ސްރީ ލަންކާ ހިމެނިގެން ދަނީ ފަހުގެ ތާރީޚެއްގައި ދުނިޔޭގެ ގައުމުތަކުގެ ތެރެއިން އެންމެ އާދަޔާ ޚިލާފް ތަޖުރިބާއެއް ކުރަން ޖެހިފައިވާ އެއް ގައުމު ކަމުގައެވެ.

ސަބަބަކީ، ސްރީ ލަންކާގެ އިގުތިސާދު ކާރިސާއަކަށް ވެއްޓި، ގައުމު ބަނޑަށް ޖެހިފައިވާތާ އެތައް މަހެއް ފާއިތުވެގެން ގޮސްފައިވާއިރު، ގައުމަށް ކުރިމަތިވެގެން ގޮސްފައިވާ މައްސަލަތަކަށް ހައްލު ނުލިބި، ސިޔާސީ މަސްރަހަށް އަންނަމުންދާ ބަދަލުތަކާއެކުވެސް، ހާލަތަށް ފިނިކަމެއް އަނާނޭކަމުގެ އެއްވެސް ނިޝާނެއް ފެންނަމުން ނުދާތީއެވެ.

މިގޮތުން، 1948ވަނަ އަހަރަށްފަހު ސްރީ ލަންކާއަށް ކުރިމަތިވެފައިވާ އެންމެ ބޮޑު އިގްތިސާދީ ފުންވަޅުގަޑުން އެގައުމަށް އަރައި ނުގަނެވި، ހާލަތު ގޯހުންގޯހަށް ގޮސް، ގައުމުގެ އެތައް ހާސް ރައްޔިތުންނެއް އެންމެ ފަހުން މަގުތަކަށް ނިކުމެ މުޒާހިރާކޮށް، ރިޔާސީ ގަނޑުވަރާއި ރައީސް އޮފިސް ހިސާރުކޮށް، ފެނިގެން ގޮސްފައިވާ މަންޒަރުތަކަކީ ފަހުގެ ތާރީޚެއްގައި ދުނިޔޭގެ ގައުމުތަކުގައި ތަމްސީލުވެގެން ގޮސްފައިވާ މަންޒަރުތަކެއް ނޫނެވެ.

އަދި ބަނޑުހައި ހޫނުކަމުގައި ތިބި އާންމު ރައްޔިތުން ކުރަމުންދިޔަ އިހުތިޖާޖުތަކުގެ ނަތީޖާއެއްގެ ގޮތުން ސްރީ ލަންކާގައި އޮތް ބާރުގަދަ ރާޖަޕަކްސަ ޚާންދާނުގެ ވެރިކަންވެސް ވެއްޓި، ބޮޑުވަޒީރު އިސްތިއުފާ ދެއްވާ، ރައީސަށް ޖެހިވަޑައިގަތީ ގައުމު ދޫކުރައްވާ ފިއްލަވާށެވެ.

ސްރީ ލަންކާގެ ރައީސްކަމުގެ މަގާމްގައި ހުންނެވި ގޮޓަބަޔަ ރާޖަޕަކްސަ އިސްތިއުފާ ދެއްވުމަށް އެގައުމުގެ އެތައްހާސް ރައްޔިތުން އަޑު އުފުލަމުން ދިޔައީ، ގައުމަށް ކުރިމަތިވެފައިވާ ހާލަތުގެ ޒިންމާ އެތައް ޒަމާނެއްވަންދެން އެގައުމުގެ ސިޔާސީ މަސްރަހުގައި ވަކި ހިއްޕާލައިގެން ތިއްބެވި ސިޔާސީ ފަރާތްތަކުން އުފުއްލަވަން ޖެހޭނެކަމަށް ބުނަމުންނެވެ. މީގެ ތެރޭގައި ރައީސްކަމުގައި ހުންނެވި ގޮޓަބަޔަގެ އިތުރުން ފަހުން ބޮޑުވަޒީރުކަމަށް ވަޑައިގެންނެވި ރަނިލް ވިކްރެމެސިންގެވެސް ހިމެނިވަޑައިގަންނަވައެވެ.

