އެއްޖިންސުން ގުޅުން ހިންގި ވީޑިއޯތަކެއް ލީކުވެ ބައެއްގެ މައްޗަށް އެކަމުގެ ތުހުމަތުތައް ކޮށްފައިވާއިރު، އެ ފަދަ އަަމަލުތައް ހިންގާ ފަރާތްތަކަށް އަދަބުދީ އެކަން ވަގުތުން ހުއްޓުވުމަށް ގޮވާލައި ރައްޔިތުންގެ މަޖިލިހުގެ މިއަދުގެ ޖަލްސާއަށް ކުއްލި މައްސަލަ ހުށަހެޅުމުގެ ފުރުސަތު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ފުރުދަތު ނުދެއްވިއެވެ.
މިއަދުގެ ޖަލްސާ ފައްޓަވަމުން ނަޝީދު ވިދާޅުވީ ދައުރުވަމުންދާ ފޮޓޯތަކަކީ ތުހުމަތެއް ކަމަށާއި އެހެންކަމުން ބައެއްގެ މައްޗަށް ކުރެވޭ ތުހުމަތެއްގެ މައްޗަށް މަޖިލީހުގައި ވާހަކަދައްކަން ފުރުސަތު ދޭން ޖެހޭނެ ކަމަށް ގަބޫލު ނުކުރެވޭ ކަމަށެވެ. އަދި ފޮޓޯގެ ޗެއިން އޮފް ކަސްޓަޑީ އުފެދިފައި އޮތްގޮތް ދެނެނުގަނެ އެއްވެސް މީހެއްގެ އަބުރަށް ގެއްލުންވާ ގޮތައް ދައުލަތުގެ އެއްވެސް މުއައްސަސާއަކުން ކަމެއް ކުރުން އެއީ މިރާއްޖޭގެ އުސޫލުތަކާއި ހަމަތަކާއި ހިލާފުކަމެއް ކަމަށެވެ.
ދެމައްސަލަ ބަލައިނުގަތުމަށްފަހު ނަޝީދު ދެން ފުރުސަތު ދެއްވީ ނައިފަރު ދާއިރާގެ މެންބަރު އަހްމަދު ޝިޔާމް ހައުސިން މިނިސްޓަރު މުހައްމަދު އަސްލަމާއި ސުވާލު ކުރުމަށެވެ. ޝިޔާމަށް ލިބުނު ފުރުސަތުގައި އޭނާ ވަނީ ނަޝީދު މަޖިލިސް ގެންދަވަނީ ގާނޫނާއި ހިލާފަށް ކަމަށް ވިދާޅުވެ ވާހަކަފުޅު ދައްކަވަން ފައްޓަވާފައެވެ. އަދި ކުއްލި މައްސަލަ ހުށަހަޅަން ފުރުސަތު ނުދެއްވާނަމަ މިނިސްޓަރާއި ސުވާލު ނުކުރައްވާނެކަމަށް ޝިޔާމް ވިދާޅުވިއެވެ. ނަޝީދު ދެން ފުރުސަތު ދެއްވީ މާވަށު ދާއިރާގެ މެންބަރު މުހައްމަދު ސައީދު މިނިސްޓަރު އަސްލަމާއި ސުވާލު ކުރުމަށެވެ. ސައީދު ވެސް ވަނީ ނަޝީދުގެ ނިންމެވުން ގާނޫނާއި ހިލާފު ކަމަށް ވިދާޅުވެ މިނިސްޓަރާއި ސުވާލު ކުރައްވަން ދެކޮޅު ހައްދަވާފައެވެ.
މިމައްސަލަތަކަށް ފުރުސަތު ނުދެއްވުމުން، މެމްބަރު ޝިޔާމް ވަނީ އެކަމާއި ކަންބޮޑުވުން ފާޅުކޮށް ވާހަކަ ދައްކަވާފައެވެ. އަދި އިދިކޮޅު މެމްބަރުން ވަނީ ރިޔާސަތުގެ ކުރިމައްޗަށް ގޮސް އިހުތިޖާޖުކޮށްފައެވެ. މަޖިލީހުގެ ޖަލްސާ އެކަމާއި ގުޅިގެން އިރުކޮޅަކަށް މެދުކަނޑާލަން ޖެހުނެވެ.
ލިވާތު ކުރުން ހުއްޓުމަށް ގޮވާލާ ކުއްލި މައްސަލައަށް ބަހުސް ކުރަން ނަޝީދު ފުރުސަތު ނުދެއްވިއިރު، އެމަނިކުފާނުގެ ކޮއްކޮ ނާޒިމް ސައްތާރު ބަންގްލަދޭޝް ފިރިހެނަކާއި އެކު އެއްޖިންސުން ގުޅުން ހިންގާ ވީޑިއޯއެއް ވަނީ އާންމުވެފައެވެ. އެ މައްސަލަ ބަލާކަމާށް ފުލުހުން ބުނެފައިވާއިރު އަދި މިހާތަނަށް ނާޒިމް ހައްޔަރުކޮށްފައި ނުވެއެވެ. ގިނަ ބަޔަކު އަންނަނީ އޭނާ ހައްޔަރު ކުރުމަށް ގޮވާލަމުންނެވެ.
