ޕެންޝަން ޤާނޫނު ރިވިއުކުރަން ނުކުރުނު ބަޔަކު ރައްޔިތުންގެ ހައްގޭ ނުކިޔުން ރަނގަޅުވާނެކަމަށް ވިދާޅުވެ ދައުލަތަށް ގިނަ ދުވަހު ޚިދުމަތްކުރެއްވި އަދި ކުރީގެ ވަޒީރ އަދި ޚާއްޞަ މަޖިލީހުގެ ކުރީގެ ނާއިބު ރައީސް، ނޢޢވ އަނީސާ އަޙްމަދު ރައްޔިތުންގެ މަޖިލީހަށް ފާޑުވިދާޅުވެއްޖެއެވެ.

އަނިސާ ފާޑުވިދާޅުވެފައި މިވަނީ، ދިވެހިރާއްޖޭގެ ޕެންޝަނާ ބެހޭ ޤާނޫނުގެ ދަށުން ކަނޑައަޅާފައިވާ ކަންކަން އެންމެ އެދެވޭ ގޮތެއްގައި ޕެންޝަންގެ ހައްގުވެރިންނަށް ލިބެމުން ނުދާކަމަށް ބުނެ ތިމަރަފުށީ ދާއިރާގެ މެންބަރު ޢަބްދުﷲ ރިޔާޒް ހޫށައެޅުއްވި މައްސަލަ މަޖިލީހުން ބޭރުކޮށްލުމުންނެވެ.

އަނީސާ ވިދާޅުވީ، ދައުލަތުގެ ވަޒީފާގައި މުޅި އުމުރު ހޭދަކޮށްފައި ރިޓައަރކުރި މީހުންނާ އެނޫން މީހުންނާ އެއްވަރަށް އަސާސީ ޕެންޝަން ދިނުމަކީ އިންސާފުވެރިގޮތަކަށް ނުވާތީއާވެސްއެކު ޕެންޝަން ގާނޫނު ރިވިޔުކުރުމަށް ހުށަހެޅުމުން އެވާހަކަ ދައްކާލަންވެސް ބޭނުންނުވި މަޖިލީހަކުން ރައްޔިތުންގެ ޙައްގޭ ނުކިއުން ރަނގަޅުވާނެކަމަށެވެ.

ދައުލަތުގެވަޒީފާގަމުޅިއުމުރުހޭދަކޮށްފަ ރިޓައަރކުރިމީހުންނާއެނޫންމީހުންނާއެއްވަރަށްއަސާސީޕެންޝަންދިނުމަކީއިންސާފުވެރިގޮތަކަށްނުވާތީއާވެސްއެކުޕެންޝަންގާނޫނުރިވިޔުކުރުމަށްހުށަހެޅުމުންއެވާހަކަދައްކާލަންވެސްބޭނުންނުވިމަޖިލީހަކުންރައްޔިތުންގެޙައްގޭނުކިއުންރަގަޅުވާނީ @PeoplesMajlis

— AneesaAhmed (@AneesaAhmed19) May 18, 2022

އަނީސާ މިހެން ވިދާޅުވެފައިވާއިރު އެމްއެންޕީގެ ޕީޖީ ލީޑަރ ޢަބްދުﷲ ރިޔާޟް މަޖުލީހަށް މައްސަލަ ހުށަހަޅުއްވަމުން ވިދާޅުވެފައިވަނީ، ޕެންޝަނާއިބެހޭ ގާނޫނާއި ގުޅޭގޮތުން އެމްއެންޕީން ކޮށްފައިވާ ދިރާސާއަކުން ދައްކާފައިވާ ގޮތުގައި، މިގާނޫނު ވުޖޫދުވެ ތަންފީޒު ކުރެވެން ފެށިގެން މިއަދާހަމައަށް އައިރު، މިގާނޫނުގެ މަގުސަދުތަކާއި ލާޒިމް ކޮށްފައިވާ ޒިންމާތަކާއި މިގާނޫނުން ކަނޑައަޅާފައިވާ ކަންކަން އެންމެ އެދެވޭ ގޮތެއްގައި ފެންޝަންގެ ހައްގުވެރިންނަށް ލިބެމުން ނުދާކަން ފާހަގަވެފައި ވާކަމަށެވެ.

