ޕީޕީއެމްގެ ދާއިރާތަކުގެ އިންތިޚާބުގައި ބައިވެރިވުމަށް އެމްއާރުއެމްއިން މެމްބަރުން ވަކިވާތީ އެޕާޓީން ކަންބޮޑުވުން ފާޅުކޮށްފިއެވެ.

ޕްރޮގްރެސިވް ކޮންގްރެސް ކޯލިޝަންގެ ދާއިރާތަކުގެ އިންތިހާބު ބޭއްވުމަށް ހަމަޖެހިފައިވަނީ ނޮވެމްބަރު މަހުގެތެރޭގައެވެ. ވަކި ޕާޓީއެއްގެ ނަން ހާމަނުކޮށް އެމްއާރުއެމްއިން ނެރުނު ބަޔާނުގައި ބުނެފައިވަނީ އެއްވެސް ޕާޓީއެއްގެ އެތެރޭގެ އިންތިޚާބުގައި ބައިވެރިވުމަށް، އެމްއާރުއެމްއިން ވަކިވުމަކީ ބަލައި ގަނެވޭނެ ކަމެއް ނޫންކަމަށެވެ.

އެމްއާރުއެމްއަށް އިތުރު މެންބަރުން ގުޅިވަޑައި ގަތުމަކީ އަބަދުވެސް މަރުޙަބާ ކިޔާ ކަމެއްކަމަށާއި، ނަމަވެސް އެހެން ޕާޓީތަކުގެ އެތެރޭގެ އިންތިހާބުތަކުގައި ބައިވެރިވުމަށް، އެޕާޓީގެ ބައެއް މެންބަރުން ޕާޓީން ވަކިވަމުން ދާކަން ފާހަގަވެފައިވާތީ އެކަން އެގޮތަށް ނުކުރުމަށް އެމްއާރުއެމްގެ މެމްބަރުންނަށް ވަނީ ނަސޭހަތްތެރި ވެފައެވެ.

އެހެން ސިޔާސީ ޕާޓީއެއްގެ އެތެރޭގެ އިންތިޚާބުގައި ބައިވެރިވުމަށް ވަގުތީ ގޮތުން ނަމަވެސް އެމްއާރުއެމްއިން ވަކިވުމަކީ އެޕާޓީން ގަބޫލު ކުރާ އުސޫލެއް ނޫންކަމަށް ވަނީ ބުނެފައެވެ. އެހެން ކަމަށްވުމުން އެމްއާރުއެމްގެ މެމްބަރުން ޕާޓީން ވަކި ނުވުމަށް އެޕާޓީން ވަނީ އިލްތިމާސް ކޮށްފައެވެ.

އެމްއާރުއެމްއަކީ ސިޔާސީ ޕާޓީތަކުގެ ޤާނޫނުގައި ބުނާ 3،000 މެމްބަރުން ހަމަނުވެގެން އިލެކްޝަނުން ދިން މުއްދަތުގައި އަދަދު ހަމަކޮށްފައިވާ ޕާޓީއެކެވެ.

އެމްއާރުއެމްއަކީ 2005ވަނައަހަރު ސިޔާސީ ޕާޓީތައް އުފެއްދުމުގެ ހުއްދަ ދިންފަހުން ރައީސް މައުމޫން އުފެއްދެވި ތިން ވަނަ ސިޔާސީ ޕާޓީއެވެ. އެމްއާރުއެމްގެ މިހާރުގެ ރައީސަކީ ފާރިސް މައުމޫނެވެ.