ނަތީޖާއެއްގެ ގޮތުން، ރައީސް ގޮޓަބަޔަގެ އިތުރުން، ބޮޑުވަޒީރު ރަނިލް ވިކްރެމެސިންގހެގެ އިސްތިއުފާއަށްވެސް މުޒާހިރާކުރާ ފަރާތްތަކުން ދިޔައީ އަޑު އުފުލަމުންނެވެ. އަދި ރައްޔިތުންގެ ޑިމާންޑްތަކާ އިޖާބަދެއްވާ ގޮޓަބަޔަ ރާޖަޕަކްސައާއެކީ އިސްތިއުފާ ދެއްވުމަށް ތައްޔާރަށް ހުނެވެނިކަމަށް، އޭރު ބޮޑުވަޒީރުކަމުގެ މަގާމްގައި ހުންނެވި ރަނިލް ވިކްރެމެސިންގހެވެސް އެންމެ ފުރަތަމަ ވިދާޅުވެފައިވެއެވެ.

އެހެންނަަމަވެސް، ގޮޓަބަޔަ މަގާމުން އިސްތިއުފާ ދެއްވުމަށްފަހު ވަޑައިގެންނެވީ ބޮޑުވަޒީރު ރަނިލްއަށް ވަގުތީ ރައީސްކަން ހަވާލު ކުރައްވާފައެވެ. އަދި އެއަށްފަހު، މި މަހުގެ 20ވަނަ ދުވަހު، ސްރީ ލަންކާގެ ގާނޫނުހަދާ މަޖިލީހުން މިވަނީ، ބޮޑުވަޒީރު ރަނިލް ވިކްރެމެސިންހެ ދައުރުގެ ބާކީ އޮތްތަނަށް ސްރީ ލަންކާގެ ރައީސްކަމުގެ މަގާމަށް އައްޔަން ކޮށްފައެވެ.

ރަނިލް ވިކްރެމެސިންހެ ރައީސްކަމުގެ މަގާމަށް ގާނޫނުހަދާ މަޖިލިހުން އައްޔަން ކުރެއްވިއިރުވެސް ބައެއް ފަރާތްތަކުން ދިޔައީ ރަނިލްއާއި ދެކޮޅަށް މުޒާހިރާ ކުރަމުންނެވެ.

ތަޖުރިބާހުރި ބޭފުޅެއް! އެހެންނަމަވެސް ރައްޔިތުންގެ އިތުބާރެއް ނެތް!

ސްރީ ލަންކާގެ ގާނޫނުހަދާ މަޖިލިހުން އެގައުމުގެ ރައީސް ކަމަށް ކުރީގެ ބޮޑުވަޒީރު ރަނިލް ވިކްރެމެސިންގހެ އައްޔަން ކޮށްފައިވަނީ، އޭނާއާއި ވާދަކުރެއްވި، ސްރީ ލަންކާގެ ކުރީގެ ރައީސް ގޮޓަބަޔަގެ ބޭބޭ، މަހިންދަ ރާޖަޕަކްސަގެ އަރިސް ބޭފުޅެއް ކަމުގައިވާ އަލަހައްޕެރުމައާއި ވާދަކުރައްވާ ކާމިޔާބު ކުރައްވައިގެންނެވެ.

