ރައްޔިތުންގެ މަޖިލީހުގެ ރައީސް މުޙައްމަދު ނަޝީދު މަޤާމުން ދުރުކުރުމުގެ މަސައްކަތް ހުއްޓާނުލަިއ ކުރިއަށްދާކަމަށް އެމްޑީޕީ ޕާލިމަންޓްރީ ގްރޫޕުގެ މެންބަރުން ވިދާޅުވެއްޖެއެވެ.

ރައީސް ނަޝީދު މަޖިލީހުގެ ރައީސްގެ މަޤާމުން ވަކިކުރުމުގެ މަސައްކަތް އެމްޑީޕީގެ ޕީޖީ ގްރޫޕުގެ ބައެއް މެންބަރުން ފެށީ، ރައީސް އިބްރާހީމް މުޙައްމަދު ޞާލިޙަށް ނިސްބަތްކުރައްވާ ބަދުއަޚްލާޤީ ތުހުމަތުތަކެއް ރައީސް ނަޝީދު ކުރެއްވުމާއި ގުޅިގެންނެވެ. އަދި އެއްޖިންސުން ގުޅުން ހިންގިކަމުގެ ތުހުމަތުކުރެވޭ ރައީސް ނަޝިދުގެ ކޮއްކޮ ނާޒިމް ސައްޠާރުގެ ދިފާޢުގައި ނަޝީދު ތެދުވުމުންނެވެ.

އެމްޑީޕީގެ މަޖިލިސް މެންބަރުން ވިދާޅުވީ، ރައީސް ނަޝީދު މަޤާމުން ދުރުރުކުރުމުގެ މަސައްކަތް ހުއްޓާނުލާނެކަމަށެވެ. އެގޮތުން މަޖިލީހަށް މައްސަލަ ވެއްދުމަށް ބޭނުންވާ މިންވަރަށް ސޮއި ލިބިފައިވާއިރު، މިހާތަނަށް 30އަށްވުރެ މެންބަރުންގެ ސޮއި ލިބިފައިވާކަމަށް މެންބަރަކު ވިދާޅުވިއެވެ. މަޖިލީހަށް މައްސަލ ވެއްދުމަށް ބޭނުންވަނީ 22 މެންބަރުންގެ ސޮޔެވެ.

ރައީސް ނަޝީދު މަޤާމުން ދުރުކުރުމުގައި އިސްކޮށް އުޅުއްވަނީ ރައީސް ޞާލިޙަށް ތާޢީދުކުރައްވާ މެންބަރުންނެވެ.

އެމްޑީޕީ ޕާލިމަންޓްރީ ގްރޫޕުގެ މެންބަރަކު މަޢުލޫމާތު ދެއްވިގޮތުގައި ރައީސް ނަޝީދު މަޖިލީހުގެ ރައީސްގެ މަޤާމުން ދުރުކުރެއްވުމުގެ މަސައްކަތް ފަށާފައިވަނީ އެފަދަ މަޤާމެއްގައި ހުންނަވާ ރާއްޖޭގެ ރައީސުލްޖުމްހޫރިއްޔާއަށް ހަޖޫޖަހާއި އިސްލާމްދީނަށް ފުރައްސާރަކުރާތީއެވެ.

ރައީސް ނަޝީދު މީގެ ކުރިން އެމްޑީޕީގެ ޗެއަރޕާސަން އަދި އިކޮނޮމިކް މިނިސްޓަރ ފައްޔާޟް އިސްމާޢީލަށް ފާޑުވިދާޅުވެފައިވީނަމަވެސް، ދާދި ފަހުން ވަނީ އެއީ ކުރެވުނު ގޯސްކަމެއް ކަމަށް ވިދާޅުވެ ފައްޔާޟްގެ ކިބައިން މައާފަށް އެދެން ބޭނުންވާކަމަށް ވިދާޅުވެފައެވެ.

ނަޝީދު ވަނީ ފައްޔާޒާއި ދެކޮޅަށް މަސައްކަތް ކުރުމަކީ ކުރެވުނު ގޯސް ކަމެއްކަމަށް ވިދާޅުވެފައެވެ.

ގާނޫނުއަސާސީގައިވާ ގޮތުން ނަމަ ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމަށް ފާސްވާނީ ހާޒިރުވެ ވޯޓުގައި ބައިވެރިވާ މެންބަރުންގެ އަގުލަބިއްޔަތުންނެވެ.