އެއްޖިއްސުން ގުޅުން ހިންގާކަމުގެ ތުހުމަތުގައި ލީކުވެގެން އުޅޭ ފޮޓޯއާއި، ވީޑިއޯގެ ސައްޚަކަން ކަށަވަރު ނުވާކަމަށާއި، މަޖިލީހުގެ މެމްބަރުން ފުލުހަށް ހާޒިރު ކުރާނަމަ މަޖިލީހަށް އެގެންޖެހޭނެކަމަށް މަޖިލިސް ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލިސް ރައީސް މިހެން ވިދާޅުވީ ބަރަހަނާ ވީޑިއޯތަކުގެ މައްސަލައިގައި ރައްޔިތުންގެ މަޖިލީހުގެ އެއްވެސް މެމްބަރަކު ފުލުހަށް ހާޒިރު ކުރާނަމަ، މަޖިލީހުގެ ރައީސް، ރައީސް ނަޝީދަށް އަންގަން އެމަނިކުފާނު އެދިފައިވާތީ އެއީ އެކަން އޮންނަންޖެހޭ ގޮތްތޯ އާސްކް ސްޕީކާ ޕްރޮގުރާމުގައި މީހަކު ކުރި ސުވާލަށް ޖަވާބު ދެއްވަމުންނެވެ.
މަޖިލިސް ރައީސް ވިދާޅުވީ ފެހި ޤާނޫނު އަސާސީގެ ދަށުން މެމްބަރުންނަށް ޚާއްސަ އިނާޔަތާއި ރައްކާތެރިކަން ލިބިގެންވާކަމަށެވެ. ލީކުވެފައިވާ ފޮޓޯގެ އެއްވެސް ޞައްޚަކަމެއް ކަށަވަރުނުވާއިރު، ކުރެވޭ ތުހުމަތުތަކުގައި ފަހަރަކު މެމްބަރަކު ހައްޔަރުކޮށް، ހުރިހާ މެމްބަރުން ހައްޔަރު ވުމަކީ ޖާދަ ދެވޭނެކަމެއް ނޫންކަމަށެވެ.
ރައީސް ނަޝީދު ވިދާޅުވަނީ މިމައްސަލާގަިއ ތުހުމަތު ކުރެވޭ މެމްބަރުންގެ ތެރެއިން މެމްބަރު ސަލީމަށް ކުރެވުނު ތުހުމަތާއިއެކު އެމަނިކުފާނުގެ ޚަބަރު ގެނެސްދިން މީޑިއާއަކާއި ދެކޮޅަށް ދައުވާކޮށް ބަދަލު ހޯދަން ނިންމާފައި ނިންމުމަކީ މިފަދަ ވާހަތަކުގެ ހަގީގަތެއްނޫންކަން ހާމަވާކަމެއްކަމަށެވެ.
އެއް ޖިންސުން ގުޅުން ހިންގާ މަންޒަރު ފެންނަ ވީޑިއޯތަކުގެ ތެރެއިން ފުރަތަމަ ވީޑިއޯގައި ފެންނަނީ ރައީސް ނަޝީދުގެ ކޮއްކޮ ނާޒިމް އަބްދުއްސައްތާރު ކަމަށް ވަރަށް ބޮޑަށް ބެލެވެއެވެ. އެ މައްސަލަ ފުލުހުން ތަހުގީގު ކުރަމުންދާއިރު މިހާރު ވަނީ އޭނާ ފުރުން މަނާކޮށް ޕާސްޕޯޓްވެސް ހިފަހައްޓާފައެވެ. ފާޑުކިޔުން އަމާޒުވުމުން ނާޒިމް ވަނީ އޭނާގެ އެކައުންޓްވެސް ޑީއެކްޓިވޭޓް ކޮށްފައެވެ.
ވީޑިއޯތައް އާންމުކުރާ މައްސަލާގައި ނަޝީދު ވަނީ ފުލުހުންނަށްވެސް ތުހުމަތުގެ އިނގިލި ދިއްކުރައްވާފައެވެ. ވިދާޅުވީ ވީޑިއޯތަކާއި ފޮޓޯތައް ނެގުމުގައި ފުލުހުންގެ ބައިވެރިވުމާއި އެހީތެރިކަން އޮތްކަން އެނގިވަޑައިގަންނަވާ ކަމަށެވެ. އޭގެ ފަހަށް ދެން ވިދާޅުވީ ފުލުސް އޮފީސް އިސްލާހު ކުރެއްވުމަށް ކުރެއްވި މަސައްކަތް ކާމިޔާބު ނުވި ކަމަށެވެ. އަދި ރައީސް ސޯލިހަށް އަމާޒު ކުރައްވާ ވިދާޅުވީ އެމަނިކުފާނަށް އަމުދުން އެކަން ނުކުރެއްވުނު ކަމަށެވެ.
