ގެވެށި އަނިޔާގެ މައްސަލަގަނޑު ވާޖީނިއާގެ ފެއާފެކްސް ކައުންޓީ ސަރކިޓް ކޯޓްގައި ކުރިއަށްދާ، ހޮލީވުޑްގެ ދެތަރިން ކަމަށްވާ ޖޯނީ ޑެޕް އާއި އެމްބާ ހާޑްގެ އިތުރު ވާހަކަތަކެއް އަނެއްކާވެސް ކިޔައިދީފިއެވެ.
ކައިވެނީގެ ފަހުން ކުރި ހަނީމޫން ދަތުރުގައިވެސް ޑެޕް އަނިޔާ ކުރިކަމަށް ބުނެ އެމްބާ ވަނީ އެވާހަކަތައް ކޯޓުގައި ކިޔައިދީފައެވެ.
ހޯމަ ދުވަހު ހާޑް ބުނީ ހަނީމޫން ދަތުރުގެ ތެރޭގައި ޑެޕް އޭނާއަށް އަނިޔާކުރީ އޮރިއެންޓް އެކްސްޕްރެސް ރޭލުގެ ތެރޭގައިކަމަށެވެ. އޭނާ ކަރުގައި ޓީޝާޓެއް އޮޅައިގެން ޑެޕް އަނިޔާ ކުރި ކަމަށާއި ކައިވެނީގެ ފަހުން ޑެޕްގެ ފަރާތުން ގިނަ އަނިޔާ ތަކެއް ލިބިފައި ވާކަމަށް އެމްބާ މީގެ ކުރިން ވެސް ވަނީ ކޯޓުގައި އެކިފަހަރުމަތިން ކިޔައިދީފައެވެ.
ޑެޕް އާއި އެމްބާގެ ކައިވެނި ރޫޅާލީ 2017 ވަނަ އަހަރުއެވެ. ކައިވެނި ރޫޅާލީ ގެވެށި އަނިޔާގެ ސަބަބުންނެވެ. ނަމަވެސް މިދެމީހުން އެކުގައި އަހަރެއްހާ ދުވަހު އުޅުނެވެ.
އަހަރެއްހާ ދުވަހު ޑެޕާއެކު އުޅުނީ ލޯބިވާތީ ކަމަށާއި ނަމަވެސް ބައެއް ފަހަރު ޑެޕްގެ އަނިޔާގެ ޝިކާރައަށްވެ އޭނާ ދިރި ދުނިޔޭގައި ހުންނާނެތޯ ވެސް ސުވާލު އުފެދުނު ކަމަށް އެމްބާ ވަނީ ބުނެފައެވެ.
ޑެޕަކީ ބަނގުރަލާއި މަސްތުވާ ތަކެއްޗަށް ދެވިހިފާފައި ހުރި މީހެއް ކަމަށާއި މަސްތުގެ ހާޅުގައި ޑެޕަކީ މުޅިން ތަފާތު މީހެއް ކަމަށް އެމްބާ ވަނީ ބުނެފައެވެ. މީގެ އިތުރުން ވެސް އަނިޔާގެ އެތައް ތުހުމަތު ތަކެއް އެމްބާ ދަނީ ޑެޕަށް ކުރަމުންނެވެ.
ނަމަވެސް "ޕައިރޭޓްސް އޮފް ދަ ކެރީބިއަން"ގެ ބަތަލު ޖޯނީ ޑެޕް ދަނީ ފެށުނީއްސުރެ އެ ތުހުމަތުތަކަށް އިންކާރުކުރަމުންނެވެ.
