާ، ނަޝީދު އަލުން ވެރިކަމަށް އައިސްފިނަމަ، ލަންކާ އަށް ވުރެ ނުބައި ހާލަތަކަށް އެހާލަތުގައި ދިވެހިރާއްޖެ ދާނެކަމަށް ޔައުޤޫބު ވިދާޅުވިއެވެ.
ވަރަށް ބޮޑު ތެދެއް @Yaugoob181. ދީނީ އަދި ދުނިޔަވީ ގޮތުންވެސް ޤައުމަށް ބޮޑެތި ގެއްލުންތަކެއްދީފައިވާ ފަރާތެއް @MohamedNasheed އަކީ. އިތުރު ގެއްލުމެއް ދިނުމަށް ފުރުޞަތެއް ނުލިބުން އެދި ދުޢާކޮށް ގަދައަޅާ މަސައްކަތް ކުރަންޖެހޭ. https://t.co/cmD8S01uQV
— Dr.Mohamed Iyaz (@dr_iyaz) January 11, 2023
ރައްޔިތުންގެ މަޖިލީހުގެ އެމްޑީޕީގެ މެމްބަރުންނާއި އެޕާޓީގެ ބައެއް ޢާންމު މެންބަރުން ނަޝީދަށް ފާޑުކިޔައި އޭނާއާ ދެކޮޅަށް މަސައްކަތް ކުރުމަކީ ވަރަށް ރަނގަޅު ހެޔޮ ފާލެއްކަމެއް ކުރިންވެސް ޑރ.އިޔާޒް ވަނީ ވިދާޅުވެފައެވެ.
