ދިވެހި ރައްޔިތުންނަށް ބޭސްފަރުވާގެ ޚިދުމަތް ހިލޭ ފޯރުކޮށް ދިނުމަށް އުފައްދާފައިވާ ގައުމީ ހެލްތު އިންޝުއަރެންސް ސްކީމް (އާސަންދަ) އަށް މިއަހަރަށް ދައުލަތުން ކަނޑައެޅި ބަޖެޓް ހުސްވެއްޖެއެވެ.
އާސަންދަ ޞިއްޙީ އިންޝުއަރެންސްގެ އަގަށް ދައްކާ ފައިސާގެގޮތުގައި މިއަހަރަށް ދައުލަތުން ކަނޑައެޅި ބަޖެޓުގައި 731 މިލިޔަން ރުފިޔާ ކަޑައެޅިއެވެ. ފިނޭންސް މިނިސްޓްރީގެ ތަފާސްހިސާބުތަކަށް ބަލާއިރު މިމަހުގެ ނުވަވަނަ ދުވަހުގެ ނިޔަލަށް އާސަންދައަށް 795 މިލިއަން ރުފިޔާ ހަރަދުކޮށްފައިވެއެވެ.
މިދިޔަ އަހަރުގެ މިމުއްދަތުގައި އާސަންދަ ސްކީމުން ހަރަދުކޮށްފައިވާ ކަމަށް ތަފާސްހިސާބުތަކުން ދައްކަނީ 658 މިލިއަން ރުފިޔާއެވެ. އާސަންދައަށް ކަނޑައެޅި ބަޖެޓް ހުސްވެފައިވާއިރު، ސަރުކާރުގެ ދަރަނި އިތުރުވެ، ޚަރަދު އިތުރުވަމުންދާތީ ގިނަ ބައެއްގެ ކަންބޮޑުވުން ދަނީ ފާޅު ކުރަމުންނެވެ.
އާސަންދަ ކުންފުންޏަކީ ދިވެހިރާއްޖޭގެ އިޖްތިމާއީ ޞިއްޙީ އިންޝުއަރެންސްގެ ޤައުމީ ނިޒާމުގެ މަސައްކަތްތައް ހިންގާ ބެލެހެއްޓުމަށްޓަކައި ސަރުކާރުން 2011ވަނަ އަހަރު ޤާއިމްކޮށްފައިވާ ކުންފުންޏެކެވެ. އާސަންދައިން ފޯރުކޮށްދޭ ޚިދުމަތްތައް އިތުރަށް ފުޅާކޮށް "ހުސްނުވާ އާސަންދަ" ސްކީމް ތަޢާރަފުކޮށްފައިވަނީ 2014 ވަނަ އަހަރުގެ ތެރޭގައެވެ. "ހުސްނުވާ އާސަންދަ" ސްކީމަކީ ކުރިން ބޭނުންކުރަމުންދިއަ "އާސަންދަ" ސްކީމަށް ބަދަލުތަކެއް ގެނެސް، ޚިދުމަތްތައް އިތުރުކޮށް ކޮންމެ ރައްޔިތަކަށް އަހަރަކަށް ކަނޑައެޅިފައިވާ އެއްލައްކަ ރުފިޔާގެ ލިމިޓް އުވާލުމަށްފަހު އެކުލަވާލާފައިވާ ސްކީމެކެވެ. ރާއްޖެއާއި ރާއްޖޭން ބޭރުގެ ތަންތަން ހިމެނޭހެން 687 ތަނަކުން އާސަންދައިގެ ޚިދުމަތް މިހާރު ލިބޭނެކަމަށް އެކުންފުނިން ވިދާޅުވެއެވެ.
މީގެ ތެރޭގައި ސަރުކާރުގެ ހުރިހާ ހޮސްޕިޓަލްތަކަކާއި ޞިއްޙީ މަރުކަޒުތަކާއި، އެސްޓީއޯގެ ހުރިހާ ފާމަސީތަކެއް ހިމެނޭހެން 300 އަށްވުރެ ގިނަ ފާމަސީއާއި، ދަތުރުފަތުރުގެ ޚިދުމަތްދޭ 2 ތަނަކާއި، މަސްނުވީ އާލާތްތައް ރާއްޖެ އެތެރެކުރާ 2 ތަނަކާއި، އައިނު ހައްދައިދިނުމުގެ ޚިދުމަތްދޭ ތަންތަން ހިމެނެއެވެ. ހަމައެހެން ރާއްޖޭން ބޭރުން އިންޑިއާގެ 35 ތަނަކާއި، ސްރިލަންކާގެ 9 ތަނަކުންވެސް އާސަންދައިގެ ޚިދުމަތް ލިބޭނެކަމަށް އާސަންދައިން ވިދާޅުވެއެވެ.
