މިހާރު އޮތީ ލާދީނީ ސަރުކާރެއް ކަމަށާއި، މިސަރުކާރުގެ ކިބައިން މިންޖުވާންޖެހޭ ކަމުގައި ޖަމްއިއްޔަތުއް ސަލަފުގެ އިސްމެމްބަރު އަލީ ރަމީޒު ވިދާޅުވެއްޖެއެވެ.
އަލީ ރަމީޒު މިހެން ވިދާޅުވީ މިދިޔަ ހަފްތާގެ އަންގާރަ ދުވަހު ބޭއްވުމަަށް މަސައްކަތްކުރި ޔޯގާ ހަރަކާތް ހުއްޓުވުމަށާއި، ރާއްޖޭގައި ހިންގަ ޔޯގާ އެކި ހަރަކާތްތައް ހުއްޓުވުމަށް އިސްލާމިކް މިނިސްޓްރީން ފިލުހުންނަށް ފޮނުވި ސިޓީ ހަމަ އެމިނިސްޓްރީން މިއަދު ދޮގު ކުރުމާއި ގުޅިގެން ކުރި ޓުވީޓުގައެވެ.
އަލީ ރަމީޒު ވިދާޅުވީ ރާއްޖޭގެ އިސްލާމީ ކަންކަން ބެލެހެއްޓުމަށް ހަވާލުކުރައްވާފައިވާ އިސްލާމިކް މިނިސްޓްރީ މިފަދަ ބޮޑެތި ދޮގާއި އޮޅުވާލުންތައް އޮޅުވާލާއިރު، ދައުލަތުގެ އެހެން ވުޒާރާތަކުން ހަދާނެ ދޮގާއި، މަކަރުވެރިކަމާއިމެދު ވިސްނާލުން ބުއްދިވެރިކަމަށެވެ. މިފަދަ ކަންކަން ތަކުރާރުވަމުންދާ ދިއުމަކީ މިހާރު އޮތް ސަރުކާރުގެ ކިބައިން މިންޖުވާންޖެހޭ ކަމެއްކަމަށް އަލީ ރަމީޒު ވިދާޅުވިއެވެ.
މިސަރުކާރުގެ އިސްލާމިކް މިނިސްޓްރީއިން ބުހުތާނު ދޮގު ބަޔާން ނެރޭއިރު، ސަރުކާރުގެ އެހެން މިނިސްޓްރީ ތަކާއި، އެހެނިހެން މުއައްސަސާތައް ހުންނާނެ ލެވެލް ވިސްނާލައްވާ. މި ލާދީނީ ސަރުކާރުގެ ކިބައިން މިންޖުވާން ޖެހޭ.
– އަލީ ރަމީޒު ވިދާޅުވިއެވެ.
އިސްލާމިކް މިނިސްޓްރީޏް ނެރުނު ބަޔާނުގައި ވިދާޅުވީ މިމަހުގެ 15 ވަނަ ދުވަހު އިސްލާމިކް މިނިސްޓްރީން މޯލްޑިވްސް ޕޮލިސް ސަރިވިސްއަށް ފޮނުވާފައިވާކަމަށް ބުނާ ސިޓީއަކީ ދުނިޔޭގެ ޔޯގާ ދުވަސް ފާހަގަކުރުމުގެ ހަރަކާތްތަކާ ގުޅިގެން ފޮނުވާފައިވާ ސިޓީއެއް ނޫންކަމަށެވެ. އަދި އެ ސިޓީގައި ހިމެނިފައިވާ ފަތުވާ ނެރަފައިވަނީ އެ މިނިސްޓްރީގައި އެފަދަ ކަންތައްތަކުގައި އަމަލުކުރަމަށް ކަނޑައަޅާފައިވާ އިޖުރާއަތުތަކާއި ޚިލާފުގޮތަށްކަމަށް ބަޔާނުގައިވެއެވެ. މީގެއިތުރުން ޔޯގާގެ ޝަރުޢީ ޙުކުމާއިމެދު ދިވެހިރާއްޖޭގެ އިސްލާމީ ފަތުވާދޭ އެންމެ މަތީ މަޖިލީހުގެ ތަފްސީލީ ފަތުވާއެއް ހޯދުމަށްފަހު އާއްމުކުރާނެކަމަށް އިސްލާމިކް މިނިސްޓްރީން ވިދާޅުވެއެވެ.
ޔޯގާ ހަމަ ނުޖެހުމާއި ގުޅިގެން މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި ބުނެފައިވަނީ މިކަން ހިނގައިދިޔައީ ފުލުހުންގެ ސެކިއުރިޓީ ފެއިލިއާއަކުންކަމަށް ގަބޫލު ކުރާކަމަށެވެ. ފުލުހުންނަކީ މާލޭގައި ހިންގި މިއަށްވުރެ މާބޮޑު ހަމަނުޖެހުންތަކާއި، މުޒާހަރާތައް ހުއްޓުވުމުގައި ވަރަށް ޕްރޮފެޝަނަލްކޮށް މަސައްކަތް ކޮށްފައިވާ ބައެއްކަމަށާ، ނަމަވެސް މިހާދިސާއަށް ފުލުހުންނަށް އެވަރަށް ތައްޔާރު ނުވެވި ހަމަނުޖެހުން ނުހުއްޓުވުމަކީ ފުލުހުންގެ ފެއިލިއާއެއްކަމަށް ވަނީ އެއްބަސް ވެފައެވެ.
ކޮމެންޓު ފޮނުވާ