ގާނޫނުހަދާ މަޖިލިހުގައި ނެގިގެންދިޔަ މި ވޯޓުގައި ރަނިލްއަށް 134 ވޯޓު ލިބިގެންދިޔައިރު އޭނާއާއި ވާދަކުރެއްވި، ސްރީ ލަންކަން ޕޮޑުޖަނަ ޕެރަމުނާ (SLPP) އަށް ނިސްބަތްވާ އަލަހައްޕެރުމައަށް ލިބިފައިވަނީ 82 ވޯޓެވެ. އިންތިޚާބުގައި ވާދަކުރި 3 ވަނަ ކެނޑިޑޭޓު ކަމުގައިވާ ނޭޝަނަލް ޕީޕަލްސް ޕަވަރ ޕާޓީގެ ލީޑަރު ވިކްރެމެސިންގެ ޕާޓީން ގާނޫނުހަދާ މަޖިލިހުގައި ތިއްބަވަނީ އެންމެ ތިން މެމްބަރުން ކަމަށް ވާތީ އޭނާއަށް ލިބިފައިވަނީ ހަމައެކަނި މި 3 މެމްބަރުންގެ ތާއީދެވެ.

ސްރީ ލަންކާގެ ގާނޫނުހަދާ މަޖިލިހުގައި ނެގުނު މި ވޯޓުގެ ނަތީޖާއަށް ބަލާއިރު، ގާނޫނުހަދާ މަޖިލިހުގައި އެންމެ ގިނަ މެމްބަރުން ތަމްސީލުކުރަމުންދާ، ރާޖަޕަކްސަގެ SLPPގެ ގިނަ މެމްބަރުންވެސް ރަނިލްއަށް ވޯޓު ދެއްވާފައި ވެއެވެ.

ސްރީ ލަންކާގެ 8 ވަނަ ރައީސްގެ ގޮތުގައި ގާނޫނުހަދާ މަޖިލިހުން އައްޔަންކުރި ރަނިލް ވިކްރެމެސިންގހެއަކީ އެގައުމުގައި މިއަދު ހުންނެވި، ސިޔާސީގޮތުން އެންމެ ތަޖުރިބާކާރު އެއް ބޭފުޅާއެވެ. މިގޮތުން އޭނާ ފާއިތުވެދިޔަ ތަނުގައި 6 ފަހަރެއްގެމަތިން ރަނިލް ސްރީ ލަންކާގެ ބޮޑުވަޒީރުކަން ކުރައްވާފައިވާއިރު، ދެ ފަހަރެއްގައި ރައީސްކަމަށް ވާދަ ކުރައްވާފައިވެއެވެ.

ރަނިލް އެންމެ ފުރަތަމަ ސްރީ ލަންކާގެ ބޮޑުވަޒީރުކަމަށް އައްޔަން ކުރެވުނީ، 1993 އިން 1994 ވަނަ އަހަރަށް، އެގައުމުގެ ކުރީގެ ރައީސް، ނަރަސިންގހެ ޕްރެމަދާސާ އަވަހާރަ ކޮށްލެވުމާއި ގުޅިގެންނެވެ.

އެއަށްފަހު، 2015ވަނަ އަހަރު ދެވަނަ ފަހަރަށް ސްރީ ލަންކާގެ ބޮޑުވަޒީރުކަމަށް ރަނިލް އައްޔަން ކުރެވުނީ، އެގައުމުގެ ރައީސްކަން މައިތިރިޕަލަ ސިރިސޭނާގެ ކޯލިޝަންއަށް ކާމިޔާބު ކުރުމާއި ގުޅިގެންނެވެ. އަދި އެއަށްފަހު، 2018ވަނަ އަހަރު ސިރިސޭނާވަނީ ރަނިލް ބޮޑުވަޒީރުކަމުގެ މަގާމުން ދުރުކުރައްވާފައެވެ. އެހެންނަމަވެސް، އޭގެ 4 މަސްފަހުން، ސިރިސޭނާ އެގައުމުގެ ގާނޫނުހަދާ މަޖިލިސް އުވާލެއްވީ ގާނޫނު އަސާސީއާއި ޚިލާފަށް ކަމަށް ސުޕްރިމް ކޯޓުން ހުކުމް ކުރުމާއި ގުޅިގެން އަނެއްކާވެސް ސިރިސޭނާ ހަމަ އެއަހަރު ރަނިލް ބޮޑުވަޒީރުކަމަށް އައްޔަން ކުރައްވާފައި ވެއެވެ.

