އެހެން ޕާޓީއެއްގައި ނަން އޮވެގެންކަމަށް ބުނެ އެމްޑީޕީގެ 39،398 މެންބަރުން ނުވަތަ ޕާޓީގެ ދަފްތަރުގެ %42 މެންބަރުން ޕާޓީގެ ދަފްތަރުން އުނިކޮށްފައިވާކަމަށާ، އެއީ ރައީސް ނަޝީދަށް ވޯޓުދިނުން އެންމެ ގާތް މެންބަރުންގެ ވޯޓުލުމުގެ ޙައްޤު ނިގުޅައިގަތުމަށް ހިންގާފައިވާ ނާއިންސާފު އަދި ޙީލަތްތެރި ޢަމަލެއްކަމަށް ބުނެ އަނެއްކާވެސް ނަޝީދު ޝަކުވާކުރައްވައިފިއެވެ.
ނަޝީދު މިގޮތަށް ޝަކުވާކުރެއްވީ، މިއީ ބަލައިގަނެވޭނޭ ކަމެއް ނޫންކަމަށް ވިދާޅުވެ މިނިވަން އިންސާފުވެރި ރިޔާސީ ޕްރައިމެރީއަކަށް ގޮވާލައި މިއަދު ނެރުއްވި ބަޔާނެއްގައެވެ.
މިއަދު ނަޝީދު ނެރުއްވި ބަޔާނުގައިވަނީ މާފަހުން އެކުލަވާ ޝަރުތުތަކެއް، މާއިހުއްސުރެ އެމްޑީޕީއަށް ސޮއިކޮށްގެން ތިބި ޕާޓީގެ އެންމެ ސީނިއަރ މެންބަރުންގެ މައްޗަށް ތަންފީޒުކުރުމަކީ ބުއްދީގެ މަގުންވެސް، އަދި ޤާނޫނުގެ ދަށުންވެސް ބަލައިގަނެވޭނެ ކަމެއް ނޫންކަމަށެވެ. އަދި ގަނޑުކޮށް އުނިކުރި މެންބަރުންގެ މެންބަރޝިޕް އިޔާދަކޮށް، އެމެންބަރުންގެ ސިޔާސީ-މަދަނީ ޙައްޤުތައް ޙިމާޔަތްވާނެ މަގުން، އިންތިޚާބުގައި ވޯޓުލުމުގެ ފުރުސަތު ދިނުމަށް ޕާޓީގެ ޗެއަރޕާސަނާއި، އިސް އޮފިޝަލުންގެ މައްޗަށް ގޮވައިލާކަމަށް ނަޝީދުގެ ކެމްޕެއިން އޮފީހުން އޭނާ ނެރުއްވި ބަޔާނުގައިވެއެވެ.
މީގެ އިތުރުން ރިޔާސީ ޕްރައިމެރީގެ އެންމެހައި ކަންކަން އިންތިޒާމްކޮށް ބެލެހެއްޓުމުގެ ޒިންމާ އަސާސީ ޤަވާއިދުން ޙަވާލުކޮށްފައިވާ ކޮމިޓީ، އަސާސީ ޤަވާއިދުގައި ބަޔާންކުރާ ގޮތަށް ޤައުމީ މަޖިލީހުން އިންތިޚާބު ކުރުމުގެ ކުރީން އެކޮމިޓީން ކުރާންޖެހޭ މަސައްކަތް ކޮންމެވެސް އެހެން ފަރާތަކުން ކޮށް، ޕާޓީއިން އެކަންކަން އިޢުލާނުކޮށްފައިވާކަމަށާ، އެއީ އަސާސީ ޤަވާއިދާ ޚިލާފަށް ހިންގާފައިވާ ކަމެއްކަމަށްވެސް ނަޝީދު ވިދާޅުވެފައިވެއެވެ.
އަދި ރިޔާސީ ޕްރައިމެރީ އިޢުލާންކުރީ 18 ޑިސެންބަރު 2022 ގައި ކަމަށްވީއިރު ޕާޓީން ޢާންމުކުރި "ރިޔާސީ ޕްރައިމެރީގައި ވާދަކުރާ ކެންޑިޑޭޓުންނަށް ތާޢީދު ހޯދުމަށް ފުރާންޖެހޭ ފޯމު" އެތާރީޚުގެ މާކުރީން، ވާދަވެރި ކެންޑިޑޭޓް – ރައީސް އިބްރާހިމް މުޙައްމަދު ޞާލިޙްގެ ކެންޕެއިނަށް ލިބި، އެމުއްދަތުގައި ތާޢީދު ފޯމުތައް ފުރަމުން ގެންގޮސްފައިވާކަމަށްވެސް ނަޝީދު ތުހުމަތުކުރައްވާފައިވެއެވެ. މީގެއިތުރުން ރިޔާސީ އިންތިޚާބުގެ ޕްރައިމަރީގައި ވޯޓުލެވޭނެ ކަމަށް ޕާޓީން ކަނޑައަޅާފައިވަނީ އިލެކްޝަންސް ކޮމިޝަންގެ ދަފްތަރުގައި ހިމެނޭ ޕާޓީގެ މެންބަރުންނަށް އެކަނި ކަމަށާ، އެގޮތުން، ޕާޓީގެ ނިންމުމަކީ ރިޔާސީ ޕްރައިމަރީއަށް ކުރިމަތިލުމަށް ހުޅުވާލި ތާރީޚްކަމުގައިވާ 18 ޑިސެމްބަރ 2022 އާ ހަމައަށް ޕާޓީގެ މެންބަރުންގެ ގޮތުގައި ރަޖިސްޓަރީވެފައިވާ މެންބަރުންނަށް ކަން ފާހަގަކުރައްވާފައިވެއެވެ. އެހެންނަމަވެސް އެތާރީޚުގައި އިލެކްޝަންސް ކޮމިޝަނުގެ ދަފްތަރުގައި ނުހިމެނޭ 457 މީހަކު އެމްޑީޕީގެ ދަފްތަރުގައި ހިމަނާފައިވާކަމަށާ، އެމީސްމީހުން ދަފްތަރުގައި ހިމަނާފައި އެވަނީ ވާދަވެރި ކެނޑިޑޭޓަށް ނާޖާއިޒް ފައިދާ ހޯދައިދިނުމުގެ ބޭނުމުގައި ކަމަށްކަމުގައިވެސް ނަޝީދު ވަނީ ތުހުމަތުކުރައްވާފައެވެ.
މިކަންކަން މައްސަލަތަކެއްގެ ގޮތުގައި އެމްޑީޕީގެ ސެކްރެޓޭރިއަޓަށް ޕޯޓަލް އަދި ސިޓީ މެދުވެރިކޮށް ހުށަހަޅާފައި ވާނެކަމަށްވެސް ނަޝީދުގެ ބަޔާނުގައިވެއެވެ.
