ބިމުން ފެން ބޭރުކުރުމުގައި ޤާނޫނާއި ޤަވާއިދާއި ޚިލާފުވާ ފަރާތްތައް އެއް މިލިއަން ރުފިޔާއާއި ހަމައަށް ޖޫރިމަނާކުރެވޭގޮތަށް ފެނާއި ނަރުދަމާގެ ޤާނޫނަށް ގެނައި އިޞްލާހު ރައްޔިތުންގެ މަޖިލީހުން ފާސްކޮށްފިއެވެ.
ފެނާއި ނަރުދަމާގެ ޤާނޫނަށް ކުޅުދުއްފުށީ އުތުރު ދާއިރާގެ މެންބަރު ޔާސިރު ޢަބްދުއްލަޠީފް އިސްލާހު ހުށައެޅުއްވީ، ފެނާއި ނަރުދަމާގެ ޤާނޫނު ތަންފީޛުކުރުމުގައި މިނިސްޓްރީ އޮފް އެންވަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީއާއި، ޔުޓިލިޓީ ރެގިއުލޭޓަރީ އޮތޯރިޓީއަށް ދިމާވާ ބައެއް އިދާރީ
ދަތިތައް ޙައްލުކުރުމަށާއި، ފެނާއި ނަރުދަމާގެ ޚިދުމަތް ދިނުމުގެ ނިޒާމު އިތުރަށް ހަރުދަނާކުރުމަށެވެ. ޤާނޫނަށް މަޖިލީހުން ގެނައި އިޞްލާހުގައި ވަނީ ޤަވާއިދާއި ޤާނޫނާއި ޚިލާފަށް ބިމުން ފެން ބޭރުކުރާ ފަރާތްތައް އެ މައްސަލައިގެ ކުޑަބޮޑުމިނަށް ބަލައި ފަސް ހާސް ރުފިޔާއާއި އެއް މިލިއަން ރުފިޔާއާއި ދެމެދުގެ ޢަދަދަކުން ޖޫރިމަނާކުރެވޭނެކަމަށެވެ.
އެންވަޔަރަމަންޓް ކޮމިޓީން ފާސްކުރި މި ރިޕޯޓަށް މަޖިލީހުގެ ތަޅުމުންވެސް ބައެއް އިޞްލާހު ގެނެސްފައިވެއެވެ. އެގޮތުން ފެން ޕްލާންޓެއް އޮޕަރޭޓްކުރަން ހުއްދަދޭ އިރު، އެ ޕްލާންޓަށް ބޭނުންވާ ކަރަންޓު އިއާދާކުރަނިވި ހަކަތައިން އުފެއްދޭނެ އިންތިޒާމެއް ހުރިކަން ކަށަަވަރުކުރަން ކަމާ ބެހޭ އިދާރާއަށް ލާޒިމުކުރުމަށް ހުށައެޅި އިޞްލާހުވެސް ވަނީ މަޖިލީހުން ފާސްކޮށްފައެވެ.
ފެނާއި ނަރުދަމާގެ ޤާނޫނަށް ގެނައި އިތުރު އިޞްލާހުތަކުގެ ތެރޭގައި ފެނާއި ނަރުދަމާގެ ނިޒާމް ފަރުމާކުރުމާއި ޤާއިމްކުރުމުގައި އެ ނިޒާމުތަކުން ޚިދުމަތް ދިނުމާއި ބެހޭ ޤަވާއިދިތައް އެކުލަވާލުމަށާއި މިންގަނޑުތައް ކަމާގުޅުންހުރި މުއައްސަސާތަކުގެ މަޝްވަރާގެ މަތިން ކަނޑައެޅުމަށް ވަނީ ލާޒިމްކޮށްފައެވެ. މީގެ އިތުރުން ފެނާއި ނަރުދަމާގެ ނިޒާމްގެ ޤާއިމްކުރުމަށް ބޭނުންވާސާމާނު ޓެސްޓްކޮށް ސެޓިފައިކުރާނެ މިންގަނޑެއްވެސް އެކުލަވާލަންވާނެކަމަށް ބުނެފައިވެއެވެ.
ފެނާއި ނަރުދަމާގެ ޤާނޫނަށް ތަޅުމުންގެނައި އިސްލާހުތަކާއެކު މަޖިލީހުން ފާސްކުރީ ވޯޓުގައި ބައިވެރިވެވަޑައިގެންނެވި 47 މެންބަރުންގެ ވޯޓުންނެވެ.