ރަނިލް ބޮޑުވަޒީރުކަމުން އިސްތިއުފާ ދެއްވާފައިވަނީ، 2019ވަނަ އަހަރުގެ ނޮވެމްބަރުމަހު، ޔޫއެންޕީ އެއަހަރު ބޭއްވުނު އާންމު އިންތިޚާބުން ބަލި ވުމާއި ގުޅިގެންނެވެ.

ސްރީ ލަންކާގެ 8 ވަނަ ރައީސްކަމުގެ މަގާމަށް ވަޑައިގެންނެވި ރަނިލް ވިކްރެމެސިންހެއަކީ 6 ފަހަރެއްގެ މަތިން އެގައުމުގެ ބޑޮޑުވަޒީރުކޮށް ކުރައްވާ، ސިޔާސީ މަސްރަހުގައި ގިނަގުނަ ތަޖުރިބާތަކެއް ލިބިވަޑައިގެންހުންނެވި ބޭފުޅަކަށްވި ނަމަވެސް، އޭނާ ހިމެނިވަޑައިގެންނެވީ އާންމުންގެ ތާއީދު އެހާބޮޑަށް ލިބިވަޑައިގެން ހުންނެވި ބޭފުޅެއްގެ ގޮތުގައެއް ނޫނެވެ.

ސަބަބަކީ ފާއިތުވެދިޔަ ތަނުގައި ދެފަހަރެއްގެމަތިން އޭނާ ސްރީ ލަންކާގެ ރިޔާސީ އިންތިޚާބުގައި ވާދަކުރައްވާފައިވާއިރު، ދެފަހަރުވެސް އޭނާއަށް ކުރިމަތިލައްވަން ޖެހިވަޑައިގެންނެވީ ނާކާމިޔާބީއާއެވެ. އަދ މީގެ އިތުން 2020ވަނަ އަހަރު ބޭއްވުނު ގާނޫނުހަދާ މަޖިލިހުގެ އިންތިޚާބުގައި ރަނިލްއަށް ވެރިކަންކުރާ ރަށް ކޮލޮމްބޯގެ ސީޓްވެސް ގެއްލިގެން ދިޔައެވެ.

އެހެންނަމަވެސް 2021ވަނަ އަހަރު އަނެއްކާވެސް އޭނާ ގާނޫނުހަދާ މަޖިލީހަށް ވެދެވަޑައިގަންނަވާފައި ވެއެވެ.

އެހެންކަމުން، ސްރީ ލަންކާގެ ވެރިކަމުގެ އެންމެ މަތިފަޑިއާއި ހަމައެއް އެއްވެސް ފަހަރެއްގައި އާންމު ރައްޔިތުންގެ ވޯޓަކުން ރަނިލްއަށް ވަޑައިގެންނެވިފައި ނުވިނަމަވެސް، އޭނާ ފާހަގަ ކުރެވިފައިވަނީ، ސިޔާސީ ގޮތުން ކުޅިބައި އެތުރިގެން ދާއިރު، އަބަދުވެސް މަތީ ހަރުފަތާއި ހަމައަށް ވަޑައިގެންނެވުމުގެ ފުރުސަތު ހޯއްދެވުމަށް ކުޅަދާނަ ތޫނުފިލި ސިޔާސީ ބޭފުޅެއްގެ ގޮތުގައެވެ.

 

ރަނިލް އިސްތިއުފާ ދިނުމަށް ރައްޔިތުން ކުރާ ޑިމާންޑުތައް ކުރިއަށް!