މިގޮތުން ރިޔާޒު ފާހަގަ ކުރައްވާފައިވާ މައްސަލަތަކުގެ ތެރޭގައި، އަސާސީ ޕެންޝަންގެ އިތުރުން އެހެން ޕެންޝަންގެ ގޮތުގައި ލިބޭ އަދަދަކީ އަސާސީ ޕެންޝަންގެ ދެގުނައަށްވުރެ ދަށް އަދަދެއްނަމަ އެއަދަދުގެ %50 އަސާސީ ޕެންޝަންއިން އުނިކުރަންޖެހޭ ގޮތަށް ގާނޫނުގައި ބަޔާން ކޮށްފައި އޮންނަ އޮތުމައި، އަދި އޭގެ އިތުރުން އެހެން ޕެންޝަންގެ ގޮތުގައި ލިބޭ އަދަދު އަސާސީ ޕެންޝަންގެ ދެގުނައަށްވުރެ ބޮޑުނަމަ، އެފަރާތަކަށް އަސާސީ ޕެންޝަ ނުލިބޭގޮތަށް ގާނޫނުގައި އޮންނަ މައްސަލައެވެ.

ރިޔާޒު ވިދާޅުވި ގޮތުގައި، ގަނޫނުގައި މިގޮތަށް ބަޔާން ކޮށްފައި އޮންނަ އޮތުމުގެ ނަތިޖާއެއްގެ ގޮތުން، އަސާސީ ޕެންޝަންގެ ހައްގުވެރިންނަށް ލިބިދޭންޖެހޭ 5،000 ރުފިޔާގެ ޕެންޝަންގެ އިނާޔަތް ފުރިހަމައަށް އޭގެ ހައްގުވެރިންނަށް ލިބުމަށް ވަނީ ހުރަސް އެޅިފައެވެ.

ރިޔާޒު ވިދާޅުވެފައިވަނީ، ރިޓަޔަރމަންޓް ޕެންޝަން ސްކީމާއި އުމުރުން ދުވަސްވީ މީހުންނަށް ދެވޭ ޕެންޝަންއަކީ މުޅިން ތަފާތު ދެ ޕެންޝަނަކަށް ވެފައި، ދައުލަތުގެ ބަޖެޓަށް ބުރަ ބޮޑުވުމަކީ އެއްވެސް މީހެއްގެ ހައްގަކަށް އުނިކަމެއް އަންނަންޖެހޭ ކަމެއް ނޫންކަމުގައެވެ.

ޕެންޝަން ފައިސާ އޭގެ ޙައްގުވެރިންނަށް ލިބެމުން ނުދާކަމުގެ މައްސަލަ ސަރުކާރުގެ ސަމާލުކަމަށް ގެނައުމަށް ގޮވާލައި ރައްޔިތުންގެ މަޖިލީހަށް ހުށަހެޅި މައްސަލަ މިއަދު މަޖިލީހުން ބޭރު ކޮށްލާފައިވަނީ ވޯޓުގައި ބައިވެރިވި 29 މެންބަރުންގެ ތެރެއިން 19 މެންބަރުންގެ އަޣުލަބިއްޔަތުންނެވެ. މައްސަލަ ބަލައިގަތުމަށް ފަސް މެންބަރުން ވޯޓު ދެއްވިއިރު އެއް މެންބަރަކު ވަނީ ވަކި ގޮތަކަށް ވޯޓުދޭން ބޭނުން ނުވާ ކަމަށް ވިދާޅުވެފައެވެ.