ސަރުކާރު ފަރާތުން މަޖިލީހަށް ހުށައެޅި ހެއްކާ ބެހޭ ބިލުގައި މަސްދަރު ހާމަކުރަން މަޖުބޫރުކޮށް އޮތް މާއްދާއާއި ގުޅޭގޮތުން ނޫސްވެރިން ކަންބޮޑުވުން ފާޅުކުރަމުން ދަނިކޮށް އެ ބިލު މަޖިލީހުން ފާސްކޮށްފިއެވެ.
ސަރިކާރުގެ ފަރާތުން ތިނަދޫ އުތުރު ދާއިރާގެ މެމްބަރު އަބްދުލްމުޣުނީ ހުށަހަޅުއްވާފައިވާ އެ ބިލު ފާސްވީ 50 މެންބަރުންގެ އަޣްލަބިއްޔަތުންނެވެ. ފާސްކުރަން ނުފެންނަކަމަށް 5 މެންބަރު އަދި ވަކިކޮޅަކަށް ވޯޓު ދޭން ނުފެންނަކަމަށް އެއް މެންބަރަކު ވޯޓު ދެއްވިއެވެ.
ހެއްކާއި ބެހޭ ބިލު މިއަދު ފާސްކޮށްފައިމިވަނީ އެ ބިލުގައި ނޫސްވެރިން ލިޔާ ޚަބަރުތަކުގެ މަސްދަރު ހާމަކުރަން މަޖުބޫރުވާ މާއްދާއެއް އޮތުމުން، އެކަމާއި ނޫސްވެރިން ކަންބޮޑުވުން ފާޅުކުރަމުން ދަނިކޮށެވެ. އެގޮތުން މިއަދު މަޖިލިސް ކައިރިއަށް ބައެއް ނޫސްވެރިން އެއްވެ އެކަމުގެ އަޑު އުފުލާފައިވެއެވެ. އެ ނޫސްވެރިންނާއި ބައްދަލުކުރައްވާ މަޖިލީހުގެ ރައީސް ނަޝީދު ވަނީ އެ ބިލު ފާސްކުރިނަމަވެސް، ފަހުން އެ ބިލު އިސްލާހުކުރެވިދާނެކަމަށް ވިދާޅުވެ ބިލު ދިފާޢު ކުރައްވާފައެވެ.
ސަރުކާރުގެ ފަރާތުން މަޖިލީހަށް ހުށައެޅި ހެއްކާއި ބެހޭ ބިލުގައި 136 ވަނަ މާއްދާގައި ނޫސްވެރިން ލިޔާ ހަބަރުތަކަށް މައުލޫމާތު ހޯދުމަށް ބޭނުންކުރާ މަސްދަރުތައް ހާމަކުރުމަށް ކޯޓުތަކަށް މަޖުބޫރުކުރެވޭނެ ހާލަތްތައް ވަނީ ބަޔާންކޮށްފައެވެ. އެގޮތުން އެ މާއްދާގެ (ހ) ގައިވާ ބަޔާންކުރަނީ، ނޫސްވެރިއަކަށް ވަކި މައުލޫމާތެއް ދިންމީހާ އެ މައުލޫމާތު ދިނީ އޭނާ އަކީ ކާކުކަން ހާމަނުކުރާނެކަމަށް އެނޫސްވެރިޔާއަށް ވެފައިވާ ވައުދެއްގެ މައްޗަށް ބިނާކޮށް ކަމުގައި ވާނަމަ، އެ މައުލޫމާތު ދިން މީހާ އަކީ ކާކުކަން އަންގައިދޭނެ ނުވަތަ ކާކުކަން އަންގައިދިނުމަށް އެހީއަކަށް ވެދާނެ އެއްވެސް މައުލޫމާތެއް ޝަރީއަތަށް ހާމަކުރުމަށް އެ ނޫސްވެރިޔާގެ މައްޗަށް ނުވަތަ އޭނާ ވަޒީފާ އަދާކުރާ ތަނުގެ މައްޗަށް މަޖުބޫރެއް ނުކުރެވޭނެކަމަށެވެ.
އަދި މި މާއްދާގެ (ށ)ގައި ބަޔާންކުރަނީ މައްސަލައެއްގެ ހަސްމަކު ހުށަހަޅާ ހުށަހެޅުމެއްގެ މައްޗަށް ބިނާކޮށް ޝަރީއަތުން ފައިސަލާކޮށް ގޮތެއް ކަނޑައަޅަންޖެހޭ ކަންކަމުގެ މައްޗަށް ރިޢާޔަތް ކުރާއިރު ނޫސްވެރިޔާއަށް މައުލޫމާތު ދިން މީހާއަކީ ކާކުކަން ހާމަކުރުމުގައި އޮތް ޢާންމު މަސްލަހަތު އަންނަނިވި ކަންކަމަށް ވުރެން ބޮޑު ކަމުގައި ޝަރީއަތަށް ބުރަވެވޭ ނަމަ ނޫސްވެރިޔާ އަށް މައުލޫމާތު ދިން މަސްދަރު ޝަރީއަތަށް ހާމަކުރުމަށް ނޫސްވެރިޔާ އަށް ނުވަތަ އޭނާ ވަޒީފާ އަދާކުރާ ތަނުގެ މައްޗަށް މަޖުބޫރުކުރެވޭނެކަމަށެވެ.
އެ މާއްދާ އެހެން އޮތުމުން މަޖިލީހުގެ ކޮމިޓީގައި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިންވެސް ކަންބޮޑުވުން ފާޅުކޮށްފައިވެއެވެ. ނޫސްވެރިންގެ ކަންބޮޑުވުންތަކަށް މަޖިލީހުގެ ރައީސް ނަޝީދު ވިދާޅުވީ ހެއްކާ ބެހޭ ބިލުން މަސްދަރު ހާމަކުރަން ޖެހޭނީ ދެ ފަރާތުން އެއްބަސްވާ ހާލަތުގައިކަމަށެވެ. އެނޫންނަމަ ޝަރީއަތަކުން ނިންމައިފިނަމަ މަސްދަރު ހާމަކުރަން ޖެހޭނެ ކަމަށާއި، އެއީ މިހާރުވެސް މަސްދަރު ހާމަކުރަން ޖެހޭނެ ހާލަތެއްކަމަށް ނަޝީދު ވިދާޅުވިއެވެ.