ސްރީ ލަންކާއަށް ކުރިމަތިވެފައިވާ އިގްތިސާދީ ކާރިސާއާއެކު، އެގައުމުން ފާގަވާން އޮތް އެންމެ މުހިންމު އެއްކަމަކީ، ރައްޔިތުންގެ ހިތްތަކުގައި ވެރީންނާމެދު އުފެދިފައިވާ ނަފްރަތާއި ރުޅިވެރިކަމެވެ. އަދި ސިޔާސީ ގޮތުން އެތައް ޒަމާނެއް ވަންދެން އިސްކޮށް ތިއްބެވި ލީޑަރުންގެ މައްޗަށް އޮތް އިތުބާރު އެކީ ގެއްލިގެން ގޮސްފައި ވަތަނެވެ. ގޮޓަބަޔަގެ އިސްތިއުފާއަށްފަހު، ސިޔާސީ އާ ލީޑަރަކު ގައުމުގެ ރިޔާސަތާއި ހަވާލުވެ ވަޑައިގަންނަވާނޭކަމަށް ސްރީ ލަންކާގެ އެތައްހާސް ރައްޔިތުން ދިޔައީ އުއްމީދު ކުރަމުންނެވެ.

އޭގެ އެންމެ ފުރިހަމަ ހެއްކަކީ ސްރީ ލަންކާގައި ހިގަމުންދާ ހަމަ ނުޖެހުންތަކުގައި ޚުދު ރަނިލްގެ އަމިއްލަފުޅު ގޭގައިވެސް ހުޅުޖަހާ އަންދާލާފައި ވުމެވެ.

މިގޮތުން ސްރީ ލަންކާގެ ގިނަ އަދަދެއްގެ އާންމު ރައްޔިތުން ގަބޫލުކުރާ ގޮތުގައި އެގައުމަށް ކުރިމަތިވެފައިވާ އިގްތިސާދީ ކާރިސާއަކީ ގައުމުގެ ސިޔާސީވެރީންގެ އަމިއްލަ މަސްލަހަތުގައި ފާއިތުވެދިޔަ ތަނުގައި ނިންމާފައިވާ ގޯސް ނިންމެވުންތަކުގެ ނަތީޖާއެއްގެ ގޮތުން ގައުމަށް ކުރިމަތިވެގެން ގޮސްފައިވާ ހާލަތެކެވެ. އަދި މި ޒިންމާ މިހާރުގެ ރައީސް ރަނިލް ވިކްރެމެސިންގހެވެސް ނަންގަވަން ޖެހޭނެކަމުގައި އެތައް ބަޔަކު ދެކެއެވެ.

ނަތީޖާއެއްގެ ގޮތުން، ސްރީ ލަންކާގެ 8 ވަނަ ރައީސަކަށް އެގައުމުގެ ގާނޫނުހަދާ މަޖިލިހުން ރަނިލް އައްޔަން ކުރިއިރުވެސް، އޭނާގެ އިސްތިއުފާއަށް ގޮވާ، ބައެއް ފަރާތްތަކުން ދިޔައީ މުޒާހިރާ ކުރަމުންނެވެ. މި މުޒާހިރާތައް މިހާރުވެސް ދަނީ ކުރިއަށެވެ. އަދި އެގައުމުގެ ގޯލް ފޭސްގައި ހިންގަމުންދާ ބޮޑތި މުޒާހިރާތައް އިންތިޒާމްކުރާ ފަރާތްތަކުން މިހާރު ނިންމާފައިވަނީ، އާ ރައީސް ރަނިލް ވިކްރެމެސިންގެވެސް އިސްތިއުފާ ދެއްވުމާއި ހަމައަށް މި މުޒާހިރާތައް ކުރިޔަށް ގެންދިއުމަށެވެ.

އެތައް ދުވަހެއްގެ އިގްތިސާދީ ކާރިސާއިން އުފަންކުރި، ސްރީ ލަންކާއަށް ކުރިމަތިވެފައިވާ ސިޔާސީ ކާރިސާއަށް އަދިވެސް ނިމުމެއް އަންނާނޭކަމުގެ އެއްވެސް ކޮޅުމައްޗެށް އަަދި ފެންނާކަށް ނެތެވެ.